ខេត្តកំពង់ស្ពឺ ៖ ដើម្បីសង្គ្រោះសាលារៀនមួយកន្លែងចេញពីការលិចលង់ដោយទឹកកាកសំណល់នៃរោងចក្រ ជះក្លិនស្អុយ ប៉ះពាល់បរិស្ថាន និងការរស់នៅ អាជ្ញាធរខេត្តកំពង់ស្ពឺ នៅរសៀលថ្ងៃទី១១ ខែមេសា ឆ្នាំ២០២៥នេះ…
ខេត្តកំពង់ស្ពឺ ៖ ដើម្បីសង្គ្រោះសាលារៀនមួយកន្លែងចេញពីការលិចលង់ដោយទឹកកាកសំណល់នៃរោងចក្រ ជះក្លិនស្អុយ ប៉ះពាល់បរិស្ថាន និងការរស់នៅ អាជ្ញាធរខេត្តកំពង់ស្ពឺ នៅរសៀលថ្ងៃទី១១ ខែមេសា ឆ្នាំ២០២៥នេះ បានសម្រេចយកគ្រឿងចក្រជីកកាយបើកមុខលូ ដើម្បីបង្វែរមុខទឹកមួយផ្នែកធំ ។
នាយករងរដ្ឋបាលសាលាខេត្តកំពង់ស្ពឺ លោក ជេត ដុំ បាននិយាយឱ្យដឹងថា អភិបាលខេត្តកំពង់ស្ពឺ ឱ្យពន្លឿនការដោះស្រាយឱ្យបានឆាប់ជុំវិញករណីទឹកស្អុយលិចលង់បរិវេណវិទ្យាល័យ ហ៊ុន សែន អង្គមេត្រី ស្ថិតក្នុងភូមិអង្គមេត្រី ឃុំរលាំងគ្រើល ស្រុកសំរោងទង ខេត្តកំពង់ស្ពឺ ដែលនាំឱ្យមានផលរំខានដល់ការរៀនសូត្ររបស់សិស្សានុសិស្សឬក៏អាចឈានដល់ការបិទសាលាពេលដែលជំនន់ទឹកស្អុយចូលមកដល់។
នាយករងរដ្ឋបាលខេត្តកំពង់ស្ពឺ លោក ជេត ដុំ បានបន្ថែមថា ដើម្បីរក្សាបាននូវនិរន្តរភាពនៃការសិក្សារបស់សិស្ស អាជ្ញាធរ និងមន្ទីរពាក់ព័ន្ធ ត្រូវដោះស្រាយកង្វល់នេះឱ្យមានប្រសិទ្ធិភាព។ នៅចំពោះមុខមន្ទីរសាធារណការ និងដឹកជញ្ជូន និងមន្ទីរធនធានទឹកនិងឧតុនិយមខេត្តកំពង់ស្ពឺ រួមនឹងអាជ្ញាធរទាំង២គឺ ស្រុកសំរោងទង និងស្រុកគងពិសី បានយកគ្រឿងចក្រកាយដីបើកមុខទឹកត្រង់PK8+650ម៉ែត្រ បង្វែរចរន្តទឹកមួយផ្នែកប៉ុន្មាន៦០% ឆ្ពោះទៅភូមិព្រៃតាអុក ឃុំរកាកោះស្រុកគងពិសី និងបន្តកាយប្រឡាយក្នុងបរិវេណសាលាអង្គមេត្រីដើម្បីឱ្យទឹកហូរចេញពីទីធ្លាសាលា។ មន្ទីរធនធានទឹក ត្រូវស្ដារប្រឡាយមួយខ្សែប្រវែង ៩៦០ម៉ែត្រ តភ្ជាប់ត្រង់PK8+650ម៉ែត្រ ត្រង់ផ្លូវជាតិលេខ៤១ ឆ្ពោះទៅភូមិព្រៃតាអូបឃុំរកាកោះស្រុកគងពិសីឱ្យបានរួចរាល់មុនថ្ងៃទី២៦ ខែមេសា ឆ្នាំ២០២៥។
ទន្ទឹមនេះ មន្ទីរសាធារណការ និងដឹកជញ្ជូន ក៏ត្រូវសិក្សាគំនូសប្លង់បច្ចេកទេសក្នុងការបង្វែរទឹកជាអចិន្ត្រៃយ៍ពីចំណុច PK7+267 ឆ្ពោះទៅប្រឡាយមហាហង្ស ឬទៅអូរអាចម៌ទន្សាយ ក្នុងឃុំសែនដី ស្រុកសំរោងទង ឱ្យបានរួចរាល់តាមការគ្រោងទុក។
ក្រៅពីនេះ អាជ្ញាធរស្រុកទាំង២ ត្រូវកោះអញ្ជើញតំណាងរោងចក្រទាំង១២ ដែលស្ថិតក្នុងដែនសមត្ថកិច្ចរបស់ខ្លួន មកពិភាក្សាក្នុងការរៀបចំអាងប្រព្រឹត្តិកម្មទឹកកខ្វក់បន្ទាប់ពីចូលឆ្នាំខ្មែររួច ធ្វើយ៉ាងណាបញ្ឈប់ការបង្ហូរកាកសំណល់កខ្វក់ចេញមកទីសាធារណៈបន្តទៀត ហើយក្នុងករណីមិនស្តាប់តាមការណែនាំ ត្រូវពិន័យរដ្ឋបាលជាដាច់ខាត និងមិនលើកលែងឡើយ៕
ចែករំលែកព័តមាននេះ