ខេត្តកំពង់ចាម ៖ បុរសជនជាតិបារាំងម្នាក់ ឈ្មោះគេថា ឲ្យវ៉ាំង សង់ អាយុ១៩ឆ្នាំ បានភ្លក្សរសជាតិនំបញ្ចុកខ្មែរ ដោយឥតគិតថ្លៃ ហើយមានអារម្មណ៍…
ខេត្តកំពង់ចាម ៖ បុរសជនជាតិបារាំងម្នាក់ ឈ្មោះគេថា ឲ្យវ៉ាំង សង់ អាយុ១៩ឆ្នាំ បានភ្លក្សរសជាតិនំបញ្ចុកខ្មែរ ដោយឥតគិតថ្លៃ ហើយមានអារម្មណ៍ និងទឹកមុខស្រស់ញញឹមថែមទាំងលើកឡើងថា មានរសជាតិឆ្ងាញ់ ។ ដោយគាត់បានចូលរួមក្នុងកម្មវិធីទទួលទាននំបញ្ចុកដោយឥតគិតថ្លៃធ្វើឡើង នារសៀលថ្ងៃទី១៤ មេសា ឆ្នាំ២០២៥ នៅវត្តប្រាសាទនគរបាជ័យក្រៅ ក្នុងឃុំអំពិល ស្រុកកំពង់សៀម ។ សម្រាប់ទិដ្ឋភាពនេះឃើញថា មានពលរដ្ឋក្មេងចាស់ប្រុសស្រីបានចូលរួមច្រើនកុះករទៀតផង ។
អ្នកស្រីសាយ ណៃអ៊ីម អាយុ៤០ឆ្នាំ រស់នៅភូមិជង្ហុក ដែលមានទីលំនៅមិនឆ្ងាយប៉ុន្មានពីវត្តបានលើកឡើងថា: ក្រោមការរៀបចំរបស់ព្រះគ្រូសេង រដ្ឋា ព្រះចៅអធិការវត្តនគរបាជ័យក្រៅ ដោយចលនាតាមរយៈបងប្អូនពុទ្ធបរិស័ទចំណុះជើងវត្តជិតឆ្ងាយ គឺមានការចូលរួមផលផុសដោយម្នាក់ៗបាននាំគ្នាចូលបច្ច័យ ដើម្បីទិញនំបញ្ចុកសម្រាប់ឲ្យបងប្អូនប្រជាពលរដ្ឋជិតឆ្ងាយដែលមកកម្សាន្តលេងនៅវត្តនគរបាជ័យក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នារសៀលថ្ងៃទី១៤ មេសា ដែលមានទម្ងន់ប្រមាណជិត២០០គីឡូក្រាម ដោយឥតគិតថ្លៃ ។
អ្នកស្រីណៃអ៊ីម បានបន្តឲ្យដឹងទៀតថា ជាក់ស្ដែងនៅថ្ងៃបុណ្យចូលឆ្នាំទីមួយនេះ គាត់រួមជាមួយនឹងមិត្តស្រី ជាច្រើននាក់ ព្រមទាំងបងប្អូនអ្នកភូមិបាននាំគ្នាមកចូលរួមលេងល្បែងប្រជាប្រិយបុរាណរបស់ខ្មែរយើងដែលបន្សល់ទុកតាំងពីបុរាណកាលមកដល់សព្វថ្ងៃក្នុងនោះរួមមានដូចជា ៖ លាក់កន្សែង ចោលឈូង ទាញព្រាត់ និងល្បែងហ្គេមកម្សាន្តជាច្រើនទៀត ដើម្បីបង្កើតភាពសប្បាយហើយកម្មវិធីនេះត្រូវបានរៀបចំដឹកនាំដោយព្រះចៅអធិការវត្តព្រមទាំងគណៈកម្មការអាចារ្យវត្ត ។
