ទីក្រុងកៀវ៖ កាលពីយប់មិញ រុស្ស៊ីវាយប្រហារយ៉ាងខ្លាំងក្លាទៅលើប្រទេសអ៊ុយក្រែន។ គ្រាន់តែនៅរដ្ឋធានីកៀវ រុស្ស៊ីវាយប្រហារផ្គួបគ្នាដោយយន្តហោះដ្រូន និងមីស៊ីលបណ្ដាលឱ្យស្លាប់មនុស្សយ៉ាងតិច៩នាក់ និងរបួសជាង៧០នាក់។ កាលពីល្ងាចថ្ងៃពុធ យន្តហោះដ្រូនរបស់រុស្ស៊ីក៏បានបាញ់ត្រូវចំរថយន្តបឺសដឹកកម្មករអណ្ដូងរ៉ែបណ្ដាលឱ្យស្លាប់៩នាក់ដូចគ្នា។
មេដឹកនាំអ៊ុយក្រែន លោកហ្សេឡិនស្គី ដែលបំពេញទស្សនកិច្ចនៅអាហ្វ្រិកខាងត្បូងសុខៗត្រូវតែបង្ខំចិត្តវិលត្រឡប់ទៅមាតុភូមិវិញទាំងប្រញាប់ប្រញាល់ដើម្បីគ្រប់គ្រងសភាពការណ៍ដែលកំពុងពុះកញ្ជ្រោល។ លោកបង្ហោះសារនៅលើបណ្ដាញតេឡេក្រាមថាបន្ទាប់ពីជួបពិភាក្សាជាមួយប្រធានាធិបតីអាហ្វ្រិកខាងត្បូងរួច លោកនឹងវិលត្រឡប់ទៅទីក្រុងកៀវជាបន្ទាន់។
កងទ័ពអ៊ុយក្រែនថ្លែងថារុស្ស៊ីវាយប្រហារដោយយន្តហោះដ្រូន និងមីស៊ីលផ្លោង។ អ៊ុយក្រែនចាប់បានរូបភាពយន្តហោះដ្រូនរុស្ស៊ីយ៉ាងតិច៤៥គ្រឿង។ នៅតំបន់ខឺសុន រុស្ស៊ីវាយប្រហារស្លាប់មនុស្សម្នាក់ និងរបួស៩នាក់។ នៅរដ្ឋធានីកៀវ មនុស្ស៤២នាក់រងរបួសធ្ងន់ត្រូវបញ្ជូនទៅមន្ទីរពេទ្យជាបន្ទាន់។ ក្រុមអ្នកជួយសង្គ្រោះបន្តស្វែងរកមនុស្សជាច្រើននាក់ដែលកប់នៅក្នុងគំនរបាក់បែកនៃអគារ។
នៅទីតាំងអគារជនស៊ីវិលមួយកន្លែងដែលត្រូវមីស៊ីលរបស់រុស្ស៊ីវាយប្រហារសឹងតែក្លាយជាផេះ គេឃើញថាក្រុមអ្នកជួយសង្គ្រោះត្រូវបង្ខំចិត្តរើកកាយគំនរបាក់បែកដោយដៃទទេ។ គេទទួលដំណឹងថាមានភ្លើងឆេះអគាររបស់ជនស៊ីវិលជាច្រើនកន្លែង។ ការវាយប្រហារនោះចាប់ផ្ដើមពីម៉ោង១រំលងអធ្រាត្រ និងវាយចំទីតាំងជនស៊ីវិលយ៉ាងតិច៥កន្លែងនៅរដ្ឋធានីកៀវ។
លោកទៅអាហ្វ្រិកខាងត្បូងលើកនេះដើម្បីបញ្ចុះបញ្ចូលឱ្យប្រទេសនេះគាំទ្រកិច្ចខិតខំប្រឹងប្រែងបញ្ចប់សង្គ្រាម។ ករណីវាយប្រហារទីក្រុងកៀវកាលពីយប់មិញធ្វើឡើងតែប៉ុន្មានម៉ោងប៉ុណ្ណោះបន្ទាប់ពីដំណើរការចរចាហាក់ដូចជានៅទ្រឹង១កន្លែង។ លោកត្រាំហាក់ដូចជាផ្ទុះកំហឹងយ៉ាងខ្លាំង។ សេតវិមានថាលោកត្រាំហាក់ដូចជាអស់ការអត់ធ្មត់តទៅទៀតបន្ទាប់ពីលោកហ្សេឡិនស្គីប្រឆាំងដាច់ខាតនឹងផែនការរបស់ត្រាំដែលចង់កាត់ទឹកដីគ្រីម៉េទៅឱ្យរុស្ស៊ីដោយស្របច្បាប់ជាថ្នូរនឹងសន្តិភាព។
ត្រាំបង្ហោះសារនៅលើបណ្ដាញសង្គមថាលោកហ្សេឡិនស្គីចង់អូសបន្លាយអំពើកាប់សម្លាប់ឱ្យកាន់តែវែងឆ្ងាយតទៅមុខទៀត។ គាត់មិនព្រមទទួលស្គាល់តំបន់គ្រីម៉េជាទឹកដីរុស្ស៊ីទេ។ ក្រោយមក លោកត្រាំថ្លែងបន្ថែមទៀតថាលោកហ្សេឡិនស្គីពិបាកនិយាយគ្នាជាងរុស្ស៊ីទៅទៀត។ លោកហ្សេឡិនស្គីធ្លាប់និយាយជាច្រើនដងហើយថាការប្រកាសទទួលស្គាល់ទឹកដីដែលបានបាត់បង់ជារបស់រុស្ស៊ីដោយស្របច្បាប់ជាការដើរហួសបន្ទាត់ក្រហម៕
ចែករំលែកព័តមាននេះ