ខេត្តស្ទឹងត្រែង ៖កាលពីវេលាម៉ោង១រសៀលថ្ងៃទី១ កក្កដា លោកឡូយ សុផាត អភិបាលខេត្តរួមដំណើរដោយលោកម៉ៅ ធនិន អភិបាលរងខេត្ត ព្រមទាំងប្រធានមន្ទីរកសិកម្មខេត្តបាននាំយកពូជស្រូវដំណើបដែលនាំចូលពីខេត្តអាងយ៉ាងប្រទេសវៀតណាមជូនដល់ប្រជាពលរដ្ឋ៦ឃុំក្នុងស្រុកសៀមបូក ក្នុងនោះមានឃុំអូរម្រះ ឃុំកោះស្រឡាយ ឃុំកោះសម្ពាយ ឃុំស្រែក្រសាំង ឃុំសៀមបូក និងឃុំកោះព្រះ។ ដោយឡែកឃុំសៀមបូកទទួលបានគោយន្តកន្ត្រៃសម្រាប់ភ្ជួររាស់១គ្រឿង ។ ក្នុងពិធីនោះក៏មានការបំពាក់គ្រឿងឥស្សរិយយសដល់មន្ត្រីដែលមានស្នាដៃល្អ ក្នុងការបំពេញភារកិច្ចលើការងារអភិរក្ស និងអភិវឌ្ឍន៍តំបន់ទេសចរណ៍សត្វផ្សោតទន្លេមេគង្គ និងអ្នកមានស្នាដៃក្នុងការបង្ក្រាប ទប់ស្កាត់បទល្មើសនេសាទក្នុងរដូវបិទនេសាទ។
លោកឡូយ សុផាត បានក្រើនរំលឹកដល់ប្រជាពលរដ្ឋជាកសិករប្រកបរបរធ្វើស្រែចំការ ច្បារដំណាំកសិកម្ម ឧស្សាហកម្មឱ្យខិតខំធ្វើឱ្យបានទាន់ពេលវេលា ជាពិសេសនារដូវវស្សាដើម្បីឱ្យក្រុមគ្រួសារមានជីវភាពសម្បូរសប្បាយក្រោយពីទទួលបានពូជស្រូវនាំចូលមកពីប្រទេសវៀតណាម ។ ជាងនេះទៅទៀត លោកអភិបាល ខេត្តបានផ្តាំផ្ញើដល់ប្រជាពលរដ្ឋឱ្យនាំគ្នាជួយថែរក្សាធនធានមច្ឆជាតិទន្លេមេគង្គ សេកុង សេសាន ស្រែពកទាំងបួនក្នុងខេត្តស្ទឹងត្រែងនេះ ជាពិសេសសត្វផ្សោតដែលជាពូជត្រីកម្រ ហើយមានតែ២-៣អន្លង់ ក្នុងមួយអន្លង់មានប្រហែល១៥ ទៅ១៦ក្បាលប៉ុណ្ណោះ ដូច្នេះត្រូវនាំគ្នាថែរក្សា ពីព្រោះក្នុងមួយឆ្នាំវាមានកូនតែមួយជួនកាលអត់កូនក៏មាន ។
ក្រោយពីមានប្រសាសន៍សំណេះសំណាលជាមួយប្រជាពលរដ្ឋរួចមក លោកឡូយ សុផាត អភិបាលខេត្ត និងលោកម៉ៅ ធនិន អភិបាលរងខេត្តបាន បំពាក់មេដាយការងារតាមលំដាប់ថ្នាក់ជូនមន្ត្រីប្រចាំការតាមតំបន់ និងប៉ុស្តិ៍អភិរក្សក្នុងខេត្តចំនួន១២រូបដែលមានស្នាដៃល្អក្នុងការបំពេញភារ កិច្ចលើការងារអភិរក្ស និងអភិវឌ្ឍន៍តំបន់ទេសចរណ៍សត្វផ្សោតទន្លេមេគង្គ និងជូនរង្វាន់ជានាឡិកាដៃលើកទឹកចិត្តដល់មន្ត្រីមានស្នាដៃបង្ក្រាបបទល្មើសនេសាទខុសច្បាប់ក្នុងរដូវបិទនេសាទដែលបានឃាត់និងចាប់រឹបអូសវត្ថុតាងឧបកណ៍ឆក់ត្រីមួយចំនួន ព្រមទាំងបញ្ជូនខ្លួនជនល្មើសទៅតុលាការបានចំនួន៦នាក់ ។ បន្ទាប់មកលោកអភិបាលខេត្តបានប្រគល់ពូជស្រូវដំណើប និងគោយន្តកន្ត្រៃមួយគ្រឿងដល់ឃុំសៀមបូកសម្រាប់ប្រើប្រាស់រួមក្នុងឃុំ។
លោកប៊ុត ខាំថន មេឃុំសៀមបូកបានសម្តែងនូវភាពរីករាយចំពោះវត្តមានរបស់លោកអភិបាល អភិបាលរងខេត្តដែលតែងយកចិត្តទុកដាក់ដល់ប្រជាពល រដ្ឋនិងឆ្លៀតឱកាសដ៏មមាញឹកចុះមកសួរសុខទុក្ខប្រជាពលរដ្ឋ និងនាំយកនូវអំណោយដ៍ថ្លៃថ្លាមកប្រគល់ដល់ឃុំយើង ។ជួសមុខឱ្យប្រជាពលរដ្ឋក្នុងឃុំសៀមបូកទាំងមូល សូមថ្លែងអំណរគុណយ៉ាងជ្រាលជ្រៅដល់លោកអភិបាល អភិបាលរងខេត្ត និងប្រធានមន្ទីរកសិកម្មខេត្ត និងសូមជូនពរដល់អស់លោកជួបប្រទះតែសេចក្តីសុខ សុខភាពល្អ ដើម្បីបំពេញភារកិច្ចជូនជាតិ ៕
ចែករំលែកព័តមាននេះ