ខេត្តកំពង់ស្ពឺ៖ ថ្ងៃទី២នៃព្រឹត្តិការណ៍សង្ក្រាន្តឆ្នាំថ្មី ឆ្នាំម្សាញ់ ខេត្តកំពង់ស្ពឺ ទទួលបានភ្ញៀវទេសចរជាតិ អន្តរជាតិ មកស្នាក់នៅ និងលេងកម្សាន្តសប្បាយតាមគោលដៅទេសចរណ៍ ប្រមាណ ជា៥៧៧,៣២៥…
ខេត្តកំពង់ស្ពឺ៖ ថ្ងៃទី២នៃព្រឹត្តិការណ៍សង្ក្រាន្តឆ្នាំថ្មី ឆ្នាំម្សាញ់ ខេត្តកំពង់ស្ពឺ ទទួលបានភ្ញៀវទេសចរជាតិ អន្តរជាតិ មកស្នាក់នៅ និងលេងកម្សាន្តសប្បាយតាមគោលដៅទេសចរណ៍ ប្រមាណ ជា៥៧៧,៣២៥ នាក់។
ប្រធានមន្ទីរទេសចរណ៍ខេត្តកំពង់ស្ពឺ លោក រស់ សុខ បាននិយាយឱ្យដឹងនៅព្រឹកថ្ងៃទី១៦ ខែមេសា ឆ្នាំ២០២៥នេះថា នៅថ្ងៃទី២នៃសង្ក្រាន្តកំពង់ស្ពឺ នាថ្ងៃទី១៥ ខែមេសា ឆ្នាំ២០២៥ មានប្រជាពលរដ្ឋ និងភ្ញៀវទេសចរ មកដើរលេងកំសាន្តក្នុងព្រឹត្តិការណ៍កំពង់ស្ពឺសង្ក្រាន្ត និងស្នាក់នៅតាមគោលដៅរមណីយដ្ឋាន សហគមន៍ទេសចរណ៍ ក្នុងខេត្តកំពង់ស្ពឺ ឆ្នាំ២០២៥ មានចំនួនសរុបប្រមាណ ៥៧៧,៣២៥ នាក់ ក្នុងនោះ ភ្ញៀវទេសចរជាតិមានចំនួន ៥៧៦,៣៥០នាក់ និងភ្ញៀវទេសចរណ៍អន្តជាតិចំនួន ៩៧៥នាក់។
ប្រធានមន្ទីរទេសចរណ៍ខេត្តកំពង់ស្ពឺ លោក រស់ សុខ បានបញ្ជាក់ថា សម្រាប់ភ្ញៀវទេសចរផ្ទៃក្នុង ដែលមកលេងកម្សាន្តព្រឹត្តិការណ៍កំពង់ស្ពឺសង្ក្រាន្តឆ្នាំ២០២៥ នាថ្ងៃទី២ មានចំនួនសរុបប្រមាណ ៥៥៥,៨០០នាក់ ក្នុងនោះ ភ្ញៀវទេសចរជាតិ ៥៥៥,០០០នាក់ និងភ្ញៀវទេសចរអន្តជាតិ ៨០០នាក់។
លោក រស់ សុខ ប្រធានមន្ទីរទេសចរណ៍ខេត្តកំពង់ស្ពឺ បានលើកឡើងថា ក្រោមការរៀបចំយ៉ាងសំបូរបែបនូវទស្សនីយភាពប្លែកៗ របស់ខេត្តកំពង់ស្ពឺ បានទាក់ទាញចំណាប់អារម្មណ៍ប្រជាពលរដ្ឋ ភ្ញៀវជាតិ អន្តរជាតិ មកលេងកម្សាន្តច្រើនលើសលប់ ខុសពីបណ្តាឆ្នាំកន្លងទៅ។ ហើយទន្ទឹមនិងការរៀបចំខាងលើនេះដែរ នៅតាមបណ្តារមណីយដ្ឋាននានា សន្ទុះភ្ញៀវ ក៏មានកើនឡើងខ្ពស់ ពិសេសរមណីយដ្ឋានកសិទេសចរណ៍ម៉ុងឬទ្ធីសែនជ័យ។
ជាមួយនិងកំណើនភ្ញៀវទេសចរណ៍ក្នុងឱកាសសង្ក្រាន្តឆ្នាំថ្មីនេះ មន្ទីរជំនាញ បានធ្វើការណែនាំទៅប្រជាសហគមន៍នៅតាមគោលដៅទេសចរណ៍ទាំងអស់ ឱ្យបង្កើនគុណភាពម្ហូបអាហារ អនាម័យ សេវាបម្រើ និងមិនឱ្យមានការឡើងថ្លៃនោះទេ ពិសេស គឺផ្ទះសំណាក់ សណ្ឋាគារផងដែរ៕
ចែករំលែកព័តមាននេះ