ខេត្តប៉ៃលិន ៖ ប្រជាពលរដ្ឋរស់នៅភូមិដីថ្មី បានរាយការណ៍ឱ្យដឹងនៅព្រឹកថ្ងៃទី១៩ ខែមេសា ឆ្នាំ២០២៥ថា ក្រុមឈ្មួញបានយកគ្រឿងចក្រអេស្កាវ៉ាទ័រចំនួន២គ្រឿង និងរថយន្តដឹកដីចង្កូតស្តាំជិត១០គ្រឿង ទៅសម្ងំជីកកកាយដីកូនភ្នំមួយកន្លែង ស្ថិតនៅត្រង់ចំណុចអូរកប់អង្ករ…
ខេត្តប៉ៃលិន ៖ ប្រជាពលរដ្ឋរស់នៅភូមិដីថ្មី បានរាយការណ៍ឱ្យដឹងនៅព្រឹកថ្ងៃទី១៩ ខែមេសា ឆ្នាំ២០២៥ថា ក្រុមឈ្មួញបានយកគ្រឿងចក្រអេស្កាវ៉ាទ័រចំនួន២គ្រឿង និងរថយន្តដឹកដីចង្កូតស្តាំជិត១០គ្រឿង ទៅសម្ងំជីកកកាយដីកូនភ្នំមួយកន្លែង ស្ថិតនៅត្រង់ចំណុចអូរកប់អង្ករ ក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដឹកលក់យ៉ាងគគ្រឹកគគ្រេងតាំងពីមុនថ្ងៃបុណ្យចូលឆ្នាំថ្មីប្រពៃណីជាតិខ្មែរ រហូតមកដល់ពេលនេះមិនទាន់ឈប់នៅឡើយ ខណៈដែលគេសង្ស័យថា មានការឃុបឃិតគ្នាជាប្រព័ន្ធ…ហេ ! ហេ !
ប្រជាពលរដ្ឋបានរៀបរាប់ឱ្យដឹងថា អស់រយៈពេលជាច្រើនថ្ងៃ ពោលគឺចាប់តាំងពីមុនថ្ងៃបុណ្យចូលឆ្នាំខ្មែរ ពួកឈ្មួញដែលគិតតែផលប្រយោជន៍របស់ខ្លួនបានយកគ្រឿងចក្រអេស្កាវ៉ាទ័រ រួមជាមួយនឹងរថយន្តដឹកដីជាច្រើនគ្រឿង នាំគ្នាជីកកកាយដីជើងកូនភ្នំមួយកន្លែង ដឹកលក់នៅតាមភូមិនានាក្បែរព្រំដែន យ៉ាងគគ្រឹកគគ្រេង បណ្តាលឱ្យហុយដីចូលទៅក្នុងផ្ទះប្រជាពលរដ្ឋ បង្កជាបញ្ហាជំងឺផ្លូវដង្ហើម និងរលាកបំពង់ក ដល់មនុស្សក្មេងចាស់ប្រុសស្រី។ មិនត្រឹមតែប៉ុណ្ណោះ ក៏មានអាចម៍ដីខ្លះបានធ្លាក់រាយប៉ាយលើផ្លូវ បណ្តាលឱ្យរអិលនៅពេលភ្លៀងធ្លាក់ម្តងៗ និងហុយទ្រលោមពេលដែលក្តៅខ្លាំង ធ្វើឱ្យផ្លូវក្រាលកៅស៊ូចង់ក្លាយជាផ្លូវលំ ។
ប្រជាពលរដ្ឋបន្ថែមទៀតថា ការដឹកដីរបស់ក្រុមឈ្មួញខាងលើនេះ បណ្តាលឱ្យទទួលរងការខូចផ្លូវបេតុងក្លាយទៅជាជង្ហុកតូចធំ នៅក្បែរមណ្ឌលសុខភាពផ្សារព្រំ នាំឱ្យមានការលំបាកក្នុងការធ្វើចរាចរណ៍ម៉ូតូ និងរថយន្តថែមទៀត ជាពិសេសធ្វើឱ្យមានករណីគ្រោះថ្នាក់ដួលម៉ូតូជារឿយៗ បណ្តាលឱ្យរងរបួស ដល់អ្នករស់នៅក្នុងភូមិដែលធ្វើដំណើរតាមផ្លូវនោះព្រោះក្លាយជាដីល្បប់ភក់អស់ ។
ពាក់ព័ន្ធទៅនឹងបញ្ហានេះលោក សៀ សុខុម អភិបាលស្រុកសាលាក្រៅ បានឱ្យដឹងថា គ្រឿងចក្រ និងរថយន្តដឹកដីទាំងអស់ខាងលើ ខាងលោកអត់បានចេញច្បាប់អនុញ្ញាតឱ្យចូលទៅជីកកកាយដីដឹកលក់នោះទេ ដោយពួកគេឆ្លៀតឱកាសពេលបុណ្យចូលឆ្នាំថ្មី ខណៈដែលមន្ត្រីកំពុងតែរវល់នឹងអបអរសាទរសម្រាប់បុណ្យចូលឆ្នាំថ្មី ក៏ត្រូវពួកគេលួចនាំគ្នាជីកកកាយដោយឥតមានច្បាប់ ខាងលោកនឹងចុះទៅពិនិត្យ ។
ចំណែកលោក សុខ សួន ប្រធានមន្ទីររ៉ែ និងថាមពលខេត្តប៉ៃលិន បានឱ្យដឹងដែរថា ក្រោយទទួលបានដំណឹងនេះភ្លាមខាងលោក បានដឹកនាំកម្លាំងចុះទៅពិនិត្យត្រង់កន្លែងជីកកកាយដីខាងលើ តែក្រុមឈ្មួញបាននាំគ្នាយកគ្រឿងចក្រ និងរថយន្តបើករត់គេចខ្លួនអស់រលីងហើយ ដោយនៅសល់តែស្នាមជីកកកាយដីក្បែរជើងភ្នំប៉ុណ្ណោះ ។ គិតទៅឈ្មួញដឹងក្លិនមែនទែន! រថយន្តមួយហ្វូងចាប់បាន ខ្យល់…ហេ ! ហេ !
ទោះបីជាយ៉ាងណា ខាងលោកនឹងស្រាវជ្រាវរកឈ្មួញទាំងនោះ ដើម្បីធ្វើការណែនាំឱ្យអនុវត្តត្រឹមត្រូវតាមច្បាប់ទម្លាប់ ចៀសវាងមានបញ្ហានៅថ្ងៃខាងមុខ ។ មានការកត់សម្គាល់បញ្ហាជីកកកាយដីភ្នំយ៉ាងអនាធិបតេយ្យបែបនេះហាក់បានស្ងប់ស្ងាត់មួយរយៈកន្លងមក តែក៏មិនដែលឃើញមានចំណាត់ការណាមួយពីសំណាក់អាជ្ញាធរ ចំពោះក្រុមឈ្មួញជីកកកាយដីភ្នំម្តងណាឡើយ ។
ទោះបីជាបែបណា ចាំមើលលើកនេះ តើក្រុមឈ្មួញទាំងនោះជួបវាសនាបែបណា បើរកឃើញថាធ្វើការជីកបំផ្លាញដីភ្នំដោយខុសច្បាប់ ?
ចែករំលែកព័តមាននេះ