ខេត្តបាត់ដំបង ៖ ប្រជាពលរដ្ឋក្នុងខេត្ត ភ្ញៀវទេសចរជាតិ និងភ្ញៀវអន្តរជាតិ យ៉ាងតិចជាង១,៧លាននាក់បានធ្វើដំណើរចូលមកកម្សាន្តតាមរមនីយដ្ឋាននានាយ៉ាងភ្លូកទឹក ភ្លូកដី ក្នុងទឹកដីខេត្តបាត់ដំបង ក្នុងរយៈពេល០៣ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរក្នុងឆ្នាំ២០២៥នេះ ។…
ខេត្តបាត់ដំបង ៖ ប្រជាពលរដ្ឋក្នុងខេត្ត ភ្ញៀវទេសចរជាតិ និងភ្ញៀវអន្តរជាតិ យ៉ាងតិចជាង១,៧លាននាក់បានធ្វើដំណើរចូលមកកម្សាន្តតាមរមនីយដ្ឋាននានាយ៉ាងភ្លូកទឹក ភ្លូកដី ក្នុងទឹកដីខេត្តបាត់ដំបង ក្នុងរយៈពេល០៣ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរក្នុងឆ្នាំ២០២៥នេះ ។ នេះបើយោងតាមរបាយការណ៍បូកសរុបរបស់មន្ទីរទេសចរណ៍ខេត្ត ក្រោយពិធីបុណ្យប្រពៃណីខ្មែរដ៏ធំសម្បើមនេះបានបិទបញ្ចប់ ។
តាមរយៈរបាយការណ៍បូកសរុបលោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបានឲ្យដឹងថា រយៈពេល០៣ថ្ងៃ (១៤,១៥.១៦-២០២៥) នៃពិធីបុណ្យចូលឆ្នាំថ្មីប្រពៃណីជាតិខ្មែរប្រជាពលរដ្ឋនៅក្នុងខេត្ត ភ្ញៀវជាតិ និងភ្ញៀវអន្តរជាតិសរុបប្រមាណ១,៧៤១,៧៩៥នាក់ បានធ្វើដំណើរចូលមកកម្សាន្តនៅតាមរមណីដ្ឋាននានានៅក្នុងទឹកដីខេត្តបាត់ដំបង ដែលជាខេត្តវ័យចំណាស់មួយនៃព្រះរាជាណាចក្រកម្ពុជា ដែលសម្បូរទៅដោយរមណីយដ្ឋានប្រវត្តិសាស្ត្រ និងរមណីយដ្ឋានធម្មជាតិរាប់រយកន្លែង ។
លោក អ៊ុច អ៊ុំភីនីស្សារ៉ា បានបញ្ជាក់ថា ក្នុងចំនួនភ្ញៀវទេសចរជាតិ និង ភ្ញៀវអន្តរជាតិដ៏ច្រើនសម្បើមនាឆ្នាំនេះបានកើនឡើងជាងឆ្នាំទៅម៉ិញ (២០២៤) គួរឲ្យកត់សម្គាល់ ។
សូមបញ្ជាក់ផងដែរ ក្នុងចំណោមភ្ញៀវសរុបចំនួន១,៧៤១,៧៩៥នាក់ ដែលបានធ្វើដំណើរកម្សាន្តក្នុងទឹកដីខេត្តបាត់ដំបងក្នុងពិធីបុណ្យចូលឆ្នាំថ្មីប្រពៃណីជាតិខ្មែរក្នុងឆ្នាំ២០២៥ ខាងលើនេះក្នុងនោះមានភ្ញៀវអន្តរជាតិចំនួន២,៨៨៩នាក់ ។ ហើយចំនួនភ្ញៀវអន្តរជាតិនេះ បើប្រៀបធៀបទៅនឹងឆ្នាំទៅម៉ិញ (២០២៤) ក៏មានការកើនឡើងគួរឲ្យកត់សម្គាល់ផងដែរ ។ នេះបើផ្អែកលើរបាយការណ៍បូកសរុបរបស់មន្ទីរទេសចរណ៍ខេត្ត ។
យើងងាកមកចាប់អារម្មណ៍នឹងកំណើនភ្ញៀវទេសចរជាតិ និងអន្តរជាតិ ដែលមានចំនួនកាន់តែកើនឡើងពីមួយឆ្នាំទៅមួយឆ្នាំបានធ្វើដំណើរសម្រុកចូលមកកម្សាន្តលើទឹកដីដ៏មានវ័យចំណាស់របស់ខេត្តលោកតាដំបងគ្រញូងវិញ ។
មានការកត់សម្គាល់ថា ពីមួយឆ្នាំទៅមួយឆ្នាំនៃពិធីបុណ្យចូលឆ្នាំថ្មីប្រពៃណីជាតិខ្មែរ រដ្ឋបាលនៃខេត្តនេះហាក់បានពង្រីកនូវទីតាំង«ព្រឹត្តិការណ៍សង្ក្រាន្ត» កាន់តែធំកាន់តែច្រើនកន្លែង ។ បំផុសបន្ថែមនៅតាមមូលដ្ឋានឲ្យបង្កើតព្រឹត្តិការណ៍សង្ក្រាន្តនេះ សម្រាប់ឲ្យប្រជាពលរដ្ឋចូលរួមកម្សាន្ត ។ មិនតែប៉ុណ្ណោះ គ្រប់ទីតាំងកម្សាន្ត គេបានបង្កើតឲ្យមានកម្មវិធីប្រគុំតន្ត្រី សិល្បៈរបាំគ្រប់ប្រភេទ បង្កើតឲ្យការលេងល្បែងប្រជាប្រិយប្រពៃណីខ្មែរគ្រប់បែបគ្រប់យ៉ាងនៅតាមរមនីយដ្ឋាននានា និងនៅតាមទីវត្តអារ៉ាមនានា ។
មានការតុបតែងបំពាក់លម្អរនូវភ្លើងពណ៌ចម្រុះ បំពាក់សម្ភារៈវត្ថុអនុស្សាវរីយដែលមានលក្ខណៈប្រពៃណីខ្មែរដែលជាផ្ទាំងទស្សនីយភាពដ៏ប្លែកភ្នែក ។
ជាពិសេសរដ្ឋបាលខេត្ត បានបង្កើត«តំបន់ត្រជាក់ចិត្ត» ដ៏ធំនៅចំកណ្ដាលបេះដូងក្រុងបេតិកភណ្ឌ (បាត់ដំបង) ដែលជាទីពេញចិត្ត ពេញថ្លើមយ៉ាងខ្លាំងសម្រាប់ភ្ញៀវទេសចររាប់ម៉ឺននាក់ចូលរាំលេងកម្សាន្ត ជាមួយនឹងការបាញ់ស្រោចទឹកយ៉ាងត្រជាក់ចិត្ត មុនពេលបែកគ្នាវិលត្រឡប់ទៅកាន់កេហដ្ឋានរៀងៗខ្លួន ។ នេះជាកម្មវត្ថុ ដ៏ចម្បងដែលនាំឲ្យខេត្តលោកតាដំបងគ្រញូងដ៏មានវ័យចំណាស់ និងសម្បូរបែបមួយនេះ ទទួលស្វាគមន៍ភ្ញៀវទេសចរជាតិ និងភ្ញៀវអន្តរជាតិ កាន់តែកើនឡើងពីមួយឆ្នាំទៅមួយឆ្នាំ នៅពេលមានពិធីបុណ្យប្រពៃណីជាតិធំៗម្ដងៗ ៕
ចែករំលែកព័តមាននេះ