បើកឱ្យដំណើរការឆ្លងកាត់ស្ពានខ្ពស់ជាងគេជាបណ្ដោះអាសន្នបុណ្យចូលឆ្នាំរយៈពេល៧ថ្ងៃ
- ពោធិ៍សាត់
ខេត្តពោធិ៍សាត់ ៖ ថ្ងៃទី០៨ ខែមេសា ឆ្នាំ២០២៥ ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍកម្ពុជា…
ខេត្តពោធិ៍សាត់ ៖ ថ្ងៃទី០៨ ខែមេសា ឆ្នាំ២០២៥ ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍកម្ពុជា បានអញ្ជើញជាអធិបតីក្នុងពិធីចាក់បេតុងភ្ជាប់មុខតំណស្ពានខ្ពស់ជាងគេនៅកម្ពុជា ផ្លូវជាតិលេខ១០ ស្ថិតនៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ ដើម្បីបើកឲ្យដំណើរការជាបណ្ដោះអាសន្ន ពីថ្ងៃទី១១ដល់ថ្ងៃទី១៧ ខែមេសា ឆ្នាំ២០២៥ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ។
ពិធីនេះ ក៏មានការអញ្ជើញចូលរួមពីឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ព្រមទាំងអភិបាលខេត្តពោធិ៍សាត់ ខេត្តបាត់ដំបង និងខេត្តកោះកុងផងដែរ ។ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានឲ្យដឹងថា ស្ពានខ្ពស់ជាងគេនេះ ជាស្ពានទី២៨នៃផ្លូវជាតិលេខ១០ តភ្ជាប់ពីខេត្តកោះកុង ពោធិ៍សាត់ និងបាត់ដំបង មានកម្ពស់៩០ម៉ែត្រ ប្រវែង ៥៣៧ម៉ែត្រ ។
នៅពេលបើកឲ្យដំណើរការជាផ្លូវការ ផ្លូវជាតិលេខ១០នេះ នឹងជួយកាត់បន្ថយពេលវេលា កាត់បន្ថយការចំណាយថវិកា ស្រូបទាញភ្ញៀវទេសចរជាតិ និងអន្តរជាតិ ហើយងាយស្រួលក្នុងការដឹកជញ្ជូនកសិផលទៅកាន់ទីផ្សារ ទៅកាន់កំពង់ផែទឹកជ្រៅខេត្តកោះកុង បញ្ជូនទៅកំពង់ផែក្រុងព្រះសីហនុ បន្តទៅក្រៅប្រទេស ។ នេះគឺជាការយកចិត្តទុកដាក់របស់រាជរដ្ឋាភិបាល ក្នុងការកាត់បន្ថយភាពក្រីក្រជូនប្រជាពលរដ្ឋ ។
ឯកឧត្តមបញ្ជាក់ថា ពីមុនយើងធ្វើដំណើរពីខេត្តបាត់ដំបងទៅខេត្តកោះកុង ត្រូវឆ្លងកាត់ភ្នំពេញសិន តែឥឡូវនេះ យើងធ្វើដំណើរតាមផ្លូវជាតិលេខ១០ ចំណេញបាន ៣០៦គីឡូម៉ែត្រ ។ ពីខេត្តប៉ៃលិនទៅខេត្តកោះកុង ចំណេញបាន ៣៧២គម និងពីខេត្តពោធិ៍សាត់ទៅកោះកុង ចំណេញបាន២៣០គីឡូម៉ែត្រ ។ នេះបើប្រៀបធៀបកាលពីមិនទាន់មានផ្លូវជាតិលេខ១០ ។
រយៈពេល៧ថ្ងៃ គឺចាប់ពីថ្ងៃទី១១ដល់ថ្ងៃទី១៧ ខែមេសា ឆ្នាំ២០២៥ ដែលបើកឲ្យដំណើរការជាបណ្ដោះអាសន្ន ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ភ្ញៀវទេសចរជាតិ និងអន្តរជាតិ នឹងធ្វើដំណើរទៅមកដោយក្ដីសប្បាយរីករាយលើផ្លូវជាតិលេខ១០ ដើម្បីចង់ឃើញស្ពានខ្ពស់ជាងគេនៅកម្ពុជា និងទស្សនាទេសភាពដ៏សែនត្រជាក់ភ្នែកតាមដងផ្លូវ ហើយសង្ឃឹមថា ភ្ញៀវទេសចរជាតិ និងអន្តរជាតិទាំងអស់ បើកបរដោយគោរពច្បាប់ចរាចរណ៍ និងត្រូវចេះអនាម័យបរិស្ថានទាំងអស់គ្នា ដោយមិនចោលសំរាមពាសវាលពាសកាល តាមទីសាធារណៈឡើយ ៕
ចែករំលែកព័តមាននេះ