ថៃរឹតបន្តឹងច្បាប់នាំចេញប្រឆាំ.ងទំនិញចិនបិទស្លាកផលិតផលខ្លួន នាំចេញទៅអាមេរិក
ប្រទេសថៃ ៖ យោងតាមប្រភពពីសារព័ត៌មានថៃ The Nation នៅថ្ងៃទី២៨ ខែមេសា ឆ្នាំ២០២៥ បានរាយការណ៍ថា រដ្ឋាភិបាលថៃកំពុងតែបង្កើនកិច្ចខិតខំប្រឹងប្រែង…
ប្រទេសថៃ ៖ យោងតាមប្រភពពីសារព័ត៌មានថៃ The Nation នៅថ្ងៃទី២៨ ខែមេសា ឆ្នាំ២០២៥ បានរាយការណ៍ថា រដ្ឋាភិបាលថៃកំពុងតែបង្កើនកិច្ចខិតខំប្រឹងប្រែង ដើម្បីទប់ស្កាត់ទំនិញរបស់ចិនដែលត្រូវបានគេបិទស្លាកក្លែងបន្លំជាទំនិញរបស់ថៃ ដើម្បីបញ្ចៀសការយកពន្ធគយនាំចូលដ៏ខ្ពស់ពីសហរដ្ឋអាមេរិក។
នាយកដ្ឋានពាណិជ្ជកម្មបរទេសរបស់ប្រទេសថៃ កំពុងតែទទួលយកការអនុម័តទាំងអស់ សម្រាប់ការនាំចេញមានគោលដៅទៅកាន់សហរដ្ឋអាមេរិក ហើយក៏បានពង្រីកបញ្ជីតាមដានផលិតផលមានហានិភ័យខ្ពស់រហូតដល់៦៥ប្រភេទបន្ថែមទៀត ស្របពេលដែលការពិភាក្សាជាមួយនឹងគយអាមេរិកកំពុងតែដំណើរការ ដើម្បីតម្រឹមការចាត់ថ្នាក់ផលិតផលឱ្យត្រឹមត្រូវ។
ចំណាត់ការដ៏សំខាន់នេះ ធ្វើឡើងបន្ទាប់ពីមានក្តីបារម្ភលើកឡើងដោយសហរដ្ឋអាមេរិកអំពីទំនិញរបស់ចិនត្រូវបានដាក់ស្លាកក្លែងបន្លំជាផលិតផលពីប្រទេសនៅក្នុងតំបន់អាស៊ីអាគ្នេយ៍ ខណៈពេលដែលប្រទេសថៃទទួលបានអតិរេកពាណិជ្ជកម្មជាមួយអាមេរិក និងមានឱនភាពខ្លាំងជាមួយប្រទេសចិន។
រដ្ឋាភិបាលថៃមានគោលបំណងទប់ស្កាត់ចន្លោះប្រហោងនេះពីការកេងប្រវ័ញ្ច ដែលអាចប៉ះពាល់ដល់ការនាំចេញទំនិញពិតប្រាកដរបស់ប្រទេសថៃ។ ជាក់ស្តែង នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ (Paetongtarn Shinawatra) បានប្រគល់ភារកិច្ចឱ្យនាយកដ្ឋានពាណិជ្ជកម្មបរទេសដឹកនាំវិធានការផ្ទៀងផ្ទាត់ថ្មី និងត្រួតពិនិត្យទំនិញមានហានិភ័យខ្ពស់ ដែលភាគច្រើនជាផលិតផលឧស្សាហកម្ម ជាមួយផែនការរយៈពេលវែងរួមមាន ការពិន័យកាន់តែតឹងរ៉ឹងសម្រាប់ក្រុមហ៊ុនដែលបង្ហាញប្រភពដើមទំនិញខុស។
