សង្ក្រាន្ត«ឆ្នាំម្សាញ់»នឹងចូលវេលាទៀបភ្លឺ! តើទេវតាឆ្នាំថ្មីមានព្រះនាមអ្វី?
- ភ្នំពេញ
រាជធានីភ្នំពេញ ៖ បុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៥ នេះនឺងប្រារព្ធឡើងរយៈពេល ៣ ថ្ងៃ គឺ ចាប់ផ្តើមពីថ្ងៃទី…
រាជធានីភ្នំពេញ ៖ បុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៥ នេះនឺងប្រារព្ធឡើងរយៈពេល ៣ ថ្ងៃ គឺ ចាប់ផ្តើមពីថ្ងៃទី ១៤ ១៥ និង១៦ ខែមេសា ដ៏ខ្លីខាងមុនេះ។ មហាសង្ក្រាន្ត ឆ្នាំម្សាញ់ នឹងចូលមកវេលាទាបភ្លឺ ថ្ងៃទី១៤ ខែមេសា ឆ្នាំ២០២៥។
យោងតាមសៀវភៅមហាសង្ក្រាន្ត សង្ត្រាន្តឆ្នាំថ្មី ឆ្នាំម្សាញ់សប្តស័ក ព.ស ២៥៦៩ គ.ស ២០២៥ របស់ ឯកឧត្តម អ៊ឹម បុរិន្ទ អនុប្រធានអចិន្ត្រៃយ៍គណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានឱ្យដឹងថា គណនាឆ្នាំម្សាញ់ឥឡូវនេះសង្ក្រាន្តចូលនៅថ្ងៃចន្ទ ២រោចខែចេត្រ ត្រូវនឹង ថ្ងៃទី១៤ ខែមេសា គ្រឹស្តសករាជ២០២៥ វេលាម៉ោង០៤ម៉៤៨នាទី។
ពេលនោះព្រះ អាទិត្យចេញពីមីនរាសី ទៅឋិតនៅឯមេសរាសី តាមផ្លូវគោវិថី គឺផ្លូវកណ្តាលមានទេវ ធីតាមួយព្រះអង្គជាមគ្គនាយិកាព្រះនាម គោរាគៈទេវី ជារាជបុត្រីទី២នៃកបិល មហាព្រហ្ម គង់នៅចាតុម្មហារាជិកា។
បើតាមតម្រាទេពធីតាមហាសង្ក្រាន្ត ៖ បើសង្ក្រាន្តចំថ្ងៃ ចន្ទ័ នោះទេពធីតាព្រះនាម គោរាគៈទេវី ជាបុត្រីទី ២ នៃកបិលមហាព្រហ្ម។ ដោយ៖ ទ្រង់អម្ពរពណ៌ : លឿង លម្អព្រះការណ៌ : ទ្រង់សៀតផ្កាអង្គាបុស្ប អាភរណៈ : ទ្រង់ពាក់កែវមុក្តា ភក្សាហារ : ទ្រង់សោយតេលំ (ប្រេង) ព្រះហត្ថស្តាំ : ទ្រង់ព្រះខ័នព្រះហត្ថឆ្វេង : ទ្រង់ឈើច្រត់ ពាហនៈ : ព្យគ្ឃៈ (ស្តេចខ្លា) ជាយានជំនិះ បន្ទាប់ទើបទ្រង់នាំអស់ទេវបុត្រទេវធីតាទាំងមួយសែនកោដិហោះទៅ កាន់គុហាកែវ ធម្មមាលី នាទីភ្នំកៃលាស ខេត្តហិមពាន្ត ជាទីតំកល់ទុកនូវព្រះសិរសា កបិលមហាព្រហ្ម ដែលតំកល់លើពានមាសនាំមកដង្ហែប្រទក្សិណ ភ្នំព្រះសុមេរុរាជ តាមផ្លូវព្រះអាទិត្យចរចំនួន៦០នាទី។
ទើបនាំយកទៅតម្កល់ទុកកន្លែងដើមវិញហើយ ប្រជុំទេវបុត្រទេវធីតាទាំងមួយសែនកោដិចូលទៅស្រង់ទឹកអនោតត្តមហាស្រះ ដែលមានទឹកហូរចេញពីបំពង់ថ្មកែវ ដែលជាមាត់គោឧសភរាជទាំង៧ ត្រជាក់ក្សេមក្សាន្ត ព្រះរាជហឫទ័យ ហើយនាំគ្នាចូលទៅសមាទានរក្សាសីលដោយសោមនស្សរីករាយគ្រប់ៗ ព្រះអង្គក្នុងភគវតីសភា សាលាដែលព្រះវិស្សកម្មទេវបុត្រនិមិត្តថ្វាយ ដើម្បីបន្ទោបង់អពមង្គលឱ្យជ្រះស្រឡះ ហើយចម្រើននូវសិរីសួស្តីជ័យមង្គលជន្មាយុយឺនយូរ ដល់ទេវតានិងមនុស្សសត្វផងទាំងឡាយ តាំងពីឆ្នាំថ្មីចូលមកនេះបានទូលំទូលាយសុខក្សេមក្សាន្តតរៀងទៅ។
ថ្ងៃចន្ទ ២រោច ខែចេត្រ ត្រូវនឹងថ្ងៃទី១៤ខែមេសាគ.ស.២០២៥វេលាម៉ោង០៨ និង៤៨នាទីទៀបភ្លឺ ជាថ្ងៃចូលឆ្នាំ (វារៈមហាសង្ក្រាន្ត)។
ថ្ងៃអង្គារ៣រោចខែចេត្រត្រូវនឹងថ្ងៃទី១៥ ខែមេសាគ.ស.២០២៥ជាវារៈវន័បត។ ថ្ងៃពុធ ៤រោច ខែចេត្រត្រូវនឹងថ្ងៃទី១៦ ខែមេសាគ.ស.២០២៥វេលា ម៉ោង០៨ និង២៧នាទី ៣៦វិនាទី ជាវារៈឡើងស័ក គម្រប់ជាសង្ក្រាន្តបីថ្ងៃ ស្រេចបរិបូណ៌ចូល ជាសកល ឆ្នាំម្សាញ់ សប្តស័ក មហាសករាជ ១៩៤៧ ចុល្លសករាជ ១៣៨៧តទៅ។
នៅក្នុងឱកាសសង្ក្រាន្តទាំងបីថ្ងៃ សូមអស់ប្រជាពលរដ្ឋប្រុសស្រីផងទាំងឡាយ រៀបចំពលីការ គ្រឿងសក្ការបូជា អុចប្រទីបជ្វាលាថ្វាយព្រះរតន ត្រ័យ និងទទួល ស្វាគមន៍ ទេវបុត្រទេវធីតាឆ្នាំថ្មី ហើយខំលះបង់ចិត្តអាក្រក់អន្យតិរីយជាចិត្តអប្រីយ៍ ជាប់ដោយគំនុំគុំគួនព្យាបាទឈ្នានីសដែលកើតមាន ក្នុងឆ្នាំចាស់ឱ្យជ្រះស្រឡះ តាំង ចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និង បញ្ញា ធ្វើបុណ្យ សុន្ទរ៍ទានតាមប្រពៃណី រក្សាសីលប្រាំឱ្យបានជាប់ជានិច្ច នោះទេវតានឹងឱ្យពរសព្ទ សាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មី នេះតរៀងទៅ៕
ចែករំលែកព័តមាននេះ