ទាហានម្នាក់ប្រើហិ.ង្សាលើស្ត្រីមេម៉ាយក្នុងវង់ផឹ.ក ខឹ.ងរឿងបា.ត់ស្រា១ដប
- សៀមរាប
ខេត្តសៀមរាប៖ មន្ត្រីយោធា ស័ក្តិ ១ ម្នាក់ ជម្លោះរឿងបាត់ស្រា ១ ដប ហ៊ានប្រើហិង្សាលើស្ត្រីមេម៉ាយ ថា…
ខេត្តសៀមរាប៖ មន្ត្រីយោធា ស័ក្តិ ១ ម្នាក់ ជម្លោះរឿងបាត់ស្រា ១ ដប ហ៊ានប្រើហិង្សាលើស្ត្រីមេម៉ាយ ថា លួចស្រា ខណៈកំពុងផឹកស៊ីក្នុងកម្មវិធីខួបកំណើតកូនអភិបាលរងស្រុកពួក រហូតមកដល់ថ្ងៃទី ២៤ ខែមេសា ឆ្នាំ២០២៥ នេះគេនៅពុំទាន់ឃើញក្រសួងការពារជាតិចេញសេចក្ដីវិធានការណា មួយទៅលើមន្ត្រីយោធាដែលបានប្រព្រឹត្តអំពើហិង្សាទៅលើស្ត្រីមួយរូបបណ្ដាលឱ្យរបួសនោះនៅឡើយទេ ប៉ុន្តែត្រូវបាន កម្លាំងមូលដ្ឋានកងរាជអាវុធហត្ថស្រុកពួក កោះហៅ មកធ្វើ ការសម្របសម្រួល គ្នារួចរាល់ហើយ នៅថ្ងៃទី២៣ ខែ៤នេះ។
បើតាមសេចក្ដីបំភ្លឺរបស់រដ្ឋបាលស្រុកពួក នៅថ្ងៃទី២១ ខែ មេសា ឆ្នាំ២០២៥ បានបញ្ជាក់ថា ការប្រើអំពើហិង្សាពី សំណាក់មន្ត្រីយោធាទៅលើស្ត្រីមេម៉ាយរូបនោះ នៅក្នុងកម្មវិធីខួបកំណើតមួយរបស់អភិបាលរងស្រុកពួក គឺផ្ដើមឡើយចេញពីការបាត់ស្រា១ដប ដោយមន្ត្រីយោធារូបនោះចោទទៅស្ត្រីមេម៉ាយម្នាក់ថា លួចហើយក៏ត្រូវអំពើហិង្សាតែម្ដង។
អាជ្ញាធរស្រុកពួកបានបញ្ជាក់ថា ករណីហឹង្សានេះបានកើត ឡើងកាលពីថ្ងៃទី២០ ខែមេសា ឆ្នាំ២០២៥ មានផេកហ្វេស ប៊ុក ឈ្មោះ សៀមរាបប៉ុស្តិ៍ បានចុះផ្សាយថា នៅស្រុកពួក ខេត្តសៀមរាប មានបុរសម្នាក់ ជាមន្ត្រីយោធា រងការរិះគន់ប្រើអំពើហិង្សាលើស្ត្រីមេម៉ាយ ក្នុងវង់ផឹកស៊ី យ៉ាងព្រៃផ្សៃ ស្ថិត នៅគេហដ្ឋានរបស់លោកអភិបាលរងស្រុកពួក ក្នុងកម្មវិធីខួបកំណើតកូន ក្នុងភូមិប្រឡាយ ឃុំខ្នាត ស្រុកពួក ខេត្តសៀមរាប។
ពាក់ព័ន្ធនឹងករណីខាងលើនេះដែរ រដ្ឋបាលស្រុកពួក សូមធ្វើការជម្រាប ជូនសាធារណៈជនដូចខាងក្រោម៖
១.ចំពោះករណីប្រព្រឹត្តអំពើហិង្សានេះគឺផ្តើមចេញ ពីទំនាស់ពាក្យសម្តីរឿងបាត់ (ស្រា១ដប) រវាងឈ្មោះ ប៊ូ ហ៊ា ភេទប្រុស អាយុ ៣០ឆ្នាំ មុខរបរមន្ត្រីយោធា ដោយចោទថា ឈ្មោះ សា ខាវី ជាស្ត្រីមេម៉ាយ បានលួច ស្រារបស់ខ្លួន រហូតដល់កើត ឡើងជាអំពើហិង្សា នៅគេហដ្ឋានរបស់លោកអភិបាល រងស្រុកពួក ក្នុងកម្មវិធីខួបកំណើតកូន ស្ថិតនៅភូមិប្រឡាយ ឃុំខ្នាត ស្រុកពួក ខេត្តសៀមរាប ដែលរៀបចំឡើងជាលក្ខណៈគ្រួសារ។
