ទីក្រុងម៉ូស្គូ៖ រុស្ស៊ីថ្លែងថាពិភពលោកមានអារម្មណ៍នឿយណាយនឹងការស្ដាប់ឮភាសាគំរាមកំហែងអ៊ីរ៉ង់ជាហូរហែ។ ការថ្លែងដូច្នេះនៅពេលភាពតានតឹងនៅក្នុងបញ្ហានុយក្លេអ៊ែរអ៊ីរ៉ង់បន្តកើតឡើងយ៉ាងក្ដៅគគុក។ ទាំងអាមេរិក និងអ៊ីស្រាអែលកំពុងសម្រួចមាត់ថានឹងវាយប្រហារអ៊ីរ៉ង់បើអ៊ីរ៉ង់ផលិតនុយក្លេអ៊ែរដោយលួចលាក់។ អាមេរិកកំពុងប្រើប្រាស់វិធីចរចាគ្នាឱ្យអស់លទ្ធភាពសិន។ បើថាមិនកើតទេមុខតែវាយហើយ។ គណបក្សសាធារណរដ្ឋមិននិយាយច្រើនទេ បើត្រូវវាយគឺវាយប្រាវតែម្ដង។
ក្នុងនាមជាសម្ព័ន្ធមិត្តដ៏ធំ១របស់អ៊ីរ៉ង់ រុស្ស៊ីមិនចង់ឃើញជម្លោះនេះផ្ទុះឡើងកាន់តែខ្លាំងទេ។ រុស្ស៊ីព្រមានថាការទម្លាក់គ្រាប់បែកទៅលើអ៊ីរ៉ង់មិនអាចនាំមកនូវសន្តិភាពបានឡើយ។ រុស្ស៊ីថាអ៊ីរ៉ង់ក៏កំពុងត្រៀមខ្លួនទប់ទល់ជាបណ្ដើរៗផងដែរ។ អ៊ីរ៉ង់កំពុងវាយតម្លៃគម្រោងចរចាគ្នាដើម្បីដោះស្រាយបញ្ហានុយក្លេអ៊ែរ។ ប៉ុន្តែអ៊ីរ៉ង់មានទំនុកចិត្តតិចតួច និងមានចំណុចសង្ស័យជាច្រើន។ អ៊ីរ៉ង់មិនទាន់ដឹងថាតើអាមេរិកចង់បានអ្វីពិតប្រាកដ។ នេះបើតាមមន្ត្រីរដ្ឋាភិបាលអ៊ីរ៉ង់ប្រាប់អ្នកសារព័ត៌មាន។
អ្នកនាំពាក្យវិមានក្រឹមឡាំង លោកប៉ូស្កូស ថ្លែងថារុស្ស៊ីបានដឹងខ្លះៗហើយអំពីការគំរាមវាយប្រហារអ៊ីរ៉ង់ និងដឹងថាអ៊ីរ៉ង់ក៏បានរៀបជើងព្រួលជាបណ្ដើរៗផងដែរ។ ប៉ុន្តែលោកយល់ថាភាគីទាំង២គួរណាស់ផ្ដោតសំខាន់ទៅលើការនិយាយគ្នាតាមសម្រួលជាជាងប្រឈមមុខដាក់គ្នា។ ចំណែកអ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា សាការ៉ូវ៉ា (Maria Zakharova) ថ្លែងថាជាការពិតណាស់ ពិភពលោកចាប់ផ្ដើមនឿយណាយចិត្តនឹងការស្ដាប់ឮភាសាគំរាមកំហែងអ៊ីរ៉ង់។ លោកស្រីយល់ថាគេគ្រប់គ្នាយល់ច្បាស់ណាស់ថាការទម្លាក់គ្រាប់បែក (លើអ៊ីរ៉ង់) មិនមែនជាមាគ៌ារំលត់ទុក្ខឆ្ពោះទៅរកសន្តិភាពនោះឡើយ។ លោកស្រីថ្លែងដូច្នេះតបទៅនឹងសំណួររបស់អ្នកសារព័ត៌មានដែលចង់ដឹងអំពីជំហររបស់រុស្ស៊ី។
កម្មវិធីនុយក្លេអ៊ែររបស់អ៊ីរ៉ង់ចាប់ផ្ដើមតាំងពីយូរយារណាស់មកហើយ។ ពោលគឺចាប់ផ្ដើមតាំងពីទសវត្សទី៥០មកម៉្លេះ។ កាលណោះអ៊ីរ៉ង់ និងអាមេរិកជាសម្ព័ន្ធមិត្តនឹងគ្នា ដូច្នេះ អាមេរិកគាំទ្រកម្មវិធីនេះ។ ប៉ុន្តែក្រោយមក កម្មវិធីនេះក្លាយជាបញ្ហាដ៏ចម្រូងចម្រាសសម្រាប់ក្រុមប្រទេសមហាអំណាច។ ជាពិសេស បន្ទាប់ពីអ៊ីរ៉ង់ធ្វើបដិវត្តផ្ដួលរំលំរបបរាជានិយមកាលពីឆ្នាំ១៩៧៩ ហើយបង្កើតសាធារណរដ្ឋបែបសាសនានិយម។ ក្រុមបដិវត្តបានសម្រុកចូលស្ថានទូតអាមេរិកនៅតេអេរ៉ង់ និងចាប់បុគ្គលិកស្ថានទូតជាច្រើននាក់ធ្វើជាចំណាប់ខ្មាំង។ អ៊ីរ៉ង់ធ្វើដល់ថ្នាក់ហ្នឹងធ្វើឱ្យអាមេរិកមានកំហឹងយ៉ាងខ្លាំង និងតាមរករឿងអ៊ីរ៉ង់រហូតដល់សព្វថ្ងៃ។
ទោះបីអ៊ីរ៉ង់អះអាងថាកម្មវិធីនុយក្លេអ៊ែររបស់ខ្លួនបម្រើឱ្យវិស័យស៊ីវិល និងធ្វើឡើងនៅក្នុងបុព្វហេតុសន្តិភាព ប៉ុន្តែអាមេរិក អ៊ីស្រាអែល និងអឺរ៉ុបមិនគិតដូច្នេះទេ។ ពួកគេយល់ថាអ៊ីរ៉ង់លួចផលិតអាវុធនុយក្លេអ៊ែរ។ ប៉ុន្មានឆ្នាំចុងក្រោយនេះ អ៊ីរ៉ង់ពង្រឹងកិច្ចសហការគ្នាយ៉ាងសម្បើមជាមួយរុស្ស៊ីក្នុងនាមជាមហាអំណាចនុយក្លេអ៊ែរធំបំផុតនៅលើលោក។ នៅក្នុងសង្គ្រាមអ៊ុយក្រែន រុស្ស៊ីទទួលបានយន្តហោះដ្រូនអត្តឃាតម៉ាកសាហ៊ីតមិនតិចគ្រឿងទេពីអ៊ីរ៉ង់។ រុស្ស៊ីក៏ទិញអាវុធអ៊ីរ៉ង់ច្រើនសម្បើមណាស់ដែរ។ ថ្មីៗនេះ រុស្ស៊ី និងអ៊ីរ៉ង់បានចុះហត្ថលេខាលើសន្ធិសញ្ញាមិត្តភាព-សហការរយៈពេល២០ឆ្នាំ។ ដូច្នេះ បើសិនអាមេរិក និងអ៊ីស្រាអែលពិតជាវាយប្រហារអ៊ីរ៉ង់មែន រុស្ស៊ីអាចនឹងមិននៅស្ងៀមទេ។ នេះបើយោងតាមការដកស្រង់ប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