នាយករដ្ឋមន្ត្រីកម្ពុជាត្រៀមចរចាជាមួយភាគីអាមេរិក ជុំវិញការយកពន្ធ
- ភ្នំពេញ
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានថ្លែងថា អត្រាពន្ធអាមេរិកដាក់លើទំនិញកម្ពុជាថា ៩៧ភាគរយ ដែលអាមរិកគណនាចេញមកនោះ…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានថ្លែងថា អត្រាពន្ធអាមេរិកដាក់លើទំនិញកម្ពុជាថា ៩៧ភាគរយ ដែលអាមរិកគណនាចេញមកនោះ មិនមែនជាអត្រាពន្ធដែលកម្ពុជាយកលើទំនិញអាមេរិក ដែលនាំចូលកម្ពុជានោះទេ ។ ៩៧ភាគរយ គឺជាឱនភាព ឬកម្រិតលម្អៀងនៃជញ្ជីងពាណិជ្ជកម្មរវាងកម្ពុជា និងសហរដ្ឋអាមេរិក ។សម្តេចបវរធិបតី បានថ្លែងបែបនេះ ព្រោះចង់ផ្តល់នូវចំណេះដឹងទៅអ្នកនយោបាយចាស់វស្សា គឺលោក សម រង្ស៊ី ដែលអួតខ្លួនថា ជាអ្នកជំនាញខាងសេដ្ឋកិច្ច តែបែរជាមិនដឹងអីនោះ ។
សម្តេចបវរធិបតី ហ៊ុន ម៉ាណែត បញ្ជាក់ទៀតថា អនុលោមតាមច្បាប់របស់អង្គការពាណិជ្ជកម្មកម្ពុជា ការយកពន្ធលើទំនិញពីគ្រប់ប្រទេសទាំងអស់មិនឱ្យលើសពី ៣៥ភាគរយនោះឡើយ ហើយសម្រាប់សហរដ្ឋអាមេរិកកម្ពុជាគិតជាមធ្យមគឺ ២៩,៤ភាគរយ ហើយទំនិញដែលកម្ពុជានាំចូលទៅសហរដ្ឋអាមេរិកវិញ គឺអាមេរិកគិតពន្ធប្រមាណ ១១ភាគរយ ។សម្តេចបវរធិបតីនាយករដ្ឋមន្ត្រី បានថ្លែងពីករណីខាងលើនេះ នៅក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការស្ពានអាកាសមរតកតេជោ តម្លៃជិត៣៧លានដុល្លារ កាលពីព្រឹកថ្ងៃទី៧ ខែមេសា ឆ្នាំ២០២៥កន្លងទៅ ។
សម្តេចបវរធិបតីបានថ្លែងដូច្នេះថា «ខ្ញុំសូមជម្រាបដល់អ្នកដែលយល់ពីសេដ្ឋកិច្ចកិច្ចច្បាស់ដូចថ្ងៃ(សម រង្ស៊ី) ៩៧ភាគរយមិនមែនជាអត្រាពន្ធដែលកម្ពុជាយកលើទំនិញអាមេរិកនាំចូលកម្ពុជានោះទេ គឺគេហៅថាអត្រាឱនភាព ឬលម្អៀងនៃទំហំពាណិជ្ជកម្មរវាងកម្ពុជា និងសហរដ្ឋអាមេរិក ។សំណួរថា តើកម្ពុជាដាក់ពន្ធប៉ុន្មានទៅលើទំនិញអាមេរិក ? នៅឆ្នាំ២០០៤ កម្ពុជាចូលជាសមាជិកអង្គការពាណិជ្ជកម្មពិភពលោក (WTO) គឺយើងបានប្តេជ្ញាចិត្តរួចហើយ គឺទំនិញទាំងអស់មិនថា ពីអាមេរិក ឬប្រទេសផ្សេងទេ មិនឱ្យលើសពី៣៥ភាគរយឡើយ ហើយទំនិញកម្ពុជាយើងនាំចូលទៅសហរដ្ឋអាមេរិក បង់ពន្ធជាមធ្យម ១១ភាគរយ ។
