ផ្ទុះការចោទប្រកាន់ចៅអធិការឱ្យស្ត្រីម្នាក់ដេកក្នុងកុដិ
- កំពត
ខេត្តកំពត ៖ នៅវត្តដំណាក់ត្រយឹង ឃុំខ្ជាយខាងត្បូង ស្រុកដងទង់ កាលពីព្រឹកថ្ងៃទី២ ខែឧសភា ឆ្នាំ២០២៥ កន្លងទៅ បានផ្ទុះការបែកបាក់សាមគ្គីគ្នា…
ខេត្តកំពត ៖ នៅវត្តដំណាក់ត្រយឹង ឃុំខ្ជាយខាងត្បូង ស្រុកដងទង់ កាលពីព្រឹកថ្ងៃទី២ ខែឧសភា ឆ្នាំ២០២៥ កន្លងទៅ បានផ្ទុះការបែកបាក់សាមគ្គីគ្នា រវាងព្រះសង្ឃនិងតាអាចារ្យដែលចោទថា បានឃើញស្រី្តម្នាក់នៅក្នុងកុដិចៅអធិការវត្ត ។
តាមព័ត៌មានថា ចៅអធិការអង្គនេះនាម នាក់ វីន ព្រះជន្ម២៦ឆ្នាំ បានជួបជាមួយស្ត្រីម្នាក់ឈ្មោះម៉េង ស្រីពៅ អាយុ៤៦ឆ្នាំ ទីលំនៅមិនពិតប្រាកដ ម្ដងថា នៅក្រុងដូនកែវ ខេត្តតា
កែវ ម្ដងថា នៅស្រុកសំរោងទង ខេត្តកំពង់ស្ពឺ ។ ប៉ុន្តែអ្វីដែលគួរឱ្យសង្ស័យនោះ គឺនៅវេលាម៉ោងជិត១២យប់ថ្ងៃទី១ ខែឧសភា ឆ្នាំ២០២៥ ខណៈប្រជាពលរដ្ឋបានតាមដានឃើញថា ចៅអធិការវត្តអង្គនេះ បានសឹងជាមួយស្រី្តម្នាក់នោះនៅក្នុងកុដិ ។
ពេលដឹងថា មានមនុសស្រីនៅក្នុងបន្ទប់កុដិចៅអធិការដែលជារឿងបារាជិកសម្រាប់អ្នកបួសនោះ ប្រជាពរដ្ឋក៏បានទូរស័ព្ទប្តឹងទៅនគរបាលប៉ុស្តិ៍ឃុំខ្ជាយខាងត្បូងឱ្យមកជួយ
ពិនិត្យ និងបានគោះទ្វារ ក៏ឃើញស្ត្រីរូបនោះនៅក្នុងបន្ទប់មែន ។
លោក ប៉ាង សៀក នាយប៉ុស្តិ៍នគរបាលឃុំខ្ជាយខាងត្បូងបានឱ្យដឹងថា ក្រោយពីមានព័ត៌មានថា មានស្ត្រីម្នាក់មកនៅក្នុងកុដិចៅអធិការវត្ត លោកក៏បាននាំកងកម្លាំងមកពិនិត្យ តែលោកមិនមានការចោទប្រកាន់ទៅលើព្រះសង្ឃនិងស្ត្រីរូបនោះយ៉ាងម៉េចទេ គ្រាន់តែហៅសាកសួរឱ្យដឹងពីមូលហេតុប៉ុណ្ណោះ ។
លោក ប៉ាង សៀក ថ្លែងថា ចំពោះភិក្ខុសង្ឃនិងមនុស្សស្រីនោះ បើមានទំនាក់ទំនងយប់អធ្រាត្របែបនេះមិនល្អទេ ។ ចំណែកសមត្ថកិច្ចត្រូវតែតាមដានពីសន្តិសុខ ព្រោះឥឡូវនេះមានមនុស្សគ្រប់ប្រភេទមកបោកព្រះសង្ឃឬតាជីយាយជីជាញឹកញយ នៅតាមទីអារាមផ្សេងៗ ។
នៅព្រឹកថ្ងៃទី២ ខែឧសភា ឆ្នាំ២០២៥ ក៏មានការដោះស្រាយដោយមន្ត្រីសង្ឃខាងវិន័យធរនៅស្រុកដងទង់ ទោះបំភ្លឺថា ស្ត្រីរូបនោះត្រូវជាញោមធម៌ភិក្ខុសង្ឃអង្គនេះក៏ដោយ ។ មិនមែនឃាត់មិនឱ្យធ្វើបុណ្យទេ តែត្រូវចុះកិច្ចសន្យាមួយ មិនឱ្យចូលក្នុងបន្ទប់ភិក្ខុសង្ឃនៅពេលយប់ឡើយចាប់ពីពេលនេះទៅ ហើយបើស្ត្រីរូបនេះមកពេលយប់ដេកកន្លែងណាក៏មិនទាស់អ្វីដែរ តែហាមក្នុងបន្ទប់ព្រះសង្ឃ ។
ស្ត្រីរូបនេះឈ្មោះ ស្រីពៅ បានបំភ្លឺថា ខ្លួនមិនមានចេតនាអីជាមួយភិក្ខុសង្ឃនេះទេ គាត់សុខចិត្តធ្វើបុណ្យ ហើយក៏ចំណាយធនធានក្នុងការកសាងក្នុងវត្តនេះ ក៏អស់លុយច្រើនលានដែរ ។
ព្រះវិន័យធរបានដាក់កំហិតចៅអធិការវត្តថា មិនឱ្យករណីបែបនេះ កើតមានជាលើកទី២ឡើយ ។ លោកមេឃុំខ្ជាយខាងត្បូង ក៏បានលើកឡើងដែរ វត្តនេះ មានការបែកបាក់សាមគ្គីផ្ទៃក្នុងរវាងគណៈកម្មការអាចារ្យវត្ត និងព្រះចៅអធិការវត្ត ។ ប៉ុន្តែរឿងថា មានស្រីមកដេកក្នុងកុដិជារឿងមួយមិនអាចទទួលយកបាន ព្រោះអ្នកបួសត្រូវស្គាល់តម្លៃព្រះសង្ឃ និងវិន័យសង្ឃ ។ ទោះជាបែបណា គ្រប់ភាគីសុទ្ធតែទទួលខុសត្រូវ និងរួមសាមគ្គីគ្នាវិញ ៕
ចែករំលែកព័តមាននេះ