រាជធានីភ្នំពេញ ៖ ស្ត្រីចំណាស់ជាអ្នករស់នៅខេត្តព្រៃវែងម្នាក់ បានមកស្នាក់នៅផ្ទះជួលជាមួយកូនប្រុសពៅដែលជាកម្មកររោងចក្រនៅរាជធានីភ្នំពេញ បានរយៈពេលជាង១ខែហើយ ប៉ុន្តែគាត់មិនបានស្គាល់ពីតំបន់ផ្ទះជួលនោះច្បាស់ទេ ។ ខណៈដែលកូនចេញទៅធ្វើការបាត់គាត់ចេញទៅទិញម្ហូបនៅផ្សារ ដើម្បីទុកឲ្យកូនបរិភោគនៅពេលកូនចេញពីធ្វើការវិញ ប៉ុន្តែក្រោយពេលទិញម្ហូបរួចរាល់ ស្រាប់តែវង្វេងរកផ្លូវទៅផ្ទះជួលនោះវិញអត់ឃើញសោះ ។ ពេលនោះគាត់បានដើររក តាំងពីវេលាល្ងាចរហូតដល់វេលាយប់ពាក់កណ្ដាលអធ្រាត្រតែមិនឃើញសោះ ក្រោយមកអ្នកភូមិបានឃាត់ឲ្យគាត់នៅមួយកន្លែង បន្ទាប់មកបានដឹកយកទៅប្រគល់ឲ្យនគរបាល ហើយដោយយប់ជ្រៅទៅហើយទើបនគរបាលក៏បាននាំបន្តទៅកាន់សាលាសង្កាត់ចោមចៅទី២ដើម្បីឲ្យគាត់សម្រាកនៅទីនោះ១យប់សិន ដើម្បីស្រាវជ្រាវរកកូនឲ្យទៅទទួលយកវិញ ។
គាត់ត្រូវបានអ្នកភូមិប្រទះឃើញដើរតាមផ្លូវកាលពីវេលាម៉ោង១២យប់ពាក់កណ្ដាលអាធ្រាត្រថ្ងៃទី០៩ ខែមេសា ឆ្នាំ២០២៥ នៅក្នុងភូមិសាស្ត្រសង្កាត់ចោមចៅទី២ ខណ្ឌពោធិ៍សែន រាជធានីភ្នំពេញ ។
ស្ត្រីខាងលើបានប្រាប់ថា គាត់ឈ្មោះកែម សៀន អាយុ៧៦ឆ្នាំ រស់នៅភូមិបេង ឃុំពូន ស្រុកកញ្ជ្រៀច ខេត្តព្រៃវែង គាត់មានកូនចំនួន៧នាក់ក្នុងនោះកូនប្រុសចំនួន៣នាក់ និងកូនស្រីចំនួន៤នាក់ ។ គាត់បានចាកចេញពីស្រុកកំណើតរយៈពេលជាង១ខែកន្លងមកហើយ គឺមកស្នាក់នៅបន្ទប់ផ្ទះជួលជាមួយកូនប្រុសពៅរបស់គាត់ម្នាក់ឈ្មោះលី ឡឹង អាយុ៣២ឆ្នាំ មុខរបរកម្មកររោងចក្រស្ថិតនៅនៅខាងលិចផ្សារទួលពង្រ ភូមិត្រពាំងរំចេក សង្កាត់ចោមចៅទី១ ។
គាត់បានប្រាប់ទៀតថា ពេលស្នាក់នៅជាមួយកូនប្រុសពៅខាងលើរយៈពេលជាង១ខែមកនេះ គាត់មិនបានស្គាល់តំបន់នោះច្បាស់ឡើយ ព្រោះភាគច្រើនស្ថិតនៅតែក្នុងបន្ទប់ជួលប៉ុណ្ណោះ មិនសូវបានចេញក្រៅទេដោយខ្លាចវង្វេងផ្លូវ ។ ដោយឡែកនៅវេលាល្ងាចថ្ងៃទី០៩ ខែមេសា ឆ្នាំ២០២៥ គាត់បានដាច់ចិត្តប្រថុយចេញទៅផ្សារទួលពង្រ ភូមិទួលពង្រ សង្កាត់ចោមចៅទី១ ដើម្បីរកទិញម្ហូបទុកសម្រាប់ឲ្យកូនប្រុសពៅបរិភោគពេលចេញពីធ្វើការវិញ ។
