រាជធានីភ្នំពេញ ៖ ក្រសួងបរិស្ថានបានចេញសេចក្តីប្រកាសមួយ ដោយបានបញ្ជាក់ពីការកំពុងសហការយ៉ាងជិតស្និទ្ធជាមួយក្រសួង ស្ថាប័ន គណៈបញ្ជាការឯកភាពរដ្ឋបាលខេត្ត និងសមត្ថកិច្ចពាក់ព័ន្ធគ្រប់លំដាប់ថ្នាក់ ស្វែងរកជនល្មើស និងអ្នកពាក់ព័ន្ធនៃអំពើល្មើសច្បាប់ដែលបានបាញ់មកលើមន្ត្រីអនុវត្តច្បាប់នៅខេត្តមណ្ឌលគិរី ។…
រាជធានីភ្នំពេញ ៖ ក្រសួងបរិស្ថានបានចេញសេចក្តីប្រកាសមួយ ដោយបានបញ្ជាក់ពីការកំពុងសហការយ៉ាងជិតស្និទ្ធជាមួយក្រសួង ស្ថាប័ន គណៈបញ្ជាការឯកភាពរដ្ឋបាលខេត្ត និងសមត្ថកិច្ចពាក់ព័ន្ធគ្រប់លំដាប់ថ្នាក់ ស្វែងរកជនល្មើស និងអ្នកពាក់ព័ន្ធនៃអំពើល្មើសច្បាប់ដែលបានបាញ់មកលើមន្ត្រីអនុវត្តច្បាប់នៅខេត្តមណ្ឌលគិរី ។
ជនល្មើសទាំងនោះ គឺជាក្រុមព្រានព្រៃប្រដាប់អាវុធដែលបានបាញ់មកលើមន្ត្រីឧទ្យានុរក្សការពារដែនជម្រកសត្វព្រៃស្រែពក ។ យោងតាមសេចក្តីប្រកាសនៅថ្ងៃទី៨ ខែមេសា ឆ្នាំ២០២៥ របស់ក្រសួងបរិស្ថានបានឱ្យដឹងថា នៅតំបន់ការពារធម្មជាតិក្នុងភូមិសាស្ត្រខេត្តមណ្ឌលគិរី មានករណីជនល្មើសបាញ់មកលើមន្ត្រីអនុវត្តច្បាប់ និងបណ្ដាលឱ្យបាត់បង់អាយុជីវិតចំនួន៣រូប ក្នុងឆ្នាំ២០១៨ ។
រីឯថ្មីៗកន្លងមកនេះ មានករណីជនល្មើសបាញ់មកលើមន្ត្រីឧទ្យានុរក្សដែលកំពុងបំពេញបេសកកម្មល្បាតក្នុងដែនជម្រកសត្វព្រៃស្រែពក ក្នុងភូមិសាស្ត្រខេត្តមណ្ឌលគិរី និងមានការផ្សព្វផ្សាយតាមបណ្តាញព័ត៌មានសង្គមថែមទៀត ។
ក្រសួងបរិស្ថាន បានបញ្ជាក់ជុំវិញបញ្ហានេះថា «ជនល្មើសបានបាញ់មកលើមន្ត្រីអនុវត្តច្បាប់នៅខេត្តមណ្ឌលគិរីជាអំពើដ៏ឃោរឃៅ ដោយប្រើប្រាស់អាវុធខុសច្បាប់ដើម្បីរារាំង និងគំរាមកំហែងដល់អាយុជីវិតមន្ត្រីអនុវត្តច្បាប់ ដែលកំពុងបំពេញភារកិច្ចក្នុងបុព្វហេតុការពារនិងអភិរក្សធនធានធម្មជាតិ» ។
ក្នុងករណីនេះ ក្រសួងបរិស្ថានបានធ្វើការថ្កោលទោសយ៉ាងដាច់អហង្ការចំពោះជនល្មើសដែលបានបាញ់មកលើមន្ត្រីអនុវត្តច្បាប់ ដែលបាននិងកំពុងបំពេញតួនាទីក្នុងនាមជាមន្ត្រីទទួលបន្ទុកគ្រប់គ្រងតំបន់ការពារធម្មជាតិ និងបានអំពាវនាវដល់អាជ្ញាធរមានសមត្ថកិច្ចគ្រប់លំដាប់ថ្នាក់ និងប្រជាពលរដ្ឋ សហការជាមួយក្រសួងបរិស្ថាន ដើម្បីចាប់ជនល្មើសនាំយកមកផ្តន្ទាទោសច្បាប់ជាធរមាន ៕
ចែករំលែកព័តមាននេះ