រាជធានីភ្នំពេញ ៖ អតីតកីឡាករបាល់ទាត់ជម្រើសជាតិទេស សម្បត្តិ បានទទួលមរណៈភាពហើយ ដោយបានជិះម៉ូតូធ្លាក់ចូលទៅក្នុងទឹកប្រឡាយ ជម្រៅជាង៤ម៉ែត្រ ស្ថិនៅក្នុងភូមិកំរែង សង្កាត់សាក់សំពៅ ខណ្ឌដង្កោ…
រាជធានីភ្នំពេញ ៖ អតីតកីឡាករបាល់ទាត់ជម្រើសជាតិទេស សម្បត្តិ បានទទួលមរណៈភាពហើយ ដោយបានជិះម៉ូតូធ្លាក់ចូលទៅក្នុងទឹកប្រឡាយ ជម្រៅជាង៤ម៉ែត្រ ស្ថិនៅក្នុងភូមិកំរែង សង្កាត់សាក់សំពៅ ខណ្ឌដង្កោ រាជធានីភ្នំពេញ កាលវេលាម៉ោង១០យប់ថ្ងៃទី២០ ខែមេសា ឆ្នាំ២០២៥ ។ ក្រោយពីទទួលបានដំណឹងថា មានម៉ូតូធ្លាក់ទឹកអាជ្ញាធរនិងសមត្ថកិច្ចព្រមទាំងប្រជាពលរដ្ឋ បានទៅកាន់កន្លែងកើតហេតុភ្លាមៗ ហើយបានរាវរកឃើញម៉ូតូ រួចនាំយកទៅរក្សាទុកនៅប៉ុស្តិ៍ទាំងយប់ ហើយ រហូតដល់វេលាម៉ោង៩ព្រឹកថ្ងៃទី២១ ខែមសា ទើបត្រូវបានរាវរកឃើញសពកីឡាកររូបនោះ ។
បើតាមប្រភពពីកន្លែងកើតហេតុបានប្រាប់ឲ្យដឹងថា លោកទេស សម្បត្តិ អាយុ២៨ឆ្នាំ ស្នាក់នៅបុរីទីលាង សង្កាត់ព្រៃវែង ខណ្ឌដង្កោ រាជធានីភ្នំពេញ គឺជាកីឡាករបាល់ទាត់ជម្រើសជាតិកម្ពុជា និងជាកីឡាករខ្សែការពាររបស់ក្លិបបាល់ទាត់វិសាខា ។ កីឡាកររូបនេះបានស្លាប់ក្នុងសម្លៀកបំពាក់អាវយឺតដៃខ្លីពណ៌ខ្មៅ ខោយឺតជេីងវែងពណ៌ស ឆ្នូតខ្មៅ និងមានស្ពាយកាបូបពណ៌ខ្មៅ ។ ជនរងគ្រោះជិះម៉ូតូម៉ាកHonda ADV ពណ៌ខ្មៅ ពាក់ស្លាកលេខ ភ្នំពេញ 1KY-4937 ហើយនៅក្រោមកែបម៉ូតូនោះមានលិខិតពេទ្យ១ច្បាប់ឈ្មោះសេង សុវណ្ណារ៉ា មុខរបរជាកីឡាករផងដែរ ។
ក្រុមអ្នកបើកគ្រឿងចក្រធ្វើផ្លូវបានប្រាប់សមត្ថកិច្ចថា នៅវេលាយប់ថ្ងៃកើតហេតុ ខណៈដែលពួកគាត់កំពុងដេកបានឮស្នូរម៉ូតូ១គ្រឿងបើកបរធ្វើដំណើរក្នុងល្បឿនលឿនតាមផ្លូវខ្នងប្រឡាយសាក់សំពៅនោះ ក្នុងទិសដៅពីលិចទៅកើត ពេលទៅដល់ត្រង់ចំណុចកើតហេតុដែលជាផ្លូវកោងស្រាប់តែធ្លាក់ទឹកប្រឡាយប្រូង ។ ពេលនោះដោយសារតែយប់ងងឹតផង