ខេត្តមណ្ឌលគិរី ៖ ដើម្បីជួយសម្រាលការលំបាករបស់ប្រជាពលរដ្ឋរស់នៅឃុំចំនួនពីរ គឺឃុំក្រង់តេះ និងឃុំពូជ្រៃ ស្រុកពេជ្រាដា អាជ្ញាធរខេត្តមណ្ឌលគិរី បានបើកការដ្ឋានសាងសង់ផ្លូវលំមួយខ្សែ ប្រវែងមួយម៉ឺនប្រាំរយម៉ែត្រដែលមានស្ថានភាពខូចខាតធ្ងន់ ខណៈរដូវវស្សាកាន់តែខិតជិតចូលមកដល់…
ខេត្តមណ្ឌលគិរី ៖ ដើម្បីជួយសម្រាលការលំបាករបស់ប្រជាពលរដ្ឋរស់នៅឃុំចំនួនពីរ គឺឃុំក្រង់តេះ និងឃុំពូជ្រៃ ស្រុកពេជ្រាដា អាជ្ញាធរខេត្តមណ្ឌលគិរី បានបើកការដ្ឋានសាងសង់ផ្លូវលំមួយខ្សែ ប្រវែងមួយម៉ឺនប្រាំរយម៉ែត្រដែលមានស្ថានភាពខូចខាតធ្ងន់ ខណៈរដូវវស្សាកាន់តែខិតជិតចូលមកដល់ ដែលពិធីនេះបានធ្វើឡើងនាព្រឹកថ្ងៃទី២៤ ខែមេសា ឆ្នាំ២០២៥ នៅភូមិពូរ៉ាប៉េត ឃុំក្រង់តេះ ។
លោក ជាក់ ម៉េងហ៊ាង អភិបាលរងខេត្តមណ្ឌលគិរីមានប្រសាសន៍ថា ក្នុងនិតិកាលទី៧នេះរាជរដ្ឋាភិបាល ក្រោមការដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានយកចិត្តទុកដាក់លើគ្រប់វិស័យ ក្នុងនោះ ប្រព័ន្ធគនាគមន៍ត្រូវបានអភិវឌ្ឍន៍ខ្វាត់ខ្វែង ពីរាជធានីទៅតាមបណ្តាខេត្ត ពីទីប្រជុំជនទៅគ្រប់ជនបទនានាទូទាំងប្រទេស ។
លោកអភិបាលរងខេត្តបន្តថា ការស្ថាបនាឡើងវិញនូវកំណាត់ផ្លូវក្រាលគ្រោះក្រហម ដែលជាផ្លូវអន្តរឃុំខាងលើនេះ គឺបានជួយស្ទើរគ្រប់ផ្នែក ក្នុងជីវភាពប្រចាំថ្ងៃដល់ប្រជាពលរដ្ឋ ក្នុងមូលដ្ឋាន ព្រោះនៅពេលដែលមានផ្លូវធ្វើដំណើរបានស្រួល បងប្អូនប្រជាពលរដ្ឋអាចដឹកជញ្ជូនកសិផលរបស់ខ្លួន ឬឈ្មួញធំៗអាចចេញចូលរកទិញ ផលិតផលដែលអ្នកភូមិដាំដុះបានក្នុងតម្លៃថ្លៃ។
ក្រៅពីសកម្មភាពការដឹកជញ្ជូនផ្លូវមួយខ្សែនេះ ថែមទាំងបានជួយដល់វិស័យអប់រំ និងសុខាភិបាលផងដែរ ដោយសិស្សានុសិស្សអាចទៅរៀនសូត្របានងាយស្រួល ចំណែកនៅពេលមានអ្នកជំងឺត្រូវបញ្ជូនទៅមន្ទីរពេទ្យក៏បានទាន់ពេលវេលា ។ ដោយគុណប្រយោជន៍ផ្លូវមួយខ្សែនេះបានជួយសម្រួលក្នុងជីវភាពរបស់អ្នកភូមិយ៉ាងច្រើនអនេក លោក ជាក់ ម៉េងហ៊ាង បានសំនូមពរដល់ បងប្អូនប្រជាពលរដ្ឋ ត្រូវចូលរួមថែរក្សាការពារផ្លូវឲ្យបានប្រើប្រាស់យូរអង្វែង មិនត្រូវកាប់កាយគាស់លើដងផ្លូវ ដែលនាំឲ្យផ្លូវងាយប្រឈម ការខូចខាតវិញឡើយ។
លោកអភិបាលរងខេត្តក៏បានក្រើនរំឮកដល់បងប្អូនប្រជាពលរដ្ឋទាំងអស់ ត្រូវយកចិត្តទុកដាក់ថែរក្សាសុខភាពក្រុមគ្រួសារឲ្យបានល្អ ដ្បិតភ្លៀងបានបន្តធ្លាក់ស្ទើររាល់ថ្ងៃ ដែលអាចនាំឲ្យកើតមានជំងឺតម្កាត់នានា បណ្តាលមកពីសត្វមូស ឬកង្វះអនាម័យជាដើម។ហើយម្យ៉ាងវិញទៀតបងប្អូនត្រូវរូតរះដាំដុះដំណាំនានា ឲ្យទាន់កាលវេលានៃរដូវធ្លា់្កភ្លៀង ដើម្បីទទួលបានផលល្អប្រសើរ។
លោក យន់ សារ៉ោម ប្រធានមន្ទីរអភិវឌ្ឍន៍ជនបទខេត្តមណ្ឌលគិរី បានឲ្យដឹងថា ផ្លូវក្រាលក្រួសក្រហមដែលត្រូវបើកការដ្ឋាននាពេលនេះ ត្រូវសាងសង់ពីឃុំពូជ្រៃ ឆ្ពោះទៅឃុំក្រង់តេះ ក្នុងទឹកដីស្រុកពេជ្រាដា ដោយមានប្រវែងសរុប ១០ ៥០០ម៉ែត្រ ទទឹង៦ម៉ែត្រ កម្រាស់២០សង្ទីម៉ែត្រ លូ៤កន្លែង និងមានកាយប្រឡាយសងខាងផ្លូវដើម្បីរំដោះទឹកផងដែរ៕
ចែករំលែកព័តមាននេះ