ខេត្តតាកែវ ៖ រហូតមកដល់ម៉ោង៩ព្រឹកថ្ងៃ២៧ មេសា ២០២៥ សមត្ថកិច្ចបានគ្រប់គ្រងស្ថានការណ៍បាន ដោយបានធ្វើការពន្លត់ភ្លើងឱ្យរលត់ទាំងស្រុងក្នុងសកម្មភាពជួយអន្តរាគមន៍ពន្លត់អគ្គិភ័យលេបត្របាក់មហោស្រពខេត្ត ។ ក្នុងការធ្វើអន្តរាគមន៍ពន្លត់ភ្លើងឆេះមហោស្រពខេត្តនេះ គេឃើញលោកស្នងការរង…
ខេត្តតាកែវ ៖ រហូតមកដល់ម៉ោង៩ព្រឹកថ្ងៃ២៧ មេសា ២០២៥ សមត្ថកិច្ចបានគ្រប់គ្រងស្ថានការណ៍បាន ដោយបានធ្វើការពន្លត់ភ្លើងឱ្យរលត់ទាំងស្រុងក្នុងសកម្មភាពជួយអន្តរាគមន៍ពន្លត់អគ្គិភ័យលេបត្របាក់មហោស្រពខេត្ត ។ ក្នុងការធ្វើអន្តរាគមន៍ពន្លត់ភ្លើងឆេះមហោស្រពខេត្តនេះ គេឃើញលោកស្នងការរង ហ៊ុន ហែម ទទួលផែនអគ្គិភ័យខេត្ត លោកឧត្តមសេនីយ៍ សេង មហា មេបញ្ជាការកងរាជអាវុធហត្ថខេត្ត លោកឧត្តមសេនីយ៍ នាង សុភារ៉ា មេបញ្ជាការតំបន់ប្រតិបត្តិការសឹករង ។
លោកវរសេនីយ៍ឯក ឥន មណ្ឌល អធិការនគរបាលក្រុងដូនកែវបានឱ្យដឹងថា មុនពេលមានការឆេះនេះ គឺខាងមជ្ឈមណ្ឌលសាលាភាសាអង់គ្លេស អាយឌា ធ្វើកម្មវិធីប្រគល់សញ្ញាបត្រទៅឱ្យសិស្សរបស់គេចំនួនជាង១៤០នាក់ ។
លោកអធិការនគរបាលក្រុងបានបន្តទៀតថា អគ្គិភ័យនេះមកពីការឆ្លងចរន្តភ្លើងនៅពេលកម្មវិធីកំពុងចាប់ផ្តើមរាំរបាំជូនពរ ក៏ស្រាប់តែមានភ្លើងឆេះចេញពីដំបូលខាងលើ និងបានធ្វើឲ្យលោកគ្រូ-អ្នកគ្រូ និងសិស្សដែលត្រៀមទទួលសញ្ញាបត្រមានការភ្ញាក់ផ្អើលឆោឡោ និងបាននាំគ្នារត់ជាន់ជើងគ្នា ចេញពីក្នុងមហោស្រពមកខាងក្រៅគ្រប់គ្នា ។ ទោះបីជាបែបណាក្តី មិនបណ្ដាលឲ្យមានគ្រោះថ្នាក់ដល់លោកគ្រូ-អ្នកគ្រូ ឬសិស្សដែលមកទទួលសញ្ញាបត្រឡើយ ។
លោកអធិការនគរបាលក្រុងដូនកែវបានបញ្ជាក់បន្ថែមទៀតថា ចំពោះការខូចខាតដោយភ្លើងឆេះនេះ គឺបានបំផ្លាញសម្ភារៈគ្រឿងក្នុងអស់ទាំងស្រុងនៅសល់តែក្រណាត់តែងលម្អនៅមាត់ច្រកចូលពីខាងមុខប៉ុណ្ណោះ ។
លោកវរសេនីយ៍ឯក ហ៊ុន ហែម នាយការិយាល័យពន្លត់អគ្គិភ័យខេត្តបានឱ្យដឹងថា រថយន្តពន្លត់អគ្គិភ័យដែលមកជួយអន្តរាគមន៍ពន្លត់ភ្លើងឆេះមហោស្រពនេះ គឺមានរថយន្តពន្លត់អគ្គិភ័យចំនួន៧គ្រឿង ក្នុងនោះរថយន្តរបស់ស្នងការដ្ឋាននគរបាលខេត្តកែវចំនួន២គ្រឿង រថយន្តនគរបាលស្រុកត្រាំង១គ្រឿង រថយន្តស្រុកត្រាំកក់១គ្រឿង រថយន្តស្រុកសំរោង១គ្រឿង រថយន្តស្រុកព្រៃកប្បាស១គ្រឿង និងរថយន្តឡឥដ្ឋ១គ្រឿង ។
បើតាមមន្ត្រីនៃមន្ទីរវប្បធម៌ និងវិចិត្រសិល្បៈខេត្តតាកែវ ដែលជាអង្គភាពគ្រប់គ្រងមហោស្រពនេះបានឲ្យដឹងថា សាលមហោស្រពខេត្តតាកែវនេះ បានសាងសង់ឡើងនៅក្នុងឆ្នាំ១៩៦៨ រហូតមកដល់ឆ្នាំ២០២៥នេះ គឺមានអាយុកាល៥៧ឆ្នាំមកហើយ និងបានធ្វើការជួសជុលកែលម្អបន្តបន្ទាប់ ។ មហោស្រពនេះ មានទំហំ១៦ម៉ែត្រគុណ៤០ម៉ែត្រ ដំបូលប្រក់ក្បឿង និងជញ្ជាំងបេតុង ។
សរុបសម្ភារៈខូចខាតរួមមាន ម៉ាស៊ីនត្រជាក់៨គ្រឿង កុំព្យូទ័រ១គ្រឿង ម៉ាស៊ីន Magecter ១គ្រឿង អំភ្លី៦គ្រឿង ទូដាក់អីវ៉ាន់១ កៅអី២៥០ ផ្ទាំងបញ្ជាំងស្លាយ១ផ្ទាំង ស្ទីកឃ័រ១៥គ្រាប់ ទូរទស្សន៍២គ្រឿង កាមេរ៉ា៦គ្រឿង អង្ករ២បាវ និងកង្ហារ៣គ្រឿង និយាយរួម គឺគ្រឿងក្នុងទាំងប៉ុន្មានក្លាយជាចំណីព្រះអគ្គីទាំងស្រុង ៕
ចែករំលែកព័តមាននេះ