ខេត្តព្រៃវែង ៖ បឹងធំ គឺជាបឹងសាធារណៈមួយ ដែលស្ថិតនៅក្នុងភូមិធំ ឃុំព្រៃស្រឡឹត ស្រុកពារាំង ខេត្តព្រៃវែង បច្ចុប្បន្នកំពុងត្រូវបានគ្រឿងចក្រចំនួនពីរក្រុម សំរុកជីកយកអាចម៌ដីពីក្នុងបឹង…
ខេត្តព្រៃវែង ៖ បឹងធំ គឺជាបឹងសាធារណៈមួយ ដែលស្ថិតនៅក្នុងភូមិធំ ឃុំព្រៃស្រឡឹត ស្រុកពារាំង ខេត្តព្រៃវែង បច្ចុប្បន្នកំពុងត្រូវបានគ្រឿងចក្រចំនួនពីរក្រុម សំរុកជីកយកអាចម៌ដីពីក្នុងបឹង ដឹកលក់យ៉ាងសប្បាយ ខណៈអាជ្ញាធរឃុំស្រុកនាំគ្នាសំងំស្ងាត់ឈឹង ដូចត្រូវដងត្រូវផ្លែគ្នា ។
ពលរដ្ឋនៅឃុំព្រៃស្រឡឹតបានរៀបរាប់ប្រាប់ថា ដីបឹងធំនេះ ត្រូវបានគ្រឿងចក្រចំនួនពីរក្រុម ដែលមានម្ចាស់ឈ្មោះ តុង និងម្នាក់ទៀតឈ្មោះ រឹទ្ធ នាំគ្នាជីកយកអាចម៍ដីលក់ តាំងពីមុនចូលឆ្នាំខ្មែរមកម្ល៉េះ ហើយគេបានសម្រាកនៅថ្ងៃចូលឆ្នាំប៉ុន្មានថ្ងៃ រួចក៏បន្តចូលទៅជីកទៀតរហូតដល់ថ្ងៃទី 20 មេសានេះ មិនទាន់ឃើញមានអាជ្ញាធរឬសមត្ថកិច្ចណាចុះទៅហាមឃាត់នោះទេ។
ចំពោះករណីនេះលោកជាស៊យមេឃុំព្រៃស្រឡិតបានប្រាប់កោះសន្តិភាពថា ម្ចាស់គ្រឿងចក្រទាំង២នោះ លោកបានប្រាប់ឲ្យទៅសុំច្បាប់នៅសាលាស្រុកហើយ ប៉ុន្តែរហូតមកដល់ពេលនេះមិនដឹងថាគេសុំច្បាប់បានហើយឬនៅនោះទេ? ព្រោះម្ចាស់គ្រឿងចក្រទាំង២ មិនដែលបានប្រាប់មកឃុំវិញទេ។
ដោយឡែកលោក ចេម ប្រា អភិបាលស្រុកពារាំងបានប្រាប់ឲ្យដឹងនៅល្ងាចថ្ងៃទី 20 មេសា ថា រឿងដីបឹងធំត្រូវបានក្រុមឈ្មួញនាំគ្នាជីកយកអាចម៍ដីលក់នេះ លោកមិនបានដឹងទេ ហើយលោកនឹងបញ្ជាឲ្យលោកអធិការស្រុក ព្រមជាមួយលោកមេឃុំ ចុះទៅសាកសួរម្ចាស់គ្រឿងចក្រនោះមើល តើមានច្បាប់ពីរខាងណាទើបហ៊ានតិចដីបឹងបែបនេះ។
ប៉ុន្តែអ្វីដែលគួរឲ្យកត់សម្គាល់នោះ គឺខាងអាជ្ញាធរឃុំនិងស្រុក ម្នាក់ៗព្យាយាមឆ្លើយឲ្យតែរួចខ្លួនប៉ុណ្ណោះ ដោយលោកមេឃុំព្រៃស្រឡឹត ដឹងថាគេជីកដីបឹងមិនទាន់មានច្បាប់ផង បែរជាបណ្ដែតបណ្ដោយឱ្យគេធ្វើសកម្មភាពរាល់ថ្ងៃ មិនខ្ចីខ្វល់ ដោយឡែកលោកអភិបាលស្រុកពេលមានអ្នកសារព័ត៌មានខលសួរទើបឆ្លើយថាចាំឲ្យសមត្ថកិច្ចនិងលោកមេឃុំចុះទៅសួរនាំមើល។ទាំងដែលគេជីកច្រើនថ្ងៃមកហើយ ចុះបើគ្មានអ្នកព័ត៌មានសួរ ច្បាស់ជាម្ចាស់គ្រឿងចក្រទាំងពីរក្រុមនោះ ជីកដីបឹងលក់យកលុយយ៉ាងសប្បាយតទៅទៀតហើយ។
ទោះជាយ៉ាងណាក៏ដោយ មហាជនកំពុងរង់ចាំមើល ថាតើលោកអភិបាលស្រុកពារាំង អាចការពារដីបឹងធំ ពីការចូលជីកទន្ទ្រានរបស់ក្រុមឈ្មួញទាំងពីរក្រុមនេះបានដែរឬទេ?
ទស្សនៈខ្លះថា បើចៅហ្វាយស្រុកឃាត់មិនឈ្នះទេ គួរឱ្យឈ្មួញដីឡើងធ្វើចៅហ្វាយស្រុកវិញ ទើបសមជាង…ហេ! ហេ! ។
ព័ត៌មានបន្ថែមនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