ពិធីបុណ្យចូលឆ្នាំថ្មី ប្រពៃណីជាតិខ្មែរ ឬមហាសង្ក្រាន្តឆ្នាំថ្មី ឆ្នាំម្សាញ់ នឹងឈានចូលមកដល់នៅថ្ងៃ ចន្ទ ទី១៤ ខែមេសា ឆ្នាំ២០២៥ វេលាម៉ោង…
ពិធីបុណ្យចូលឆ្នាំថ្មី ប្រពៃណីជាតិខ្មែរ ឬមហាសង្ក្រាន្តឆ្នាំថ្មី ឆ្នាំម្សាញ់ នឹងឈានចូលមកដល់នៅថ្ងៃ ចន្ទ ទី១៤ ខែមេសា ឆ្នាំ២០២៥ វេលាម៉ោង ៤ : ៤៨ នាទី (ជិតភ្លឺ)។ អ្វីដែលគួរឱ្យកត់សម្គាល់នោះ គឺថា ទេពធីតាព្រះនាម #គោរាគៈទេវី ជាបុត្រីទី២ របស់នៃកបិលមហាព្រហ្មទ្រង់អម្ពរពណ៌ : លឿង និងទ្រង់គង់លើ «សត្វខ្លា» ជាយានជំនិះ។
កាន់តែប្លែក និងគួរឱ្យចាប់អារម្មណ៍ គឺទេពធីតាឆ្នាំម្សាញ់ ឆ្នាំ២០២៥ ត្រង់ សោយ «ប្រេង» តើប្រេងនោះ សំដៅដល់ប្រេងអ្វីឱ្យពិតប្រាកដ សារព័ត៌មានកោះសន្តិភាព សូមជម្រាបជូនលម្អិតដូចតទៅ៖
ប្រាកដណាស់ ពិធីបុណ្យចូលឆ្នាំខ្មែរប្រពៃណីជាតិឆ្នាំម្សាញ់ សប្តស័ក ព.ស ២៥៦៩ នឹងឈានចូលមកដល់នៅថ្ងៃចន្ទ ទី១៤ខែមេសាខាងមុខនេះ។ ឆ្លៀតក្នុងឱកាសនេះ ឯកឧត្តម អ៊ឹម បុរិន្ទ អគ្គលេខា ធិការរង គណៈកម្មការរៀបចំបុណ្យជាតិ-អន្តរជាតិ និងជាអ្នកដឹកនាំគណៈកម្មាធិការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទំលាប់ខ្មែរ បានថ្លែងថាក្នុងសៀវភៅមហាសង្ក្រាន្ត ឆ្នាំម្សាញ់សប្តស័ក ព.ស 2569 គ.ស 2025 យ៉ាងដូច្នេះថា ៖ ទេពធីតាព្រះនាម #គោរាគៈទេវី ជាបុត្រីទី២ របស់នៃកបិលមហាព្រហ្ម ទ្រង់សោយតេលំ គឺ (ប្រេង) ដែលប្រេងនេះ គឺសំដៅដល់ ប្រេងល្ង ប្រេងសណ្តែក ប្រេងដូង ជាដើម។
យោងតាមសៀវភៅមហាសង្ក្រាន្ត សង្ត្រាន្តឆ្នាំថ្មី ឆ្នាំម្សាញ់សប្តស័ក ព.ស ២៥៦៩ គ.ស ២០២៥ របស់ ឯកឧត្តម អ៊ឹម បុរិន្ទ អនុប្រធានអចិន្ត្រៃយ៍គណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានលើកឡើងថា «រណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួល ទេវតានៅខាងមុខផ្ទះមួយ សម្រាប់តាំងគ្រឿងពលីការផ្សេងៗ។
ត្រូវរៀបក្រាលសំពត់ ពណ៌សឬសំពត់តាមអម្ពរទេវធីតាក៏បាន ហើយរៀបចំនូវគ្រឿងសក្ការបូជា ទេវតា មានជាអាទិ៍បាយសី៩ថ្នាក់មួយគូបាយសីពថ្នាក់មួយគូបាយសី៥ថ្នាក់មួយគូបាយសី ៣ថ្នាក់មួយគូ បាយសីប៉ាឆាមមួយគូស្លាធម៌មួយគូ ទឹកអប់មួយគូ ទៀន៥ធូប៥លាច ៥ផ្កា៥ ដាក់លើជើងពាន១គូ ចេកនួនចេកណាំវ៉ា ដាក់លើជើងពានមួយគូ ផ្លែឈើ ១១មុខ រៀបដាក់ជើងពាន១១គូ ដូងឡៅមួយគូ ទឹកស្អាតពីរកែវ។
ស្រេចហើយនៅ វេលាម៉ោងដែលទេវតាចុះមក ត្រូវជួបជុំក្រុមគ្រួសារដើម្បីថ្វាយបង្គំ ព្រះនមស្សការ ព្រះរតនៈត្រ័យ សមាទានសីល ហើយតាំងចិត្តឱ្យបានស្អាតបរិសុទ្ធជ្រះស្រឡះនូវ មន្ទិលទាំងពួងតម្កល់ចិត្ត រំពឹងគិតទៅលើព្រះពុទ្ធព្រះធម៌ព្រះសង្ឃជាទីពឹងទី រឮក លុះចប់ពិធីទទួលទេវតា។ នៅខាងដើមរានគួរមានភ្លោះមួយបាំងផង ។
ចំណុចសំខាន់មួយទៀតនោះ ដើម្បីក្តីសុខចម្រើន សូមបងប្អូនចងចាំថា «នៅគ្រប់ដង្វាយទាំងអស់ត្រូវដាក់ផ្កាម្លិះភួងពីលើគ្រប់ដង្វាយ នៅលើជើងពាន និងលើបាយសីត្រូវដោតទៀនហើយដុតបំភ្លឺ»។ សូមរីករាយពិធីបុណ្យចូលឆ្នាំប្រពៃណីជាតិខ្មែរ បើកបរដោយប្រុងប្រយ័ត្នខ្ពស់ ដើម្បីការជួបជុំគ្រួសារពោរពេញដោយសុភមង្គល៕
ចែករំលែកព័តមាននេះ