និងស្ថិតនៅឆ្ងាយពីកន្លែងដែលពួកគាត់ស្នាក់នៅបន្តិចផង ម្យ៉ាងម៉ូតូលិចបាត់ទៅក្នុងទឹកប្រឡាយជម្រៅជាង៤ម៉ែត្រ ទើបមើលមិនដឹងថាអ្នកជិះម៉ូតូធ្លាក់ទឹកនោះជានរណា ហើយពួកគាត់ក៏បានរាយការណ៍ទៅកាន់អាជ្ញាធរសង្កាត់សាក់សំពៅឲ្យទៅមើលតែម្ដង ។
មន្ត្រីសាលាសង្កាត់សាក់សំពៅបានប្រាប់ឲ្យដឹងថា នៅវេលាយប់ថ្ងៃកើតហេតុ អាជ្ញាធរសង្កាត់បានទទួលព័ត៌មានពីក្រុមអ្នកបើកគ្រឿងចក្រធ្វើផ្លូវ ដែលសម្រាកនៅប្រឡាយសាក់សំពៅនោះថា មានអ្នកជិះម៉ូតូធ្លាក់ទឹកប្រឡាយខាងលើ ។ ក្រោយពេលទទួលបានដំណឹងនេះភ្លាម អាជ្ញាធរសង្កាត់ រួមជាមួយនគរបាលប៉ុស្តិ៍សាក់សំពៅ និងអ្នកភូមិកំរែង ព្រមទាំងកម្លាំងប្រជាការពារភូមិ បានចេញទៅរាវរកទាំងយប់ ។ ខណៈនោះបានប្រទះឃើញម៉ូតូ១គ្រឿងម៉ាកHonda ADV ពណ៌ខ្មៅ ពាក់ស្លាកលេខ ភ្នំពេញ 1KY-4937 នៅក្នុងទឹកប្រឡាយនោះមែន រួចក៏បានស្រង់យកទៅរក្សាទុកនៅប៉ុស្តិ៍ ។
មន្ត្រីសាលាសង្កាត់ដដែលបានប្រាប់ឲ្យដឹងបន្តទៀតថា បន្ទាប់មកកម្លាំងខាងលើបានបន្តរាវរកម្ចាស់ម៉ូតូទៀត ព្រោះសង្ស័យថាអាចនិងស្លាប់នៅក្នុងទឹក ប៉ុន្តែរាវរកច្រើនម៉ោង រហូតដល់យប់ជ្រៅអត់ឃើញឡើយកម្លាំងក៏បានសម្រេចចិត្តសម្រាកសិន ។
លុះដល់វេលាព្រឹកឡើងថ្ងៃទី២១ ខែមេសា ទើបរាវរកបន្តទៀតរហូតដល់វេលាម៉ោង៩ព្រឹកថ្ងៃដដែល ក៏បានប្រទះឃើញសពបុរសជាម្ចាស់ម៉ូតូខាងលើដែលគេស្គាល់ថាជាអតីតកីឡាករបាលទាត់ជម្រើសជាតិទេស សម្បត្តិ ស្លាប់នៅក្នុងទឹកប្រឡាយនោះដែរ ហើយបានស្រង់ឡើងគោកដើម្បីប្រគល់ជូនក្រុមគ្រួសារសាច់ញាតិយកទៅធ្វើបុណ្យតាមប្រពៃណីនៅឯខេត្តកំពង់ស្ពឺ ។
ទាក់ទិនទៅនិងហេតុការណ៍នេះ នគរបាលព្រហ្មទណ្ឌខណ្ឌដង្កោបានប្រាប់ថា ករណីនេះគឺជាឧប្បត្តិហេតុគ្រោះថ្នាក់ចរាចរណ៍មិនពាក់ព័ន្ធនិងអំពើឃាតកម្មនោះទេ ហើយនគរបាលផ្នែកចរាចរណ៍កំពុងធ្វើការតាមជំនាញហើយ ៕
ចែករំលែកព័តមាននេះ