ទីក្រុងអូតាវ៉ា៖ អនាគតនាយករដ្ឋមន្ត្រីកាណាដានៅអាណត្តិថ្មី លោកម៉ាកខានី (Mark Caney) ថ្លែងថារដ្ឋាភិបាលរបស់លោកនឹងមិនចុះញ៉មប្រទេសអាមេរិកទេនៅក្នុងអាណត្តិដឹកនាំរបស់គាត់។ លោកថ្លែងថាដូច្នេះបន្ទាប់ពីគណបក្សសេរីនិយមរបស់លោកបានទទួលជ័យជម្នះនៅក្នុងការបោះឆ្នោត។ គ្រាន់តែថាគណបក្សនេះមិនបានទទួលអាសនៈច្រើនគ្រប់គ្រាន់ដើម្បីបង្កើតរដ្ឋាភិបាលម្នាក់ឯងនោះទេ។
តាមពិត គណបក្សសេរីនិយមរបស់លោកម៉ាកខានីមិនរំពឹងថានឹងឈ្នះឆ្នោតទេ។ ប៉ុន្តែបន្ទាប់ពីលោកត្រាំប្រកាសចង់បានប្រទេសកាណាដាជារដ្ឋទី៥១របស់អាមេរិករួមទាំងនយោបាយដំឡើងពន្ធផងនោះធ្វើឱ្យគណបក្សនេះជ្រើសរើសយកប្រធានបទដែលប្រឆាំងនឹងនយោបាយរបស់លោកត្រាំ។ ទន្ទឹមនឹងនោះ ប្រជាជនកាណាដាមានកំហឹងយ៉ាងខ្លាំងចំពោះលោកត្រាំ។ ដូច្នេះ ពួកគេរួបកម្លាំងគ្នាបោះឆ្នោតឱ្យគណបក្សរបស់លោកខានីតែម្ដង។
ឥឡូវនេះ លោកខានីចាប់ផ្ដើមបញ្ចេញសារនយោបាយក្ដៅៗទៅកាន់លោកត្រាំជាបណ្ដើរៗហើយ។ ក្រោយពេលទទួលដំណឹងឈ្នះឆ្នោតតែបន្តិចប៉ុណ្ណោះ លោកខានីបានជួបសំណេះសំណាលជាមួយអ្នកគាំទ្រ។ លោកថាលោកត្រាំប្រើយុទ្ធសាស្ត្របំបែកបំបាក់ដើម្បីត្រួតត្រា។ ប៉ុន្តែលោកសូមផ្ដាំត្រឡប់ទៅវិញថាកាណាដាត្រូវតែរួបរួមសាមគ្គីគ្នា។ លោកសន្យាថារដ្ឋាភិបាលរបស់លោកនឹងបម្រើឱ្យឆន្ទៈរបស់ប្រជាជនកាណាដាគ្រប់រូប។
លោកខានីថ្លែងបន្តទៀតថាដូចដែលលោកធ្លាប់បានព្រមានជាច្រើនខែមកហើយគឺថាអាមេរិកចង់បានដីរបស់យើង, ចង់បានធនធានរបស់យើង, ចង់បានទឹករបស់យើង និងចង់បានប្រទេសរបស់យើងទាំងមូល។ ប៉ុន្តែលោកនឹងមិនបណ្ដោយឱ្យបំណងនេះបានសម្រេចជាដាច់ខាត។ លោកខានីបាននិយាយឡើងវិញនូវសេចក្ដីថ្លែងការណ៍ដែលលោកធ្លាប់បានប្រកាសកាលពីអំឡុងពេលឃោសនាបោះឆ្នោត។ នោះគឺទំនាក់ទំនងអាមេរិក-កាណាដាបានប្រែប្រួលហើយនៅក្នុងពេលនេះ។
លោកថ្លែងថាយើងពិតជាមានអារម្មណ៍ភ្ញាក់ផ្អើលយ៉ាងខ្លាំងនឹងអំពើក្បត់របស់អាមេរិក។ ប៉ុន្តែយើងត្រូវចងចាំទុកជានិច្ចនូវមេរៀន (ដ៏ជូរចត់) នេះ។ យើងត្រូវតែចេះការពារខ្លួនយើង ហើយត្រូវថែរក្សាគ្នាទៅវិញទៅមក។ សូមជម្រាបថានៅក្នុងរដ្ឋសភាកាណាដាសព្វថ្ងៃនេះមានអ្នកតំណាងរាស្ត្រសរុប១៤៣រូប។ ដូច្នេះ ដើម្បីបង្កើតរដ្ឋាភិបាលបានលុះត្រាតែមាន១៧២អាសនៈយ៉ាងតិច។ ប្រភពខ្លះថាគណបក្សសេរីនិយមរបស់លោកខានីមិនបានទទួលអាសនៈទៅតាមការតម្រូវទេ។ ដូច្នេះលោកត្រាំទាក់ទងទៅគណបក្សតូចៗមួយចំនួនដើម្បីបង្កើតរដ្ឋាភិបាលចម្រុះជាមួយគ្នា៕
ចែករំលែកព័តមាននេះ