ចំណាត់ការថ្មីៗនេះរបស់រដ្ឋាភិបាលថៃកើតឡើងប៉ុន្មានថ្ងៃ បន្ទាប់ពីទីភ្នាក់ងារគយកូរ៉េខាងត្បូង បានឱ្យដឹងកាលពីថ្ងៃទី២១ ខែមេសា ឆ្នាំ២០២៥ កន្លងទៅថា ប្រទេសកូរ៉េខាងត្បូងបានរកឃើញការកើនឡើងផលិតផលបរទេស ប៉ុន្តែក្លែងបន្លំបិទស្លាកផលិតផលកូរ៉េខាងត្បូង ឬ «Made in Korea» ដែលភាគច្រើនមកពីប្រទេសចិន ដើម្បីគេចពីពន្ធរបស់សហរដ្ឋអាមេរិក។ ដូចដែលត្រូវបានចេញផ្សាយពីទីភ្នាក់ងារសារព័ត៌មាន Reuters។
មន្ត្រីគយកូរ៉េខាងត្បូងបានអះអាងថា ខ្លួនបានរកឃើញផលិតផលបរទេសដែលក្លែងបន្លំជាផលិតផលកូរ៉េខាងត្បូងមានតម្លៃ ២៩,៥ពាន់លានវ៉ុន ឬស្មើនឹង ២០,៨១លានដុល្លារ នៅត្រីមាសទី១ ឆ្នាំនេះ ដោយ ៩៧% សម្រាប់នាំចេញទៅសហរដ្ឋអាមេរិក បន្ទាប់ពីការស៊ើបអង្កេតពិសេសកាលពីខែមុន។ នោះបើប្រៀបធៀបទៅនឹងការក្លែងបន្លំសរុបគិតជាទឹកប្រាក់ចំនួន ៣៤,៨ពាន់លានវ៉ុន ឬ ២៤,៤លានដុល្លារពេញមួយឆ្នាំ ២០២៤ ក្នុងនោះការនាំចេញទៅអាមេរិកមានចំនួន ៦២%។
ជាការឆ្លើយតបនឹងកំណើននៃការក្លែងបន្លំនេះ គយកូរ៉េខាងត្បូងបានបង្កើតក្រុមការងារពិសេសមួយ ដើម្បីទប់ស្កាត់ការក្លែងបន្លំ និងនាំចេញខុសច្បាប់ ហើយគ្រោងបង្កើតវិធានការឆ្លើយតបជាក់លាក់បន្ថែមទៀត ដើម្បីការពារក្រុមហ៊ុនក្នុងស្រុកផងដែរ។
ចាប់តាំងពីចូលកាន់តំណែងកាលពីខែមករា ឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសពន្ធកម្រិតខ្ពស់លើផលិតផល និងប្រទេសផ្សេងៗ ដែលបានចាប់ផ្តើមចូលជាធរមានកាលពីខែមីនាកន្លងទៅ។ មន្ត្រីកូរ៉េខាងត្បូងលើកឡើងថា កត្តានេះអាចនាំឱ្យមានការកើនឡើងការក្លែងបន្លំពីបណ្តាក្រុមហ៊ុនបរទេស ពិសេសក្រុមហ៊ុននៅប្រទេសចិនជិតខាងខ្លួន ដើម្បីបិទស្លាកសញ្ញាផលិតផលរបស់ខ្លួនជាផលិតផលកូរ៉េខាងត្បូងដែលជាប្រទេសសម្ព័ន្ធមិត្តដ៏សំខាន់ និងមានកិច្ចព្រមព្រៀងពាណិជ្ជកម្មសេរីជាមួយអាមេរិក ដើម្បីគេចពីពន្ធ និងបទប្បញ្ញត្តិនៅទីនោះ។
លោក ត្រាំ បានដាក់ពន្ធ ២៥% លើកូរ៉េខាងត្បូងក្នុងខែនេះ ដែលក្រោយមកត្រូវបានប្រកាសផ្អាករយៈពេល៣ខែ ប៉ុន្តែអាមេរិកបានដាក់ពន្ធដល់ ១៤៥% លើប្រទេសចិនក្នុងសកម្មភាពពន្ធសងសឹកគ្នាទៅវិញទៅមក ដែលបណ្តាអ្នកសេដ្ឋកិច្ចបាននិយាយថាបានកាត់ផ្តាច់ពាណិជ្ជកម្មរវាងប្រទេសសេដ្ឋកិច្ចធំជាងគេទាំងពីរនេះរបស់ពិភពលោក៕
ចែករំលែកព័តមាននេះ