ទីក្រុងប្រ៊ុចសែល៖ បន្ទាប់ពីលោកត្រាំប្រកាសព្យួរទុកការដំឡើងពន្ធទៅលើទំនិញប្រទេសនានាទូទាំងពិភពលោករួមទាំងសហភាពអឺរ៉ុបផងដែរនោះ អឺរ៉ុបក៏ប្រកាសព្យួរទុកដូចគ្នានូវការដំឡើងពន្ធទៅលើទំនិញរបស់អាមេរិក។ អាចនិយាយបានថាជាការដកថយ១ជំហានម្នាក់។ នេះបើតាមការបញ្ជាក់របស់ប្រធានគណៈកម្មការអឺរ៉ុបលោកស្រីឡីយេន (Leyen)។
មុនពេលដកថយ១ជំហាន អឺរ៉ុបប្រុងចាត់ការដំឡើងពន្ធអាមេរិកដើម្បីប្រមូលលុយពន្ធឱ្យបានជាង២៣ពាន់លានដុល្លារត្រឡប់មកវិញ។ អឺរ៉ុបត្រៀមអនុវត្តវិធានការនេះនៅថ្ងៃអង្គារសប្ដាហ៍ក្រោយដើម្បីឆ្លើយតបទៅលោកត្រាំដែលដំឡើងពន្ធអឺរ៉ុប២៥%លើដែក និងអាលុយមីញ៉ូម។
ទោះបីព្យួរពន្ធក៏ដោយ ក៏អឺរ៉ុបកំពុងត្រៀមវិធានការថ្មីៗជាបន្តទៀតដែលលោកត្រាំរក្សាទុកការដំឡើងពន្ធទៅលើរថយន្ត។ លោកស្រីឡីយេនបង្ហោះសារនៅលើបណ្ដាញអ៊ិចថា «យើងចង់បង្កើតឱកាសសម្រាប់ការចរចាគ្នា។ គម្រោងដំឡើងពន្ធទៅលើទំនិញអាមេរិកនោះត្រូវអឺរ៉ុបសម្រេចរួចហើយ។ គ្រាន់តែថាអឺរ៉ុបចង់ព្យួរទុកផែនការនេះ១អន្លើសិនរយៈពេល៩០ថ្ងៃ»។
លោកត្រាំព្យួរទុកការដំឡើងពន្ធធ្វើឱ្យពិភពលោកមានដង្ហើមដកបានស្រួលបន្តិច។ ទីផ្សារភាគហ៊ុនធំៗនៅលើពិភពលោកនៅទ្វីបអាស៊ី និងអាមេរិកក៏បានគ្រាន់បើជាងថ្ងៃម្សិលមិញផងដែរ។ នៅអឺរ៉ុប តម្លៃមូលប័ត្របំណុលរបស់រដ្ឋាភិបាលនៅប្រទេសប្រើប្រាស់ក្រដាសប្រាក់អឺរ៉ូក៏ចាប់ផ្ដើមឡើងថ្លៃវិញផងដែរ។ សកម្មភាពជួញដូរភាគហ៊ុននៅតាមទីផ្សារមូលប័ត្រមានសម្ទុះជាធម្មតា។
លោកស្រីឡីយេនថ្លែងថាចំណាត់ការរបស់លោកត្រាំកាលពីយប់មិញធ្វើឱ្យស្ថានភាពសេដ្ឋកិច្ចពិភពលោកវិលមករកស្ថិរភាពឡើងវិញ។ ប៉ុន្តែលោកស្រីព្រមានថាបញ្ហាប្រឈមនៅតែអាចកើតមានសាជាថ្មី។ លោកស្រីថ្លែងថាបើការចរចាគ្នាមិនអាចសម្រេចបានលទ្ធផលគួរជាទីពេញចិត្តទេ វិធានការឆ្លើយតបរបស់យើងត្រូវតែអនុវត្ត។ អឺរ៉ុបត្រៀមដាក់ចេញវិធានការឆ្លើយតបជាបន្តបន្ទាប់។ ដូចដែលលោកស្រីជម្រាបជូនតាំងពីមុននេះអីចឹងគឺថាអឺរ៉ុបបានដាក់ជម្រើសទាំងអស់នៅលើតុ។
តាមពិត លោកត្រាំនៅតែដំឡើងពន្ធដដែលទេ។ គ្រាន់តែថាការដំឡើងពន្ធលើកចុងក្រោយនេះត្រូវលោកព្យួរទុកសិន។ ដោយឡែក ពន្ធ១០%ដែលដំឡើងសម្រាប់ទំនិញទូទៅគ្រប់ប្រទេសទាំងអស់នោះនៅរក្សាទុកដដែល។ នេះបើយោងតាមការបញ្ជាក់របស់សេតវិមាន។ ទំនិញខ្លះដូចជាឡាន ដែក និងអាលុយមីញ៉ូមក៏លោកត្រាំមិនបានប្រកាសព្យួរទុករយៈពេល៩០នោះទេ។
កាណាដា និងម៉ិកស៊ីកូនឹងជាប់ពន្ធ២៥%ដដែលទៅលើគ្រប់មុខទំនិញទាំងអស់បើពួកគេមិនអាចទប់ស្កាត់គ្រឿងញៀនដូចការសន្យា។ ប្រភពខ្លះបង្ហើបឱ្យដឹងថានៅក្នុងចំណោមមុខទំនិញរបស់អាមេរិកដែលអឺរ៉ុបមានគម្រោងដំឡើងពន្ធនោះមានដូចជាពោត ស្រូវសាលី ម៉ូតូ សាច់សត្វបក្សី ផ្លែឈើ និងសំលៀកបំពាក់។ ពន្ធទៅលើទំនិញទាំងនេះព្យួរទុក៩០ថ្ងៃសិន៕
ចែករំលែកព័តមាននេះ