២.ករណីអំពើហិង្សានេះ គឺកើតឡើងរវាងបុគ្គល និងបុគ្គល មិនពាក់ព័ន្ធនឹង លោកអភិបាលរង ស្រុកពួកទេ ដោយសារនៅក្នុងហេតុការណ៍នោះ លោកអភិបាលរងស្រុកពួក មិនបាននៅគេហដ្ឋានទេ ដោយលោកជាប់រវល់ចូលរួមកម្មវិធី១ ទៀត នៅក្នុងក្រុងសៀមរាប តាំងពីម៉ោង ៥ល្ងាច រហូតដល់ម៉ោង ១១យប់ ទើបត្រឡប់មកគេហដ្ឋានវិញ។ លុះព្រឹកឡើងថ្ងៃបន្ទាប់ ភរិយាបានប្រាប់ពីហេតុការណ៍ឱ្យលោកបានដឹង និងប្រាប់ថា ឈ្មោះ សា ខាវី ដែលជាស្ត្រីរងគ្រោះ បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលខ្នាត។
ចំពោះករណីនេះ លោក គិតថា ជាសមត្ថកិច្ចរបស់មន្ត្រីនគរ បាលយុត្តិធម៌ ក្នុងការកសាងសំណុំរឿងតាមនីតិវិធីច្បាប់ ហើយលោកក៏មិនបានធ្វើការសួរនាំ ឬអន្តរាគមន៍អ្វីឡើយចំពោះករណីហិង្សានេះ។ រីឯការលើកឡើងថា ស្រា១ដបមានតម្លៃរាប់ពាន់ដុល្លារ គឺមិនមែនជាការពិតនោះទេ ដែលស្រានោះម៉ាកEsprit de Pavie ផលិតឆ្នាំ២០១៨ មានតម្លៃប្រហែលជាង ១០ដុល្លារតែប៉ុណ្ណោះ។
៣.ពាក់ព័ន្ធករណីនេះ រដ្ឋបាលស្រុកពួក បានជំរុញឱ្យអធិការដ្ឋាននគរបាលស្រុក និងប៉ុស្តិ៍នគរបាល រដ្ឋបាលខ្នាត បន្តនីតិវិធីករណីនេះឱ្យបានលឿនបំផុត ប៉ុន្តែខាងកម្លាំងអធិការដ្ឋាននគរបាល ស្រុកពួក មិនបានដោះស្រាយទេ ព្រោះមន្ត្រីយោធា ប្រគល់ឱ្យកម្លាំង មូលដ្ឋានកងរាជអាវុធហត្ថស្រុកពួក ជាអ្នកដោះស្រាយវិញ។
បច្ចុប្បន្ន មន្ត្រី យោធា និងស្ត្រីរងគ្រោះ ត្រូវបានបញ្ចប់ក្នុងវិវាទទំនាស់ពាក្យសម្តី នៅក្នុងកម្មវិធី ផឹកស៊ី ខួបកំណើតកូនអភិបាលរងស្រុកពួក រួចរាល់អស់ហើយ ខណៈមន្ត្រីយោធា ក្រោយស្វាងស្រាបានសុំទោសទៅលើស្ត្រីមេម៉ាយដែលជាជនរងគ្រោះ ព្រោះអ្នកទាំង២ ត្រូវជាប់សាច់ឈាម និងគ្នាផង ។ នេះបើតាមពាក្យសម្តីរបស់មន្ត្រីកងរាជអាវុធហត្ថ មូលដ្ឋានស្រុកពួក ប្រាប់ភ្នាក់ងារកោះសន្តិភាព នៅល្ងាចថ្ងៃទី២៤ ខែមេសាឆ្នាំ២០២៥ នេះ ។
ព័ត៌មានបន្ថែមនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