ខេត្តបាត់ដំបង ៖ បុរសម្នាក់ដែលមានមុខរបរដើរបេះផ្លែសំរងក្នុងព្រៃលក់ត្រូវដើមសំរងរលំសង្កត់ស្លាប់ នៅវេលាម៉ោងប្រហែល៩ព្រឹកថ្ងៃទី២៣ មេសា នៅចំណុចភ្នំតាង៉ែត ក្នុងភូមិសាស្ត្រភូមិស្រែអណ្ដូង ឃុំសំឡូត ស្រុកសំឡូត ដែលគេសង្ស័យអ្នកបេះផ្លែសំរងរូបនេះ…
ខេត្តបាត់ដំបង ៖ បុរសម្នាក់ដែលមានមុខរបរដើរបេះផ្លែសំរងក្នុងព្រៃលក់ត្រូវដើមសំរងរលំសង្កត់ស្លាប់ នៅវេលាម៉ោងប្រហែល៩ព្រឹកថ្ងៃទី២៣ មេសា នៅចំណុចភ្នំតាង៉ែត ក្នុងភូមិសាស្ត្រភូមិស្រែអណ្ដូង ឃុំសំឡូត ស្រុកសំឡូត ដែលគេសង្ស័យអ្នកបេះផ្លែសំរងរូបនេះ រកស៊ីកាប់មែក ឬកាប់រំលំដើម ទើបសង្កត់ខ្លួនឯងស្លាប់បែបនេះ ។
បើតាមប្រភពព័ត៌មានសាកសពជនរងគ្រោះ ត្រូវបានកម្លាំងវរនគរបាលការពារព្រំដែនគោកលេខ ៨២៣ និងសាច់ញាតិ បាននាំគ្នាលុកលុយចូលទៅកើតហេតុ ដើម្បីជួយសែងចេញពីក្នុងព្រៃ យកមកកាន់លំនៅឋាន ក្រោយពីទទួលបានដំណឹងដ៏អកុសល្យនេះ ។
ជនរងគ្រោះឈ្មោះ រ៉េម រិន ភេទប្រុស អាយុ៣៦ឆ្នាំ រស់នៅភូមិដូនត្រឹក ឃុំតាសាញ ស្រុក
សំឡូត ។ គេមិនទាន់ដឹងថា តើជនរងគ្រោះមានបក្សពួកប៉ុន្មាននាក់ដែលដើរបេះផ្លែសំរងនៅក្នុងព្រៃនាំឲ្យជួបគ្រោះថ្នាក់ដល់អាយុជីវិតបែបនេះ ? ហើយគេក៏មិនទាន់ដឹងថា តើមូលហេតុអ្វីឲ្យប្រាកដ ទើបដើមសំរងរលំសង្កត់លើជនរងគ្រោះស្លាប់ ?
បើតាមប្រភពព័ត៏មាននានាបានឲ្យដឹងថា ជាទូទៅអ្នកដើរបេះផ្លែសំរងក្នុងព្រៃ កម្រដើររើសផ្លែ
សំរងទុំជ្រុះក្រោមដើមណាស់ ភាគច្រើនពួកគេឡើងកាប់មែក ឬ កាប់រំលំទាំងដើមតែម្ដង ដើម្បីបេះយកផ្លែទៅលក់ ។ ប៉ុន្តែករណីជនរងគ្រោះឈ្មោះ រ៉េម រិន ដែលត្រូវដើមសំរងសង្កត់រហូតដល់ស្លាប់នេះ គេសង្ស័យគាត់កាប់រំលំដើម ទើបត្រូវដើមសំរងរលំសង្កត់បែបនេះ ។
ជុំវិញករណីនេះ មានតែក្រុមគ្រួសារជនរងគ្រោះ និងមន្ត្រីនគរបាលព្រំដែន ដែលចូលទៅជួយសែងសាកសពជនរងគ្រោះចេញពីកន្លែងកើតហេតុទេ ទើបអាចដឹងរឿងច្បាស់។ តើជនរងគ្រោះស្លាប់ដោយរបៀបណា ? តើដើមសំរងរលំសង្កត់ដោយសារខ្លួនឯងកាប់ដើម ឬយ៉ាងណា ?
ដោយឡែក អធិការស្រុកសំឡូត លោក ម៉ែន រីម បានប្រាប់តាមទូរស័ព្ទថា លោកក៏មិនទាន់ជ្រាបច្បាស់ពីដំណើររឿងនេះដែរ ។ ព្រោះមន្ត្រីជំនាញរបស់លោកទើបចុះទៅកាន់ចំណុចកើតហេតុ នៅព្រឹកថ្ងៃទី២៤ មេសា នេះ ដើម្បីពិនិត្យ ។
លោកអធិការបានបញ្ជាក់ថា សពជនរងគ្រោះ ត្រូវបានមន្ត្រីនគរបាលព្រំដែន និងក្រុមគ្រួសារសែងចេញពីតំបន់ព្រៃភ្នំ មកដល់ផ្ទះយប់ទៅហើយ ដូច្នេះទើបយើងដឹងក្រោយ ។ ពេលនេះ
មន្ត្រីជំនាញ បានចុះទៅកាន់ទីតាំងកើតហេតុ ដើម្បីត្រូវពិនិត្យហើយ ។
សូមរំលឹកថា នេះមិនមែនជាលើកទី១ទេ ដែលប្រជាពលរដ្ឋមួយចំនួននៅស្រុកសំឡូត ដើរបេះផ្លែសំរងក្នុងព្រៃជួបគ្រោះថ្នាក់ ។ ពួកអ្នកដើរបេះផ្លែសំរងក្នុងព្រៃ កន្លងមក មិនត្រឹមតែជួបគ្រោះថ្នាក់ធ្លាក់ពីលើដើមសំរង ឬមែកសំរងបាក់ ឬដើមសំរងរលំសង្តត់លើប៉ុណ្ណោះទេ ពេលខ្លះពួកគេបានដើរជាន់គ្រាប់មីននៅក្នុងព្រៃផ្ទុះរបួសដាច់ជើង ឬ ត្រូវបាត់បង់ជីវិតទៀតផង ។ ប៉ុន្តែដោយសារជីវិភាពខ្វះខាត អ្នកស្រុកសំឡូតមួយចំនួននៅតែបន្តនាំគ្នាចូលព្រៃ ដើម្បីដើររកបេះផ្លែសំរងលក់មិនរាងចាលឡើយ ។
ការបេះផ្លែសំរងនេះ ពួកគេភាគច្រើនឡើងកាប់មែក ឬកាប់រំលំទាំងដើមទៀងផង ដើម្បីប្រមូលយកផ្លែទាំងចាស់ទាំងទុំ។ ដូច្នេះហើយ ទើបដើមសំរងរលាយហិនហោចអស់គ្មានសល់ពីក្នុងព្រៃ នៅតាមតំបន់ព្រៃភ្នំនានា ក្នុងស្រុកសំឡូត រហូតមកដល់សព្វថ្ងៃនេះ៕
ចែករំលែកព័តមាននេះ