ខេត្តកំពង់ស្ពឺ ៖ សង្ស័យផ្លែស្វាយកែវរមៀតមានតម្លៃថោកខ្លាំងហើយ ទើបប្រជាពលរដ្ឋដឹកយកមកបោះចោលនៅក្នុងដីឡូត៍មួយកន្លែងខាងជើងផ្លូវជាតិលេខ៤ ក្នុងឃុំមហាសាំង ស្រុកភ្នំស្រួច ខេត្តកំពង់ស្ពឺ។ បើតាមការឱ្យដឹងពីប្រជាពលរដ្ឋនៅក្បែរនោះនិយាយថា គាត់បានឃើញគំនរផ្លែស្វាយកែវរមៀត គេច្រកក្នុងថង់ពណ៌ឈាមជ្រូកប្រមាណជិត១០០ថង់…
ខេត្តកំពង់ស្ពឺ ៖ សង្ស័យផ្លែស្វាយកែវរមៀតមានតម្លៃថោកខ្លាំងហើយ ទើបប្រជាពលរដ្ឋដឹកយកមកបោះចោលនៅក្នុងដីឡូត៍មួយកន្លែងខាងជើងផ្លូវជាតិលេខ៤ ក្នុងឃុំមហាសាំង ស្រុកភ្នំស្រួច ខេត្តកំពង់ស្ពឺ។
បើតាមការឱ្យដឹងពីប្រជាពលរដ្ឋនៅក្បែរនោះនិយាយថា គាត់បានឃើញគំនរផ្លែស្វាយកែវរមៀត គេច្រកក្នុងថង់ពណ៌ឈាមជ្រូកប្រមាណជិត១០០ថង់ បោះចោល២~៣ថ្ងៃកន្លងទៅហើយ នៅក្នុងដីឡូត៍ខាងលើនេះ សង្ស័យតែតម្លៃស្វាយកែវរមៀតនេះធ្លាក់ចុះខ្លាំងហើយ ទើបប្រជាពលរដ្ឋយកមកបោះចោលបែបនេះ។
បើតាមប្រជាពលរដ្ឋម្នាក់រស់នៅក្នុងផ្សារត្រែងត្រយឹង ស្រុកភ្នំស្រួច ខេត្តកំពង់ស្ពឺ និងអ្នកដាំស្វាយកែវរមៀតនិយាយឱ្យដឹងថា ឆ្នាំនេះតម្លៃស្វាយកែវរមៀតធ្លាក់ចុះខ្លាំងណាស់ រហូតដល់ប្រជាពលរដ្ឋម្ចាស់ចំការ និងអ្នកម៉ៅចំការស្វាយទុកចោលនៅលើដើមតែម្តង។ ពីព្រោះថាតម្លៃធ្លាក់រហូតដល់២០០រៀល ដល់១០០រៀលក្នុងមួយគីឡូក្រាម ហេតុដែលពួកគាត់ទុកចោលលើដើមមិនបេះនោះ ដោយសារតែត្រូវចំណាយនិងជួលកម្មករបេះស្វាយ ហើយមិនរួចថ្លៃឈ្នួលនោះទេ ទើបទុកចោលបែបនេះ។ ប្រសិនបើម្ចាស់ចំការ ឬអ្នកម៉ៅតាមចំការស្វាយបានចុះកុងត្រាជាមួយ រោងចក្រកែច្នៃស្វាយផ្សេងៗ អាចមានតម្លៃ៤០០~៥០០រៀលក្នុងមួយគីឡូក្រាម ដែលជាស្វាយលេខ១ទើបគេទទួលទិញតម្លៃនោះ។
ពាក់ព័ន្ធនិងការប្រទះឃើញគំនរស្វាយកែវរមៀតដែលគេយកទៅបោះចោលនៅក្នុងដីឡូត៍មួយកន្លែងក្នុងឃុំមហាសាំង ស្រុកភ្នំស្រួច ខេត្តកំពង់ស្ពឺនោះ លោក យឹម ណន ប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពង់ស្ពឺបាន ឱ្យអ្នកយកព័ត៌មានកោះសន្តិភាពដឹងថា ចាំមើលលោកឱ្យមន្ត្រីចុះទៅពិនិត្យមើល។ ចំពោះតម្លៃស្វាយកែវរមៀតកាលពីមុនចូលឆ្នាំមានតម្លៃខ្ពស់ ប៉ុន្តែក្រោយចូលឆ្នាំ២សប្តាហ៍ចុងក្រោយនេះឃើញថាធ្លាក់ថ្លៃបន្តិច ប៉ុន្តែម្ចាស់ចំការណាដែលបានកុងត្រាជាមួយក្រុមហ៊ុន ឬរោងចក្រ មានតម្លៃក្នុងមួយគីឡូក្រាម៤០០~៥០០រៀលដែរ។
លោក យឹម ណន ប្រធានមន្ទីរ បានបន្តថា ផ្លែស្វាយកែវរមៀតដែលជាប់លេខ១ក្រុមហ៊ុនឬរោងចក្រទទួលទិញចាប់ពី ៣~៤ផ្លែ មួយគីឡូ។ បើផ្លែស្វាយតូចៗ ឬមានសភាពទន់ ឬមួយទុំទៅហើយនោះ ក្រុមហ៊ុន ឬរោងចក្រមិនទទួលទិញនោះទេ យកទៅកែច្នៃមិនកើត។ ជួនកាលប្រជាពលរដ្ឋ ឬអ្នកដាំស្វាយគាត់ដឹកតាមរ៉ឺម៉ក ឬគោយន្តយកទៅលក់ឱ្យរោងចក្រ ឬក្រុមហ៊ុន ផ្លែស្វាយតូចៗ ទើបពួកគាត់យកទៅបេះចោលបែបនេះហើយមើលទៅ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព ៕
ចែករំលែកព័តមាននេះ