ទីក្រុងហាណូយ៖ ថ្មីៗនេះ អាជ្ញាធរវៀតណាមចាប់ខ្លួនមនុស្សបួននាក់នៅខេត្តញ៉ែអាន (Nghe An) ពីបទសង្ស័យលួចដាក់សារធាតុគីមីដ៏គ្រោះថ្នាក់ដល់អាយុជីវិតរបស់អ្នកបរិភោគនៅក្នុងសណ្ដែកបណ្ដុះ។ កាលនោះ អាជ្ញាធររឹបអូសសណ្ដែកបណ្ដុះ៣៥០០តោនដែលលាយសារធាតុគីមីទាំងនោះ។ នេះជាសារធាតុដែលរដ្ឋាភិបាលហាមមិនឱ្យប្រើប្រាស់ទេចាប់តាំងពីឆ្នាំ២០២៤។
ជនសង្ស័យទាំងនេះមានឈ្មោះលូម៉ាញ់ហឿង អាយុ៣២ឆ្នាំ, លូវ៉ាន់ទ្រុង អាយុ២៨ឆ្នាំ, ត្រឹងខាកឌុយ អាយុ៣៥ឆ្នាំ និងង្វៀនវ៉ាន់ហឿង អាយុ២៧ឆ្នាំ។ ពួកគាត់បើកទីតាំងសិប្បកម្មបណ្ដុះសណ្ដែកជាច្រើនកន្លែងនៅទីក្រុងវេញ (Vinh) ខេត្តញ៉ែអាន។ នេះបើតាមការស៊ើបអង្កេតរបស់សមត្ថកិច្ច។
តាមរយៈការវាយឆ្មក់របស់សមត្ថកិច្ចកាលពីថ្ងៃទី១១ ខែមេសា សមត្ថកិច្ចរឹបអូសបានសណ្ដែកបណ្ដុះដែលលាយសារធាតុគីមីពុលនេះចំនួន២៥តោនច្រកនៅក្នុងស្បោងផ្លាស្ទិច។ ក្រៅពីនេះរឹបអូសបានសារធាតុគីមីឈ្មោះបង់ហ្ស៊ីលអាដេនីន (benzyl adenine) ឬ 6-BAP ចំណុះ២៥លីត្រ។
ក្រុមអ្នកស៊ើបអង្កេតរកឃើញថាពួកឈ្មួញទាំងនេះបានលាយសារធាតុនេះ១៥០លីត្រចូលទៅក្នុងសណ្ដែកបណ្ដុះរួចជាស្រេចតាំងពីមុនពេលសមត្ថកិច្ចវាយឆ្មក់ទៅទៀត។ បង់ហ្ស៊ីលអាដេនីនជាសារធាតុហាមឃាត់ព្រោះវាធ្វើឱ្យប៉ះពាល់សុខភាពរបស់អ្នកប្រើប្រាស់ធ្ងន់ធ្ងរណាស់ ធ្វើឱ្យត្បៀតសរសៃសួត និងស្លាប់បើសិនស្រូបយកសារធាតុនេះចូលទៅក្នុងខ្លួនច្រើនពេក។
នៅថ្ងៃវាយឆ្មក់ចូលសិប្បកម្មនោះ សមត្ថកិច្ចរកឃើញសណ្ដែកបណ្ដុះ២៥តោនដែលលាយសារធាតុគីមីនេះ។ ជនសង្ស័យបានឆ្លើយសារភាពតាមត្រង់ថាខ្លួនបានប្រើប្រាស់សារធាតុនេះលាយជាមួយសណ្ដែកបណ្ដុះពិតមែនដើម្បីធ្វើឱ្យសណ្ដែកមានពណ៌សល្អ និងមើលទៅឃើញថ្លោសៗល្អ ធ្វើឱ្យអតិថិជនញ៉ាំយ៉ាងឆ្ងាញ់មាត់។ ពួកគេអះអាងថាសណ្ដែកបណ្ដុះទាល់តែបែបហ្នឹងទើបលក់ដាច់។ អាជ្ញាធរនឹងបើកការស៊ើបអង្កេតដ៏ទូលំទូលាយព្រោះសំណុំរឿងនេះនៅវែងឆ្ងាយតទៅទៀត។ នេះបើតាមការផ្សាយរបស់គេហទំព័រវៀតណាមអ៊ិចប្រែស (Vietnam Express)៕
ចែករំលែកព័តមាននេះ