រាជធានីភ្នំពេញ ៖ ដងសន្ទូច សម្រាប់ស្ទូចថ្មបេតុង ដែលដាក់ទប់តាមមាត់ប្រឡាយស្ពានដែក ស្ទឹងមានជ័យ ស្រាប់តែផុងដី ផ្អៀងមួយចំហៀង រម្លំដងស្ទូចប្រហែល ៥០ម៉ែត្រ…
រាជធានីភ្នំពេញ ៖ ដងសន្ទូច សម្រាប់ស្ទូចថ្មបេតុង ដែលដាក់ទប់តាមមាត់ប្រឡាយស្ពានដែក ស្ទឹងមានជ័យ ស្រាប់តែផុងដី ផ្អៀងមួយចំហៀង រម្លំដងស្ទូចប្រហែល ៥០ម៉ែត្រ សង្កត់ទៅលើសំយាបផ្ទះប្រជាពលរដ្ឋ រងការខូចខាតចំនួន ០៤ល្វែង និងម៉ូតូ០១គ្រឿង ។
ហេតុការណ៍នេះ បង្កការភ្ញាក់ផ្អើលឡើងកាលវេលាម៉ោង០៤និង៣០នាទីល្ងាចថ្ងៃទី១០ ខែមេសា ឆ្នាំ២០២៥ ស្ថិតនៅតាមបណ្ដោយមាត់ប្រឡាយស្ពានដែក សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋ បានអោយដឹងថា គាត់បានឃើញគ្រឿងចក្រ ស្ទូចលើកបេតុង ដើម្បីសង្កត់តាមមាត់ប្រឡាយ ជាធម្មតាដូចសព្វមួយដង។ ខណៈពេលកំពុងស្ទូចថ្មបេតុង ទៅសង្កត់តាមមាត់ប្រឡាយបន្តទៀតនោះ ស្រាប់តែគ្រឿងចក្រ ផុងដីមួយចំហៀង បណ្ដាលអោយរម្លំ បាក់ដងសន្ទូច ប្រវែងប្រហែល៥០ម៉ែត្រ សង្កត់មកលើសំយាបផ្ទះប្រជាពលរដ្ឋ និងម៉ូតូបណ្ដាលអោយខូចខាត សំណាងល្អមិនបង្កគ្រោះថ្នាក់ដល់មនុស្សទេ ។
ក្រោយកើតហេតុ តំណាងក្រុមហ៊ុន បានមកធ្វើការសម្របសម្រួលដោះស្រាយសំណង ជាមួយពលរដ្ឋរងគ្រោះ និងដាក់កម្លាំងជាងចុះកាត់ដងស្ទូចយកចេញពីទីតាំងកើតហេតុ ដើម្បីធ្វើការជួសជុលឡើងវិញ ៕
ចែករំលែកព័តមាននេះ