រាជធានីភ្នំពេញ ៖ ឃ្លាំងស្តុកគ្រឿងម៉ាស៊ីនត្រជាក់ ដែលម្ចាស់ចាក់សោទុកចោលត្រូវបានអគ្គិភ័យឆេះដោយសារកើតចេញពីឆ្លងចរន្តអគ្គិសនី ។ ហេតុការណ៍នេះកើតឡើង កាលពីវេលាសៀលថ្ងៃទី២៤ ខែមេសា ឆ្នាំ២០២៥ នៅចំណុចឃ្លាំងមួយកន្លែងនៅក្រោយវត្តគល់ទទឹង…
រាជធានីភ្នំពេញ ៖ ឃ្លាំងស្តុកគ្រឿងម៉ាស៊ីនត្រជាក់ ដែលម្ចាស់ចាក់សោទុកចោលត្រូវបានអគ្គិភ័យឆេះដោយសារកើតចេញពីឆ្លងចរន្តអគ្គិសនី ។
ហេតុការណ៍នេះកើតឡើង កាលពីវេលាសៀលថ្ងៃទី២៤ ខែមេសា ឆ្នាំ២០២៥ នៅចំណុចឃ្លាំងមួយកន្លែងនៅក្រោយវត្តគល់ទទឹង តាមបណ្តោយផ្លូវបេតុង ដែលស្ថិតក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋដើរកាត់ចំណុចនោះ បានអោយដឹងថា មុនកើតហេតុ គាត់បានធុំក្លិនឈ្ងៀមឆេះជ័រ ។ ខណៈនោះ គាត់ក៏រត់ទៅមើលពីចំហៀងឃ្លាំង តែមិនឃើញអ្វីឡើយ ។ លុះដើរទៅមុខបានបន្តិច ក៏ស្រាប់តែឮសំឡេងផ្ទុះទើបបង្កការឆោឡោ ថា មានការផ្ទុះសេខ្សែភ្លើងចេញពីខាងក្នុងឃ្លាំង ។
ភ្លាមៗគាត់ប្រញាប់ប្រញាល់រត់ទៅផ្ទះ ដើម្បីប្រាប់អ្នកជិតខាងអោយជួយទាក់ទងសមត្ថកិច្ច ដើម្បីចេញរថយន្តមកពន្លត់ឃ្លាំងខាងលើនេះកុំអោយមានការរាលដាលកាន់តែខ្លាំង ។
លោក ចេង មុន្នីរ៉ា អភិបាលខណ្ឌច្បារអំពៅ បានបញ្ជាអោយលោក ញាណ ច័ន្ទសោភា អភិបាលរងខណ្ឌ ដឹកនាំកម្លាំង រួមរថយន្តពន្លត់អគ្គីភ័យខណ្ឌច្បារអំពៅ ចេញជួយអន្តរាគមភ្លាមៗ ។
ចំពោះការឆាបឆេះនេះបានបណ្តាលអោយផ្នែកខាងក្រោយនៃឃ្លាំងស្តុកគ្រឿងម៉ាស៊ីនត្រជាក់ឆេះអស់ក្រដាសឡាំងមួយចំនួនធំ និងបានប្រើប្រាស់រថយន្តពន្លត់របស់សាលាខណ្ឌ ០១គ្រឿង , រថយន្តបុរីប៉េង ហួតចំនួន០៣គ្រឿង បាញ់អោយរលត់ជាស្ថាពរ ។ រីឯមូលហេតុ កម្លាំងជំនាញបានសន្និដ្ឋានថា បណ្តាលមកពីឆ្លងចរន្តអគ្គិសនី ៕
ចែករំលែកព័តមាននេះ