លោក ត្រាំ ប្រកាសដាក់ពន្ធ១០០% លើភាពយន្តផលិតនៅបរទេស
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសដាក់ពន្ធ ១០០%…
0:00
0:00
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសដាក់ពន្ធ ១០០% លើភាពយន្តផលិតនៅបរទេស ដើម្បីសង្គ្រោះឧស្សាហកម្មភាពយន្តអាមេរិក ដែលកំពុងរងផលប៉ះពាល់យ៉ាងខ្លាំង។ នេះបើយោងតាមប្រភពពីទីភ្នាក់ងារសារព័ត៌មាន Reuters និង BBC ចេញផ្សាយនៅថ្ងៃទី៥ ខែឧសភា ឆ្នាំ២០២៥។
លោក ត្រាំ នៅថ្ងៃទី៤ ខែឧសភា ឆ្នាំ២០២៥ បានប្រកាសដាក់ពន្ធ ១០០% លើភាពយន្តផលិតនៅបរទេស តាមរយៈការបង្ហោះសារនៅលើបណ្តាញសង្គម Truth Social ដោយលោកអះអាងថា «ខ្ញុំបានបញ្ជាឱ្យក្រសួងពាណិជ្ជកម្ម និងតំណាងពាណិជ្ជកម្មអាមេរិកឱ្យចាប់ផ្តើមភ្លាមៗ ការដំឡើងពន្ធលើខ្សែភាពយន្តណាមួយ ឬទាំងអស់ដែលផលិតនៅទឹកដីបរទេស។ ពួកយើងចង់បានភាពយន្តផលិតនៅទឹកដីអាមេរិក»។ លោកបានបន្ថែមថា ឧស្សាហកម្មភាពយន្តអាមេរិកកំពុងរងផលប៉ះពាល់យ៉ាងខ្លាំង និងកំពុងស្លាប់យ៉ាងលឿន ដោយសារការលើកទឹកចិត្តពីប្រទេសជាច្រើនដែលកំពុងតែផ្តល់ជូន ដើម្បីទាក់ទាញអ្នកផលិតខ្សែភាពយន្តអាមេរិក ដែលនេះគឺជាការគំរាមកំហែងសន្តិសុខជាតិ។
នៅក្នុងថ្ងៃជាមួយគ្នានោះ លោក Howard Lutnick រដ្ឋមន្ត្រីក្រសួងពាណិជ្ជកម្មអាមេរិក បានឆ្លើយតបទៅនឹងការប្រកាសចុងក្រោយនេះថា «ពួកយើងកំពុងធ្វើការលើរឿងនេះ»។ ប៉ុន្តែទោះយ៉ាងណាក៏ដោយ ទាំងលោក Lutnick និងលោក ត្រាំ មិនបានផ្តល់ព័ត៌មានលម្អិតអំពីរបៀបថា តើការគិតពន្ធគយលើភាពយន្តផលិតនៅទឹកដីបរទេស ឬក៏ក្រុមហ៊ុនអាមេរិកដែលពាក់ព័ន្ធនឹងការថត និងផលិតខ្សែភាពយន្តនៅក្រៅទឹកដីអាមេរិកនឹងត្រូវអនុវត្តបែបណានោះទេ0x017d7 ដ្បិតភាពយន្តល្បីៗ និងថ្មីៗជាច្រើន ដែលផលិតដោយហូលីវូដ ត្រូវបានថតនៅខាងក្រៅទឹកដីអាមេរិក រួមមាន Deadpool & Wolverine, Wicked និង Gladiator II ជាដើម។
ប្រភពពីក្រុមហ៊ុនស្រាវជ្រាវភាពយន្ត ProdPro បានឱ្យដឹងថា នៅក្នុងឆ្នាំ ២០២៣ ស្ទើរតែពាក់កណ្តាលនៃការចំណាយដោយបណ្តាផលិតករអាមេរិកលើគម្រោងខ្សែភាពយន្ត និងកម្មវិធីទូរទស្សន៍គិតជាទឹកប្រាក់ជាង៤០លានដុល្លារ បានចេញទៅផលិតនៅក្រៅទឹកដីអាមេរិក។ ចំណែកផលិតកម្មភាពយន្តហូលីវូដ និងកម្មវិធីទូរទស្សន៍អាមេរិកបានធ្លាក់ចុះជិត ៤០% ក្នុងរយៈពេលមួយទសវត្សរ៍ចុងក្រោយនេះ។ នេះបើយោងតាមប្រភពពី FilmLA ដែលជាអង្គភាពមិនរកប្រាក់ចំណេញដែលតាមដានផលិតកម្មក្នុងតំបន់។
ការគំរាមកំហែងពន្ធគយចុងក្រោយបំផុតរបស់លោក ត្រាំ មើលទៅហាក់ដូចជា បង្កើនភាពតានតឹងបន្ថែមទៀតក្នុងទំនាក់ទំនងរបស់សហរដ្ឋអាមេរិកជាមួយប្រទេសដទៃទៀត ដែលកំពុងតែប្រឈមមុខនឹងការគិតពន្ធគយលើទំនិញនាំចូលទឹកដីអាមេរិក៕
ចែករំលែកព័តមាននេះ