រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា នៅក្នុងរយៈពេលជាង១ឆ្នាំមកនេះ សម្តេចបានចុះហត្ថលេខា បង្កើតតំបន់សេដ្ឋកិច្ចពិសេស…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា នៅក្នុងរយៈពេលជាង១ឆ្នាំមកនេះ សម្តេចបានចុះហត្ថលេខា បង្កើតតំបន់សេដ្ឋកិច្ចពិសេស ២ ឬ៣ គម្រោងរួចហើយ ដើម្បីបង្កើតរោងចក្រនៅលើទឹកដីខេត្តកំពត ដោយមានក្រុមហ៊ុនដ៏ធំមួយ បានដាក់ទុនវិនិយោគ។ ការលើកឡើងរបស់សម្តេចបវរធីបតី ខណៈក្រុមហ៊ុននេះ គឺបានបណ្តាក់ទុនវិនិយោគ បើករោងចក្រនៅកម្ពុជាចំនួន ២រួចទៅហើយ នៅលើទឹកដីកម្ពុជា ។
សម្តេចបវរធិបតី ហ៊ុន ម៉ាណែត បានធ្វើឡើងនៅព្រឹកថ្ងៃទី២៩ ខែមេសា ឆ្នាំ២០២៥ នៅចំពោះមុខលោក វ៉ាង វិនពិន (Wang Wenbin) ឯកអគ្គរដ្ឋទូតចិនប្រចាំកម្ពុជា នៅពេលអញ្ជើញសម្ពោធផ្លូវជាតិ៣ខ្សែ គឺផ្លូវលេខ៣១,៣៣,៤១ ដែលមានតម្លៃ ១៨៨លានដុល្លារ ។
សម្តេចបវរធិបតី ហ៊ុន ម៉ាណែត បានលើកឡើងថា ការកសាងហេដ្ឋារចនាសម្ព័ន្ធ នៅខេត្តភាគនិរតី មានសារៈសំខាន់ណាស់ ក្នុងការលើកកម្ពស់ និងជំរុញខេត្តដែលមានសក្តានុពលសេដ្ឋកិច្ច ឱ្យកាន់តែសខ្លាំងក្លា និងទាញឱ្យឃើញនូវលទ្ធភាពជាក់ស្តែងនៅលើដី។ ការវិនិយោគកន្លងទៅ និងទៅមុខទៀត ក្នុងការពង្រឹងខេត្តព្រះសីហនុ និងខេត្តជាប់សមុទ្រ ដែលមានផែនការមេយើងបានអនុវត្តន៍ ហើយឆ្នាំនេះ យើងបានអនុវត្តន៍ជំហានដំបូងយកខេត្តព្រះសីហនុ ជាគោលដើម្បីជំរុញការធ្វើឧស្សាហកម្ម ភស្តុភារកម្មនៅទីនោះ ព្រមទាំងបង្កើតការងារឱ្យបានច្រើនកន្លែង ។
សម្តេចបវរធិបតី នាយករដ្ឋមន្ត្រី បានថ្លែងយ៉ាងដូច្នេះថា ៖ «ប៉ុន្តែមិនមែនត្រឹមតែខេត្តព្រះសីហនុនោះទេ ឥឡូវខេត្តកំពត ខ្ញុំស៊ីញ៉េ ១ឆ្នាំជាងនេះ តំបន់សេដ្ឋកិច្ចពិសេស ២ ឬ ៣កន្លែង រួចទៅហើយ នៅខេត្តកំពត បានន័យថា សញ្ញា នៃការរីកលូតលាស់ នៃខេត្តកំពត មិនត្រឹមតែជាតំបន់ទេសចរណ៍នោះទេ ប៉ុន្តែជាឧស្សាហកម្ម ឥឡូវកំពុងសិក្សាធ្វើផែទឹកជ្រៅ និងការវិនិយោគរាប់ពាន់លានដុល្លារ ដើម្បីបង្កើតអេកូស៉ីសស្ទើម នៃការបង្កើតរោងចក្រមួយ តែខ្ញុំមិនទាន់បញ្ចេញទេ តែកំពុងចរចា» ។
បើតាមការលើកឡើងរបស់សម្តេចបវរធិបតី នាយករដ្ឋមន្ត្រី ពីការបង្កើងតំបន់សេដ្ឋកិច្ចពិសេសនេះ វានឹងធ្វើឲ្យដីនៅខេត្តកំពត ដែលស្ថិតនៅជិតតំបន់នោះ មានតម្លៃជាមិនខាន ។
