ទីក្រុងប៉េកាំង៖ បន្ទាប់ពីត្រាំប្រកាសដំឡើងពន្ធទៅលើទំនិញចិនទាំងមុនទាំងក្រោយស្មើនឹង១០៤%កាលពីយប់មិញមិនបានប៉ុន្មានម៉ោងផង ចិនពន្លះវិញ១អស់ដៃ។ ចិនប្រកាសដំឡើងពន្ធបន្ថែម៥០%ទៅលើទំនិញអាមេរិក។ ដូច្នេះសរុបទាំងមុនទាំងក្រោយ ពន្ធគយរបស់ចិនលើទំនិញអាមេរិកកើនឡើងដល់៨៤%។ តាមមើលទៅដូចអ្វីដែលរដ្ឋាភិបាលចិនបានប្រកាសកាលពីម្សិលមិញអីចឹងគឺថាក្នុងនាមជាមហាអំណាចសេដ្ឋកិច្ចលេខ២លើលោក ចិនមិនអាចបណ្ដោយឱ្យបាក់មុខបាត់មាត់បានឡើយ។
ទោះបីប្រទេសជិត៧០បានបោះដៃទៅរកទីក្រុងវ៉ាស៊ីនតោនដើម្បីស្នើសុំការចរចាគ្នាក៏ដោយ ក៏ប៉ុន្តែប្រទេសចិនប្រកាសថាខ្លួននឹងបន្តការតស៊ូរហូតដល់តំណក់ឈាមចុងក្រោយ។ នៅក្នុងក្រសែភ្នែករបស់ចិន ការស្នើសុំចរចាគ្នាមានន័យស្មើនឹងលុតជង្គង់សូមចុះចាញ់អាមេរិក។ តាមការអះអាងរបស់សេតវិមានកាលពីយប់មិញ ប្រទេសចិនក៏ចង់ចរចាគ្នាដើម្បីបញ្ចប់បញ្ហានេះដែរ។ ប៉ុន្តែពួកគេមិនដឹងថាតើត្រូវចាប់ផ្ដើមដោយវិធីណា។
ក្រោយការប្រកាសពន្ធរួចហើយ មិនចាំបាច់រង់ចាំរហូតដល់មួយសប្ដាហ៍ដូចលោកត្រាំទេ ប្រទេសចិនប្រកាសថាការកំណត់ពន្ធគយលើទំនិញអាមេរិក៨៤%នឹងចាប់អនុវត្តពីថ្ងៃទី១០ ខែមេសាស្អែកនេះតទៅ។ នៅក្នុងស្ថានភាពដ៏ក្ដៅគគុកនេះ រដ្ឋមន្ត្រីក្រសួងរតនាគារជាតិអាមេរិកចេញមកនិយាយបន្លប់ស្ថានការណ៍ដើម្បីកុំឱ្យមនុស្សមានអារម្មណ៍ជ្រួលច្របល់។ លោករដ្ឋមន្ត្រីស្កុតបេសឹន (Scott Bessent told) ថ្លែងប្រាប់ទូរទស្សន៍ហ្វក់ (Fox) ដោយទំនុកចិត្តថា «នៅក្នុងសង្គ្រាមពាណិជ្ជកម្មនេះ អ្នកដែលទទួលបរាជ័យនៅទីបញ្ចប់គឺប្រទេសចិន»។
អ្នកណាចាញ់ពិតប្រាកដនៅមិនទាន់ដឹងនៅឡើយទេ។ ប៉ុន្តែសហភាពអឺរ៉ុបកំពុងអង្វរងោចៗទៅចិនដើម្បីឱ្យចិនងាកទៅការចរចាគ្នាល្អជាងធ្វើសង្គ្រាមជាមួយគ្នា។ អឺរ៉ុបយល់ថានៅក្នុងសង្គ្រាមនេះ ភាគីទាំងសងខាងនឹងចាញ់ ហើយនឹងខាតបង់ផលប្រយោជន៍ទាំងអស់គ្នា។ បើគេប្រៀបធៀបការដោះដូរពាណិជ្ជកម្មរវាងចិន និងអាមេរិក ចិននាំទំនិញទៅអាមេរិកគិតជាទឹកប្រាក់៤៣៨,៩ពាន់លានដុល្លារ ខណៈដែលអាមេរិកនាំទៅចិន១៤៣,៥ពាន់លានដុល្លារកាលពីឆ្នាំ២០២៤។