ហើយការទទួលទានភ្នំបញ្ចុកដោយឥតគិតថ្លៃនេះ គឺធ្វើឡើងរយៈពេលពីរថ្ងៃ គឺថ្ងៃទី១៤ និង១៥ មេសា លុះថ្ងៃទី១៦ មេសា ថ្ងៃបង្ហើយ គឺរៀបចំការទទួលទានបង្អែមដោយឥតគិតថ្លៃបន្ថែមទៀត ។ សម្រាប់ទិដ្ឋភាពដែលអ្នកស្រីបានឃើញដោយផ្ទាល់ភ្នែកឃើញថា មានបងប្អូនជាច្រើនមកចូលរួមលេងសប្បាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរជាមួយនោះសង្ឃឹមថា នៅឆ្នាំ២០២៦ ព្រះគ្រូចៅអធិការវត្តនិងបង្កើតឲ្យមានប្រតិការណ៍សប្បាយជាងនេះបន្ថែមទៀត ។
លោក ឃួន ឃុន អាយុ៤៦ឆ្នាំ អ្នកនៅក្រុងកំពង់ចាម បានរៀបរាប់ថា ដំបូងគាត់បានមកចូលរួមកម្មវិធីដើរកម្សាន្តលេងមុខសាលាខេត្តកំពង់ចាម នារសៀលថ្ងៃទី១៤ មេសា ជាមួយនឹងប្រពន្ធបន្ទាប់មកក៏បាននាំគ្នាបន្តដំណើរតាមមធ្យោបាយយានជំនិះមកកាន់វត្តប្រាសាទនគរបាជ័យក្រៅ ។ ដោយជារៀងរាល់ឆ្នាំគាត់តែងតែមកលេងនៅតំបន់រមណីយដ្ឋានមួយនេះមិនដែលអាក់ខានម្ដងណាឡើយ ។
ចំណែកលោក អ៊ុន សុផល អនុប្រធានបន្ទីរធម្មការ និងសាសនាខេត្តវិញមានប្រសាសន៍ឲ្យដឹងដែរថា ដោយមានការណែនាំពីប្រមុខរាជរដ្ឋាភិបាលកម្ពុជាបានឲ្យរដ្ឋបាលខេត្តនីមួយៗដឹកនាំបង្កើតនៅភាពសប្បាយរីករាយដល់បងប្អូនប្រជាពលរដ្ឋ ។
ជាក់ស្ដែង នៅមុខសាលាខេត្តថ្ងៃចូលឆ្នាំដំបូងទី១៤ មេសា ច្រើនកុះករមកលេងក្រោមការយកចិត្តទុកដាក់ពីសំណាក់ឯកឧត្តមអ៊ុន ចាន់ដាអភិបាលខេត្ត ឱ្យស្រុក-ក្រុងក្នុងខេត្តកំពង់ចាម បង្កើតនៅព្រឹត្តិការណ៍សង្ក្រាន្តគ្រប់ទីកន្លែង ។
ជាមួយនោះ ក្នុងឱកាសបុណ្យចូលឆ្នាំប្រពៃណីជាតិខ្មែររូបលោកតែងតែនាំប្រពន្ធកូនមកលេងនៅវត្តប្រាសាទនគរបាជ័យក្រៅ ឃើញថា បងប្អូននាំគ្នាលេងល្បែងប្រជាប្រិយទាញព្រាត់ ចោលឈូង នេះដើម្បីបង្ហាញពីអត្តសញ្ញាណប្រពៃណីរបស់ខ្មែរយើងមិនឲ្យបាត់បង់ ។
ជាក់ស្ដែង ការទទួលទាននំបញ្ចុកដែលឥតគិតថ្លៃនេះ កើតចេញពីចិត្តជ្រះថ្លារបស់បងប្អូនប្រជាពលរដ្ឋ ដើម្បីបង្កើតនូវភាពសប្បាយរីករាយហើយពីវត្តអារាមក៏ជាមជ្ឈមណ្ឌលមួយសម្រាប់ផ្ទុកនៅវប្បធម៌ប្រពៃណីទៀតផង ៕
ចែករំលែកព័តមាននេះ