ទណ្ឌិតចំនួន២២នាក់ទទួលបានការបន្ធូរបន្ថយទោស៣ខែ និង៦ខែ
- បន្ទាយមានជ័យ
ខេត្តបន្ទាយមានជ័យ ៖ នៅថ្ងៃទី២៨ ខែមេសា ឆ្នាំ២០២៥ លោក ឃូ ពៅ អភិបាលរងខេត្ត បានអញ្ជើញជាអធិបតីភាពក្នុងពិធីប្រកាសព្រះរាជក្រឹត្យបន្ធូរបន្ថយទោស…
ខេត្តបន្ទាយមានជ័យ ៖ នៅថ្ងៃទី២៨ ខែមេសា ឆ្នាំ២០២៥ លោក ឃូ ពៅ អភិបាលរងខេត្ត បានអញ្ជើញជាអធិបតីភាពក្នុងពិធីប្រកាសព្រះរាជក្រឹត្យបន្ធូរបន្ថយទោស និងលើកលែងទោសក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំ២០២៥ ដោយមានការចូលរួមពីតំណាងស្ថាប័នតុលាការ នគរបាល នៅសាលប្រជុំពន្ធនាគារខេត្ត ស្ថិតក្នុងភូមិទំនប់ជ្រៃ សង្កាត់ទឹកថ្លា ក្រុងសិរីសោភ័ណ ។
លោក ឆង ឈឺន ប្រធានស្ដីទីពន្ធនាគារខេត្ត បានឱ្យដឹងថា ចំនួនជនត្រូវចោទដែលជាប់ឃុំឃាំងក្នុងពន្ធនាគារមានចំនួន ២ ៩៥៣នាក់(ស្រី ១៩០នាក់) ក្នុងនោះអនីតិជនចំនួន ៥៤៨នាក់(ស្រី ៥នាក់) ជនបរទេសចំនួន ៣១៦នាក់(ស្រី ៤៥នាក់) មានជនជាតិថៃ វៀតណាម ឥណ្ឌូណេស៊ី រុស្ស៊ី ចិន ចិនតៃវ៉ាន់ សិង្ហបុរី ឡាវ មីយ៉ាន់ម៉ា ឥណ្ឌា ម៉ាឡេស៊ី និងប្រេស៊ីល ។
ក្នុងឆ្នាំ២០២៥ អង្គភាពបានទទួលព្រះរាជក្រឹត្យបន្ធូរបន្ថយទោស និងលើកលែងទោស ដល់ទណ្ឌិតក្នុងឱកាសទិវាជ័យជម្នះ ៧ មករា ចំនួន១៥នាក់(ស្ត្រី ២នាក់) ក្នុងនោះបន្ធូរបន្ថយទោស៣ខែ ចំនួន ១៥នាក់(ស្ត្រី ២នាក់) ។
ទទួលព្រះរាជក្រឹត្យបន្ធូរបន្ថយទោស និងលើកលែងទោសដល់ទណ្ឌិតក្នុងឱកាសពិធីបុណ្យចូលឆ្នាំថ្មីប្រពៃណីជាតិចំនួន ២២នាក់(ស្ត្រី ២នាក់) ក្នុងនោះបន្ធូរបន្ថយទោស ៣ខែ ចំនួន ២០នាក់(ស្ត្រី ២នាក់) បន្ធូរបន្ថយទោស៦ខែ ចំនួន២នាក់ ។
ក្នុងនាមថ្នាក់ដឹកនាំរដ្ឋបាលខេត្ត លោក ឃូ ពៅ បានសម្តែងនូវការចូលរួមត្រេកអរ ចំពោះទណ្ឌិតដែលត្រូវបានបន្ធូរបន្ថយទោស ក្នុងឱកាសបុណ្យចូលឆ្នាំប្រពៃណីជាតិនេះ ។ លោកក៏បានណែនាំដល់បងប្អូនទណ្ឌិត ដែលត្រូវបន្ធូរបន្ថយទោសពេលនេះ ត្រូវបន្តកសាងខ្លួនឱ្យបានល្អ ដើម្បីទទួលបានការលើកលែងទោសជាស្ថាពរនៅពេលក្រោយទៀត ៕
ចែករំលែកព័តមាននេះ