បើគេនៅចាំមិនច្រឡំទេ នៅក្នុងបញ្ជីរបស់ត្រាំមាន១៨៣ប្រទេសដែលដំឡើងពន្ធ។ លើកលែងតែរុស្ស៊ីដែលលោកមិនដំឡើងពន្ធទេព្រោះរុស្ស៊ីកំពុងជាប់ដៃធ្វើសង្គ្រាម។ ប៉ុន្តែអ្នកខ្លះថាដោយសារត្រាំចង់ប្រើយុទ្ធសាស្ត្របំបែកបំបាក់រវាងចិន និងរុស្ស៊ី។ នៅពេលដែលត្រាំធ្វើល្អដាក់រុស្ស៊ីដល់ថ្នាក់នេះ រុស្ស៊ីពិបាកនឹងប្រឆាំងនឹងត្រាំវិញណាស់ ជាពិសេស ប្រឆាំងជាចំហ។ គេឃើញថារុស្ស៊ីរក្សាភាពស្ងប់ស្ងាត់បានល្អណាស់ គ្មានធ្វើអត្ថាធិប្បាយអ្វីទាំងអស់ពាក់ព័ន្ធនឹងការដំឡើងពន្ធ។
ក្រោយពេលប្រកាសពន្ធកាលពីសប្ដាហ៍មុន ត្រាំផ្ដាំហើយផ្ដាំទៀតថាប្រទេសនានាដែលជាប់ពន្ធថ្មីសូមកុំចាត់ការវាយបកវិញ។ បើមិនដូច្នេះទេ លោកនឹងប្រើធម៌ក្ដៅកាន់តែខ្លាំង។ អីចឹងហើយបានជាត្រាំមានអារម្មណ៍ក្ដៅក្រហាយយ៉ាងខ្លាំងបន្ទាប់ពីប្រទេសចិនដំឡើងពន្ធ៣៤%ទៅលើទំនិញអាមេរិកកាលពីប៉ុន្មានថ្ងៃមុន។ តាមមើលទៅ អាមេរិកប្រហែលជាចង់ឃើញប្រទេសចិនបញ្ជូនមនុស្សទៅចរចាគ្នា។ រដ្ឋមន្ត្រីក្រសួងរតនាគារជាតិអាមេរិកថ្លែងថាលោកសោកស្ដាយដែលប្រទេសចិនមិនព្រមចូលតុចរចា។ លោកថាប្រទេសចិនកេងចំណេញច្រើនបំផុតពីការធ្វើពាណិជ្ជកម្មនៅក្នុងប្រវត្តិសាស្ត្រពិភពលោកសម័យទំនើប។
បើគេពិនិត្យទៅមើលតម្លៃភាគហ៊ុននៅផ្សារមូលប័ត្រអាស៊ីចាប់ផ្ដើមធ្លាក់ជារៀងរាល់ថ្ងៃដោយសារអ្នកវិនិយោគខាងទិញ-លក់ភាគហ៊ុនបារម្ភអំពីតម្លៃហ៊ុនចេះតែចុះថោកទៅៗ និងបារម្ភអំពីហានិភ័យនៃវិបត្តិសេដ្ឋកិច្ចសាកល។ ម៉្លោះហើយទោះបីខាតខ្លះ ចំណេញខ្លះ ពួក គេត្រូវតែលក់ទាំងបង្ខំចិត្ត ទុកជាយ៉ាងម៉េចក៏គ្រាន់បើជាងខាតច្រើនជាងនេះ។ គ្រាន់បើកបើកទ្វារជួញដូរភាគហ៊ុនកាលពីព្រឹកមិញ ផ្សារហ៊ុនសៀងហៃរបស់ចិនធ្លាក់ថ្លៃជាង១% ចំណែកហ៊ុននីកេរបស់ជប៉ុនធ្លាក់ថ្លៃជាង៣%។ ផ្សារហ៊ុនអាមេរិកក៏ធ្លាក់ថ្លៃដូចគ្នា។ ទីផ្សារមូលប័ត្រ S&P 500 របស់អាមេរិកនៅពេលបិទទ្វារជួញ-ដូរកាលពីល្ងាចថ្ងៃអង្គារបានធ្លាក់ថ្លៃភាគហ៊ុន២០%។ នេះបើយោងតាមប្រភពពីគេហទំព័រស៊ីអឹនប៊ីស៊ី (CNBC)៕
ចែករំលែកព័តមាននេះ