សម្តេចបវរធិបតី ហ៊ុន ម៉ាណែត បានបន្តថា ការចរចាជាមួយភាគីអ្នកវិនិយោគ ដើម្បីបង្កើតរោងចក្រនៅខេត្តកំពត គឺដើម្បីផ្តល់ភាពងាយស្រួល ក្នុងការប្រើប្រាស់កំពង់ផែទឹកជ្រៅ នៅខេត្តកំពត ក្នុងការផលិត ផលិតផលនៅកម្ពុជា ខណៈមានរោងចក្រ ២ ឬ៣ រួចទៅហើយ បានដាក់ទុនវិនិយោគរួចហើយ ដែលមានទុនវិនិយោគជិត ១ពាន់លានដុល្លារ ។
បន្ថែមពីនេះ សម្តេចបវរធិបតី ហ៊ុន ម៉ាណែត បានបញ្ជាក់ថា ជាមួយគ្នានឹងការដាក់ទុនវិយោគនៅកម្ពុជា អ្នកវិនិយោគិន មានបំណងដាក់ទុនវិនិយោគពង្រីករោងចក្រឱ្យកាន់តែធំបន្ថែមទៀត លើទឹកដីខេត្តកំពត ដើម្បីធ្វើយ៉ាងណាទាញសក្តានុពល ដែលមានស្រាប់នៅកម្ពុជា។ ខណៈក្រុមហ៊ុន គឺមិនបានសន្យាមកបណ្តាក់ទុននោះទេ តែក្រុមហ៊ុនបើកដំណើរការរោងចក្រចំនួន២ នៅកម្ពុជារួចទៅហើយ សម្រាប់នាំផលិតផលទៅកាន់ទីផ្សារអឺរ៉ុប ដែលមានថវិកាជិត ១ពាន់លានដុល្លាររួចហើយ ។
សម្តេចបវរធិបតី ហ៊ុន ម៉ាណែត បានបញ្ជាក់ថា តាមរយៈស្ថាបនាផ្លូវជាតិប្រទាក់ក្រឡាគ្នាភ្ជាប់ទៅទិសនិរតី ព្រមទាំងការអនុញ្ញាតឱ្យបង្កើតតំបន់សេដ្ឋកិច្ចពិសេសនៅខេត្តកំពត ហើយការតភ្ជាប់ព្រែកជីកហ្វូណន-តេជោ នឹងធ្វើឱ្យខេត្តតាកែវ ទៅថ្ងៃមុខខេត្តតាកែវ មិនមែនមានតែបង្កង និងពងទាកូនទៀតនោះទេ ប៉ុន្តែ អាចក្លាយជាខេត្តដែលនាំចេញនូវផលិតផលឧស្សាហកម្ម និងកម្មន្តសាលកាន់តែច្រើនជាដើម ។
សម្តេចបវរធិបតី ហ៊ុន ម៉ាណែត ក៏បានប្រដូចការរៀបចំបណ្តាញសេដ្ឋកិច្ចកម្ពុជា ដូចទៅនឹងសរសៃឈាមរបស់មនុស្ស គឺត្រូវតែរត់ទៅគ្រប់កោសិកា ទើបរាងកាយរឹងមាំល្អ។ ដូច្នេះការអភិវឌ្ឍសេដ្ឋកិច្ច មិនមែនអភិវឌ្ឍតែនៅភ្នំពេញនោះទេ គឺត្រូវតែអភិវឌ្ឍនៅគ្រប់ខេត្ត ។
ទន្ទឹមនឹងនេះដែរ សម្ដេចបវរធិបតី នាយករដ្ឋមន្ដ្រី បានលើកឡើងថា ការដាក់ចេញនូវគោលនយោបាយអាទិភាពផ្សេងៗ របស់រាជរដ្ឋាភិបាល ទៅដល់វិនិយោគិននានាទាំងក្នុង និងក្រៅប្រទេស គឺបានទាក់ទាញកំណើនវិនិយោគជាច្រើនមកដាក់ការវិនិយោគដោយផ្ទាល់នៅកម្ពុជាក្នុងរយៈពេលជាង១ឆ្នាំមកនេះ។ ក្នុងរយៈពេលជាង៤០ឆ្នាំមកនេះ កម្ពុជាបានវិវត្តរីកចម្រើនលើគ្រប់វិស័យ ហើយមិនមែនរីកចម្រើនតែនៅរាជធានីភ្នំពេញប៉ុណ្ណោះទេ ប៉ុន្ដែបានរីកចម្រើននៅគ្រប់បណ្ដារាជធានី-ខេត្ត ដែលមានទាំងហេដ្ឋារចនាសម្ព័ន្ធ សាលារៀន មន្ទីរពេទ្យ និងជីវភាពរបស់ប្រជាពលរដ្ឋមានភាពធូរធារជាងមុន ៕
ចែករំលែកព័តមាននេះ