ខេត្តព្រៃវែង ៖ ប្រជាពលរដ្ឋជាង២០០គ្រួសារ នៅភូមិស្ទឹងសន្តិភាព ហៅភូមិអាំងកុក ឃុំអ្នកលឿង ស្រុកពាមរក៍ កំពុងតែសប្បាយរីករាយជាខ្លាំង ដោយសារតែអាជ្ញាធរស្រុកបានដាក់គ្រឿងចក្រជាច្រើនគ្រឿងធ្វើផ្លូវជូនដល់អ្នកភូមិ ដែលផ្លូវនេះនឹងមានកម្ពស់ខ្ពស់ផុតពីទឹកអាចឲ្យប្រជាពលរដ្ឋធ្វើដំណើរទៅមកបានគ្រប់ពេលវេលា…
ខេត្តព្រៃវែង ៖ ប្រជាពលរដ្ឋជាង២០០គ្រួសារ នៅភូមិស្ទឹងសន្តិភាព ហៅភូមិអាំងកុក ឃុំអ្នកលឿង ស្រុកពាមរក៍ កំពុងតែសប្បាយរីករាយជាខ្លាំង ដោយសារតែអាជ្ញាធរស្រុកបានដាក់គ្រឿងចក្រជាច្រើនគ្រឿងធ្វើផ្លូវជូនដល់អ្នកភូមិ ដែលផ្លូវនេះនឹងមានកម្ពស់ខ្ពស់ផុតពីទឹកអាចឲ្យប្រជាពលរដ្ឋធ្វើដំណើរទៅមកបានគ្រប់ពេលវេលា ទោះបីជាក្នុងរដូវទឹកឡើងក៏ដោយ ។
អ្នកភូមិអាំងកុកបានឱ្យដឹងថា ទោះបីភូមិរបស់គាត់ជាទីទួលមិនមានទឹកលិចក៏ដោយ ប៉ុន្តែផ្លូវចូលទៅកាន់ភូមិរបស់គាត់ជាផ្លូវដី និងទំនាប ដល់ពេលខែវស្សាតួផ្លូវបែកភក់ពិបាកធ្វើដំណើរ ហើយនៅរដូវទឹកឡើង ផ្លូវទាំងមូលត្រូវទឹកលិច ចង់ទៅណាមកណា ត្រូវធ្វើដំណើរដោយជិះទូក គឺពិបាកខ្លាំងណាស់ ពិសេសក្មេងៗសិស្សសាលា និងអ្នកជំងឺឈឺថ្កាត់ពេលយប់ព្រលប់ ។
លោក ស្វាយ សំអុល អនុប្រធានភូមិស្ទឹងស្លូត បានឱ្យដឹងថា ផ្លូវនេះមិនត្រឹមតែអ្នកភូមិអាំងកុកជាង ២០០គ្រួសារប៉ុណ្ណោះទេ អ្នកភូមិស្ទឹងស្លូតជាច្រើនគ្រួសារក៏ប្រើប្រាស់ផ្លូវនេះដែរ ។ដោយមើលឃើញថា ផ្លូវនេះត្រូវទឹកជំនន់ជន់លិចរាល់ឆ្នាំ ធ្វើឲ្យប្រជាពលរដ្ឋមានការលំបាកក្នុងការធ្វើដំណើរ ហើយក៏ស្របតាមសំណូមពររបស់ប្រជាពលរដ្ឋផងនោះ ទើបលោក កែវពិសី អភិបាលស្រុកពាមរក៍ បានស្វះស្វែងកៀរគរប្រមូលថវិកា យកមកជួយកសាងផ្លូវនេះជូនប្រជាពលរដ្ឋ ។
តាមគម្រោង ផ្លូវនេះមានបណ្ដោយប្រវែង ១ ០៤០ម៉ែត្រ កម្ពស់ ២ម៉ែត្រ ទទឹងបាតក្រោម ១២ម៉ែត្រ និងខ្នងលើ ៦ម៉ែត្រ ជាប្រភេទផ្លូវក្រាលខ្សាច់ភ្នំ ដោយចាប់ផ្ដើមធ្វើនៅដើមខែមេសា ឆ្នាំ២០២៥ ហើយគ្រោងនឹងបញ្ចប់ការកសាងនៅមុនរដូវទឹកឡើងឆ្នាំនេះ ។ អ្នកភូមិស្ទឹងសន្តិភាព ហៅភូមិអាំងកុកបញ្ជាក់ថា ផ្លូវមួយខ្សែនេះតភ្ជាប់ពីផ្លូវជាតិលេខ១ រហូតទៅដល់ដងទន្លេតូច មានប្រវែង ៣គីឡូម៉ែត្រ ។
ពេលនេះ ដោយសារតែថវិកាមានកំណត់ អាជ្ញាធរជួយកសាងផ្លូវនេះបានតែប្រវែង ១ ០៤០ម៉ែត្រប៉ុណ្ណោះ នៅសល់ប្រមាណ២គីឡូម៉ែត្រទៀត។ដូច្នេះ ពួកគាត់ស្នើសុំឲ្យអាជ្ញាធរស្រុកក៏ដូចជាខេត្ត និងមន្ត្រីជំនាញពាក់ព័ន្ធ សូមជួយកសាងបន្តបង្ហើយផ្លូវដែលនៅសល់ និងស្នើសុំកសាងផ្លូវនេះជាប្រភេទផ្លូវបេតុងតែម្ដង ដើម្បីប្រើប្រាស់បានយូរអង្វែង ៕
ចែករំលែកព័តមាននេះ