លោកយាយកែម សៀនបាននិយាយបន្តថា ក្រោយពេលទិញម្ហូបបានហើយ ស្រាប់តែវង្វេងរកផ្លូវទៅផ្ទះជួលនោះវិញអត់ឃើញសោះ មិនដឹងថាត្រូវទៅតាមផ្លូវណាផ្លូវណីឡើយ គាត់ក៏បានព្យាយាមខំដើររក ប៉ុន្តែទោះជាយ៉ាងណាក៏រកមិនឃើញដែរ កាន់តែរកគឺកាន់តែវង្វេង ។ គាត់ហាក់អស់សង្ឃឹមខ្លាំងណាស់ គាត់ដើររករហូតដល់យប់ពាក់កណ្ដាលអាធ្រាត្រ ក៏ត្រូវបានអ្នកភូមិឃាត់សួរនាំដឹងរឿងរួចបានដឹកយកទៅប្រគល់ឲ្យនគរបាលប៉ុស្តិ៍ចោមចៅទី២ ដើម្បីជួយស្រាវជ្រាវរកផ្ទះជួលនិងរកកូនប្រុសគាត់ផងដែរ ។
លោកយាយប្រាប់ឲ្យដឹងបន្ថែមថាក្រោយមកដោយយប់ជ្រៅទៅហើយនោះនគរបាលក៏បានដឹកគាត់ទៅឲ្យសម្រាកនៅឯសាលាសង្កាត់ចោមចៅទី២ ១យប់សិន គាត់ក៏បានសម្រាកនៅទីនោះ១យប់ និងរង់ចាំកូនប្រុសពៅឈ្មោះលី ឡឹង ទៅយកត្រលប់ទៅផ្ទះវិញ ។ គាត់ថា នេះគឺជាលើកទី២ហើយដែលគាត់វង្វេងផ្ទះបែបនេះ ដោយកាលពីប៉ុន្មានខែមុនពេលមកលេងកូននៅផ្ទះជួលខាងលើនេះគាត់បានចេញទិញម្ហូបដែរ ហើយក៏វង្វេងរកផ្លូវទៅផ្ទះវិញអត់ឃើញម្ដងរួចមកហើយពេលនោះគាត់បានដើររហូតដល់ស្ទឹងព្រែកត្នោតចម្ងាយប្រមាណ២០គីឡូម៉ែត្រពីផ្ទះជួល ។
ក្រោយមកត្រូវបានអ្នកភូមិនាំយកទៅប្រគល់ឲ្យនគរបាល ហើយនគរបាលធ្វើការស្រាវជ្រាវនិងទំនាក់ទំងមកកាន់កូនប្រុសគាត់ ឲ្យទៅយកត្រលប់ទៅផ្ទះជួលវិញ ស្រាប់តែពេលនេះក៏វង្វេងជាលើកទី២បែបនេះម្ដងទៀត ។
អាជ្ញាធរសង្កាត់ចោមចៅទី២បានប្រាប់ថា រហូតមកដល់វេលាព្រឹកថ្ងៃទី១០ ខែមេសា ឆ្នាំ២០២៥ នៅមិនទាន់ស្វែងរកផ្ទះជួលដែលស្ត្រីខាងលើស្នាក់នៅឃើញទេ ហើយក៏មិនទាន់ឃើញកូនប្រុសរបស់គាត់មកទទួលយកម្ដាយត្រលប់ទៅវិញនៅឡើយ ។ ពេលនេះនគរបាលនិងអាជ្ញាធរសង្កាត់បានទិញបាយឲ្យគាត់ហូបនិងកំពុងធ្វើការស្រាវជ្រាវរកផ្ទះជួលដែលគាត់ស្នាក់នៅនោះហើយ ប្រសិនបើលោកលី ឡឹង បានទទួលដំណឹងនេះហើយសូមទៅទទួលយកលោកយាយកែម សៀន ដែលជាម្ដាយត្រលប់ទៅផ្ទះវិញផង ៕
ចែករំលែកព័តមាននេះ