ខេត្តប៉ៃលិន ៖ ទោះបីជាសម័យកាលបានកន្លងផុតទៅ អស់រយៈពេលជាច្រើនឆ្នាំកន្លងផុតទៅក៏ដោយ តែបទចម្រៀងសម័យដើមដែលច្រៀងដោយអ្នកស្រី ប៉ែន រ៉ន មានចំណងជើងថា «យន្តហោះបោះពួយ»ក្នុងទស្សន៍វត្ស៦០ ពេលស្តាប់ម្តងៗ…
ខេត្តប៉ៃលិន ៖ ទោះបីជាសម័យកាលបានកន្លងផុតទៅ អស់រយៈពេលជាច្រើនឆ្នាំកន្លងផុតទៅក៏ដោយ តែបទចម្រៀងសម័យដើមដែលច្រៀងដោយអ្នកស្រី ប៉ែន រ៉ន មានចំណងជើងថា «យន្តហោះបោះពួយ»ក្នុងទស្សន៍វត្ស៦០ ពេលស្តាប់ម្តងៗ នៅតែដាស់អារម្មណ៍ឱ្យយើងនឹករំលឹកឃើញទីកន្លែងដែលប្រជាពលរដ្ឋកំពុងរស់នៅសព្វថ្ងៃ គឺស្ថិតនៅចំណុចផ្លូវជាតិលេខ៥៧ ក្នុងភូមិអូរតាប្រាង សង្កាត់ប៉ៃលិន ក្រុងប៉ៃលិន ខេត្តប៉ៃលិន ខណៈដែលសព្វថ្ងៃប្រជាពលរដ្ឋរស់នៅក្នុងភូមិនេះ ភាគច្រើនមានផ្ទះធំ ទ្រនំខ្ពស់ មានជីវភាពធូរធាអាចនិយាយបានថា ពួកគាត់មិនមានការខ្វះខាតច្រើនដូចនៅកន្លែងផ្សេងនោះទេ ហើយអាជ្ញាធរខេត្តក៏បានអភិវឌ្ឍន៍ផ្លូវបេតុងខ្វាត់ខ្វែងត្រង់តំបន់នេះ ដោយសារតែនៅជាប់នឹងរមណីយដ្ឋានប្រវត្តិសាស្ត្រភ្នំយ៉ាតតែម្តង។
បើតាមប្រភពព័ត៌មានពីលោក ព្រហ្ម រដ្ឋា ប្រធានមន្ទីរវប្បធម៌ និងវិចិត្រសិល្បៈខេត្តប៉ៃលិន បានឱ្យដឹងថា តាមបទចម្រៀងដើមរបស់អ្នកស្រី ប៉ែន រ៉ន គឺបទ «យន្តបោះពួយ» មានអត្ថន័យដូចតទៅ យន្តហោះបោះពួយ ឆ្លងខេត្តប៉ៃលិន ទ្រូងខ្ញុំក្តៅឆ្អិន ដូចត្រូវគេហែក អើតតាមបង្អួច អើតមើលដងព្រែក ព្យុះខ្សែទឹកភ្នែក ស្រែកហៅប្រុសស្នេហ៍។ ឱ! ខេត្តត្បូងពេជ្រ ខ្ញុំមិនភ្លេចទេ ស្ពានយោលកុំជេរ ថាខ្ញុំបែកបែរ ប៉ាហ៊ីអូរតង ជ្រលងអូរស្នេហ៍ ដីចម្ការតែ កុងសែទិញត្បូង។
ស្រណោះខ្ទមស្បូវ វត្តអូរតាប្រាក់ ពេលណាភ្លៀងធ្លាក់ បងបីអូនឆ្លង ស្បូវបីកណ្តប យើងគ្របបេះដូង សុបិន្តលើទ្រូង ម្ចាស់ស្នេហ៍ឧត្តម។ ឥឡូវអូនលា លាមួយគ្រាសិន លាដែនប៉ៃលិន សុបិន្តខ្នងភ្នំ ខំរែងត្បូងទៅបងអើយកុំយំ ស្បូវមាសខ្ទមព្រំ ខ្ញុំមិនភ្លេចឡើយ ។ ស្រណោះខ្ទមស្បូវ វត្តអូរតាប្រាក់ ពេលណាភ្លៀងធ្លាក់ បងបីអូនឆ្លង ស្បូវបីកណ្តប យើងគ្របបេះដូង សុបិន្តលើទ្រូង ម្ចាស់ស្នេហ៍ឧត្តម ។ ឥឡូវអូនលា លាមួយគ្រាសិនលាដែនប៉ៃលិន សុបិន្តខ្នងភ្នំ ខំរែងត្បូងទៅ បងអើយកុំយំ ស្បូវមាសខ្ទមព្រំ ខ្ញុំមិនភ្លេចឡើយ។
លោកបន្តទៀតថា បទចម្រៀងដ៏ពីរោះរណ្តំដួងចិត្តនេះ ពិតជាត្រូវបានអ្នកនិពន្ធតាក់តែងឱ្យត្រូវនឹងសម័យកាលពីមុនមែន ។ តែឥឡូវនេះ នៅត្រង់ចំណុចខាងលើ មានការផ្លាស់ប្តូរច្រើនណាស់ ក្រោមការដឹកនាំរបស់អភិបាលខេត្តតៗគ្នា ជាពិសេស ក្រោមការដឹកនាំរបស់អភិបាលខេត្តចុងក្រោយ គឺលោកជំទាវ បាន ស្រីមុំ បានធ្វើឱ្យតំបន់នេះក្លាយទៅជាកន្លែងទេសចរប្រវត្តសាសន៍ដ៏ស្រស់ស្អាត ដោយតុបតែងជាក្បាច់រចនា គឺភ្នំយ៉ាត ព្រមទាំងតំបន់ផ្សេងៗទៀតជាច្រើនផងដែរ។
លោកបញ្ជាក់ថា អូរតាប្រាក់មានមែនកាលពីមុន តែជាដងអូរតូចប៉ុណ្ណោះ ដោយបច្ចុបន្ននេះ អាជ្ញាធរខេត្តបានដាក់ជាលូប្រអប់មិនមានស្ពានទេ ដោយមានតែស្ពានអូរតាប្រាងនៅជាប់នឹងគ្នាប៉ុណ្ណោះ ៕
ចែករំលែកព័តមាននេះ