សម្តេចបវរធិបតីបន្ថែមទៀតថា «មិនមែនជាការពិតទេ ដែលថាខ្មែរដាក់ពន្ធលើទំនិញអាមេរិក ៩៧ភាគរយ ហើយការដាក់ពន្ធទៅវិញទៅមកមិនមែនតែយើងទេ អាមេរិកក៏ដាក់ពន្ធលើទំនិញយើងដែរ ។ ពន្ធរបស់យើងលើទំនិញអាមេរិក មានផលិតផលជាង ១៨៦៨បន្ទាត់ពន្ធ (១បន្ទាត់ពន្ធអាចមានផលិតផលច្រើនមុខ)ក្នុងនោះមាន២១០បន្ទាត់ពន្ធ ដែលទំនិញអាមេរិកនាំចូលមកកម្ពុជា ដោយរួចពន្ធ(ពន្ធសូន្យ)ពន្ធដែលយើងដាក់អាមេរិកខ្ពស់បំផុតត្រឹម ៣៥ភាគរយ ហើយជាពន្ធមធ្យមមានត្រឹមតែ ២៩,៤ភាគរយប៉ុណ្ណោះ មិនមែន ៩៧ភាគរយទេ» ។
សម្តេចបវតធិបតីបានថ្លែងឱ្យដឹងទៀតថា ពាក់ព័ន្ធនឹងរឿងពន្ធរបស់អាមេរិកនេះ កម្ពុជាបានគិតគូរតាំងតែពីជាង ២ខែមុនមកម្ល៉េះ ដោយគណៈកម្មការគោលនយោបាយសេដ្ឋកិច្ច និងហិរញ្ញវត្ថុ បានធ្វើសេណារីយ៉ូផ្សេងៗ អំពីការវាយតម្លៃពីផលប៉ះពាល់នៃកម្រិតអត្រាពន្ធគយរបស់អាមេរិក គ្រាន់តែតែរង់ចាំមើល តើអាមេរិកដាក់ពន្ធលើកម្ពុជាដែរ ឬលើតែប្រទេសដៃគូសេដ្ឋកិច្ចធំៗរបស់ខ្លួនប៉ុណ្ណោះ ។ក្រោយមក ទើបតែនៅថ្ងៃទី២ ខែមេសា ឆ្នាំ២០២៥ ត្រូវនឹងព្រឹកថ្ងៃទី៣ ខែមេសា ឆ្នាំ២០២៥នៅកម្ពុជា អាមេរិកប្រកាសដាក់ពន្ធលើប្រទេសទាំងអស់ជិត ២០០ប្រទេស ក្នុងនោះរួមទាំងកម្ពុជាដែរ ទើបរាជរដ្ឋាភិបាល និងវិស័យឯកជនប្រជុំជាបន្ទាន់ ដាក់ចេញនូវសកម្មភាពឆ្លើយតប ។
ពាក់ព័ន្ធនឹងការងារចរចាអំពីបញ្ហាពន្ធនេះជាមួយសហរដ្ឋអាមេរិក សម្តេចបវរធិបតីបានបញ្ជាក់ថា ជំហានដំបូងកម្ពុជាទម្លាក់ចំនួន ១៩បន្ទាត់ពន្ធ ដែលស្មើនឹងប្រមាណ ៨៥មុខទំនិញរបស់អាមេរិក ពី ៣៥ភាគរយ មកនៅត្រឹម ៥ភាគរយប៉ុណ្ណោះ ដែលជាជំហានទី១ ហើយសម្រាប់ជំហានទី២ នៅពេលអាមេរិកបើកភ្លើងខៀវ ប្រតិភូជាន់ខ្ពស់កម្ពុជា នឹងហោះទៅអាមេរិកចរចាភ្លាមៗ ។សម្តេចបវរធិបតីញ្ជាក់ទៀតថា «សូមជម្រាបទៅជនរួមជាតិបងប្អូនទាំងអស់ថា ទោះបីជាខ្ញុំមិនចាំបាច់មានអ្វីត្រូវចេញតាមហ្វេសប៊ុកទាំងអស់ មិនបានន័យថា ខ្ញុំមិនបានធ្វើការនេះទេ ហើយរយៈពេល៤១ម៉ោង ឬ៣៧ម៉ោង គឺយើងគិតល្អិតល្អន់ណាស់ ទាំងជំហាន១ និងជំហាន២ ។
យើងបានរៀបចំក្រុមការងារជាជំហាន២ រួចទៅហើយ ដោយបង្កើតក្រុមការងារមួយ ដែលដឹកនាំដោយឯកឧត្តម ស៊ុន ចាន់ថុល និងលោកជំទាវ ចម និម្មល ត្រៀមបើចាំបាច់ហោះទៅធ្វើការចរចា បើអាមេរិកបើកភ្លើងខៀវភ្លាម» ។ចំពោះការលើកឡើងរបស់អ្នកនយោបាយ ដែលចង់ឱ្យសម្តេចចេញទៅចរចាដោយផ្ទាល់ នោះ សម្តេចបវរធិបតីបានសង្កត់ធ្ងន់ថា «បើការចរចាពន្ធនេះ ឯកឧត្តមប្រធានាធិបតី ដូណាល់ត្រាំចូលរួមចរចា ខ្ញុំនឹងចូលចរចាជាមួយនេះជាសមភាគី» ៕
ចែករំលែកព័តមាននេះ