ខេត្តពោធិ៍សាត់ ៖ សមត្ថកិច្ចនគរបាលបានអោយដឹងថា យោងគណនីហ្វេសប៊ុកឈ្មោះ «បងបារាំង ទទួលដឹកអឺវ៉ាន់» កាលពីថ្ងៃទី០៦ ខែមេសា ឆ្នាំ២០២៥ វេលាម៉ោង២២…
ខេត្តពោធិ៍សាត់ ៖ សមត្ថកិច្ចនគរបាលបានអោយដឹងថា យោងគណនីហ្វេសប៊ុកឈ្មោះ «បងបារាំង ទទួលដឹកអឺវ៉ាន់» កាលពីថ្ងៃទី០៦ ខែមេសា ឆ្នាំ២០២៥ វេលាម៉ោង២២ និង០០នាទី បានបង្ហោះថា មេមេរត់ឡានផ្លូវជាតិលេខ៥ ប្រុងប្រយ័ត្នផង ប្រយ័ត្នលែងបានជួបមុខប្រពន្ធកូន ចន្លោះពីពោធិ៍សាត់ មកក្រគរបៀតសាលាឃុំត្នោតជុំ។ ពួកវាបាញ់គ្រាប់សំណ មករកក្បាលតែម្ដង។ សំណាងល្អ ខុសបន្តិច ធ្លុះកញ្ចក់ឡានខាងមុខ ។
ក្រោយទទួលបានពត៌មាននេះភ្លាម លោកវរសេនីយ៍ឯក មោក ភារម្យ អធិការនគរបាលស្រុកក្រគរ បានដាក់បទបញ្ជា ឲ្យផែននគរបាលយុត្តិធម៌ សហការជាមួយប៉ុស្តិ៍នគរបាលរដ្ឋបាលត្នោតជុំ និងប៉ុស្តិ៍នគរបាលរដ្ឋបាលបឹងកន្ទួត ចុះធ្វើការស្រាវជ្រាវ រហូតដល់ថ្ងៃទី០៨ ខែមេសា ឆ្នាំ២០២៥ ទើបកំណត់មុខសញ្ញា និងឃាត់ខ្លួនបានជនសង្ស័យចំនួន០២នាក់ ដែលបានធ្វើសកម្មភាពកាលពីថ្ងៃទី០៦ ខែមេសា ឆ្នាំ២០២៥ វេលាម៉ោង១៦ និង០០នាទី ក្នុងករណីធ្វើឲ្យខូចខាតដោយចេតនា នៅចំណុចលើកំណាត់ផ្លូវជាតិលេខ៥ ស្ថិតនៅភូមិត្រាំ ឃុំត្នោតជុំ ស្រុកក្រគរ ខេត្តពោធិ៍សាត់ ។
ជនសង្ស័យដែលបានឃាត់ខ្លួន រួមមាន ៖
១. ឈ្មោះ លាង សៅរ៉េ ភេទប្រុស អាយុ ១៦ឆ្នាំ ជនជាតិខ្មែរ មុខរបរមិនពិតប្រាកដ បច្ចុប្បន្នរស់នៅភូមិត្រពាំងកន្ទួត ឃុំបឹងកន្ទួត ស្រុកក្រគរ។
២. ឈ្មោះ រី ម៉េងហ៊ី ភេទប្រុស អាយុ ១៤ឆ្នាំ ជនជាតិខ្មែរ មុខរបរសិស្ស បច្ចុប្បន្នរស់នៅភូមិពោធិ៍របង ឃុំកំពង់ពោធិ៍ ស្រុកក្រគរ ។
បច្ចុប្បន្ន ជនសង្ស័យត្រូវឃាត់ខ្លួននៅអធិការដ្ឋាននគរបាលស្រុកក្រគរ តាមបញ្ជាលោក កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ ដើម្បីរៀបចំតាមនីតិវិធីច្បាប់ ៕
ចែករំលែកព័តមាននេះ