សួនច្បារដ៏ធំបំផុតមួយ នៅរាជធានីភ្នំពេញនឹងបដិសន្ធិឡើង នៅក្នុងពេលខាងមុខបន្ថែមលើសួនច្បារ និងរុក្ខសួន ដែលមានស្រាប់ប្រមាណជាជាង១២០កន្លែង ។ នាយករដ្ឋមន្ត្រីបានជំរុញអោយបង្កើនរៀបចំសួននៅទូទាំងប្រទេស ។ តើហេតុអ្វី? ផែនការកសាងសួនច្បារសាធារណៈថ្មីមួយបន្ថែមទៀតនេះត្រូវបានបង្ហើបដោយសម្តេចធិបតី…
សួនច្បារដ៏ធំបំផុតមួយ នៅរាជធានីភ្នំពេញនឹងបដិសន្ធិឡើង នៅក្នុងពេលខាងមុខបន្ថែមលើសួនច្បារ និងរុក្ខសួន ដែលមានស្រាប់ប្រមាណជាជាង១២០កន្លែង ។ នាយករដ្ឋមន្ត្រីបានជំរុញអោយបង្កើនរៀបចំសួននៅទូទាំងប្រទេស ។ តើហេតុអ្វី?
ផែនការកសាងសួនច្បារសាធារណៈថ្មីមួយបន្ថែមទៀតនេះត្រូវបានបង្ហើបដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី០៧ ខែមេសា ឆ្នាំ២០២៥ នៅក្នុងអំឡុងពេលអញ្ជើញសម្ភោធស្ពានអាកាសមរតកតេជោកម្ពុជា នៅតំបន់ក្បាលថ្នល់ ។
បើតាមអ្វីដែលនាយករដ្ឋមន្ត្រីបានបង្ហើបបានឲ្យដឹងថា ផ្ទៃដីដែលនឹងត្រូវរក្សាទុក ដើម្បីកសាងសួនច្បារ សាធារណៈដ៏ធំបំផុតនេះ គឺមានទំហំប្រមាណជា៧០ហិកតា ដែលគ្រោងនឹងសាងសង់ ដើម្បីបម្រើជាកន្លែងសម្រាប់ប្រជាពលរដ្ឋនៅរាជធានីភ្នំពេញ ដើម្បីសម្រាក លំហែ ហាត់ប្រាណ និងចំណាយពេលវេលាដ៏មានសុខដុមនីយកម្មជាមួយក្រុមគ្រួសារ ។
សួនច្បារសារធាណៈថ្មីមួយកន្លែងនោះ គឺមានទីតាំងនៅតំបន់ទំនប់កប់ស្រូវ ក្នុងខណ្ឌពោធិសែនជ័យ ដែលស្ថិតនៅប៉ែកខាងជើងឈាងខាងលិចនៃរាជធានីភ្នំពេញ ដែលទីនោះនឹងក្លាយជាកន្លែងសម្រាប់ ប្រជាពលរដ្ឋអាចកម្សាន្ត ហាត់ប្រាណ និងទាក់ទាញភ្ញៀវទេសចរ ។
នាយករដ្ឋមន្ត្រី ក៏បានបន្តថា ដីនោះមានតម្លៃប្រមាណជា៧០លានដុល្លាជាង ហើយក៏មានគម្រោងស្នើរដើម្បីយកទៅអភិវឌ្ឍន៍ផ្សេងៗ ប៉ុន្តែសម្តេចបានប្រកាសថា ទីនោះ គឺសម្រាប់តែគម្រោងអភិវឌ្ឍបន្ថែមលើសួនច្បារសាធារណៈប៉ុណ្ណោះ ។សម្តេចធិបតី ក៏បានជំរុញ និងលើកទឹកចិត្តឲ្យលោក ឃួង ស្រេង អភិបាលរាជធានីភ្នំពេញបង្កើនការដាំដើមឈើជាច្រើន នៅតាមសួនច្បារសាធារណៈ ដើម្បីកាត់បន្ថយកម្ដៅក្នុងរាជធានី ។
បន្ថែមពីលើរាជធានីភ្នំពេញដែលបានរៀបចំដីសម្រាប់សួនច្បារសាធារណៈដ៏ធំនេះនាយករដ្ឋមន្ត្រីក៏បានស្នើជំរុញឱ្យខេត្តផ្សេងទៀត ចូលរួមប្រកួតប្រជែងក្នុងការអភិវឌ្ឍសួនសាធារណៈនៅក្នុងទីក្រុងរបស់ពួកគេសម្រាប់ការកម្សាន្តរបស់ប្រជាពលរដ្ឋ ហើយក៏បានអបអរចំពោះសមិទ្ធផលថ្មីៗពាក់ព័ន្ធនឹងសួនកម្សាន្ត សាធារណៈដែលបានដាក់ចេញនៅខេត្តមួយចំនួនដូចជា ខេត្តកែប តាកែវ ជាដើម ។
មកដល់ពេលនេះ រាជធានីភ្នំពេញ ដែលមានទំហំប្រមាណជា៦៧៨ គីឡូម៉ែត្រការ៉េ មានសួនច្បារសាធារណៈសរុបប្រមាណជាជាង១២០កន្លែង ហើយការដែលរាជធានីភ្នំពេញនឹងកសាងសួនច្បារដ៏ធំមួយកន្លែងទៀត ប្រជាពលរដ្ឋនៅរាជធានីភ្នំពេញ បានអះអាងថា វាពិតជាទស្សនៈវិស័យមួយដ៏ត្រឹមត្រូវនៅក្នុងការបង្កើតលំហរសាធារណៈមួយសម្រាប់លើកកម្ពស់សុខមាលភាពរបស់ប្រជាជន ។
ការបង្កើនសួនច្បារ គឺមានសារសំខាន់ណាស់ សម្រាប់ការរស់នៅរបស់ប្រជាជនកម្ពុជា ។ វាមិនត្រឹមតែអាចជួយដល់សុខភាព និងការកម្សាន្តលំហែរបស់ប្រជាជនតាមរយ:ការហាត់ប្រាណ និងការជួបជុំកម្សាន្តនោះទេ វាថែមទាំងអាចជួយដល់យុវជន និងយុវតី ងាកចេញពីការប្រើប្រាស់គ្រឿងស្រវឹង និងគ្រឿងញៀ.នផងដែរ នៅពេលដែលពួកគេមានជម្រើសកាន់តែច្រើនសម្រាប់ការហាត់ប្រាណ និងកម្សាន្តសប្បាយតាមសួនសាធារណ:ដោយអាចធ្វើអោយពួកគេងាកចេញពីគ្រឿងស្រវឹង និងគ្រឿងញៀ.ន ។
លោក ទុំ ចេតនា ជាប្រជាពលរដ្ឋវ័យ៤៦ឆ្នាំ នៅរាជធានីភ្នំពេញ បានឲ្យដឹងថា រាជធានីភ្នំពេញ មានសួន ច្បារសាធារណៈច្រើនមែន ប៉ុន្តែរុក្ខសួនដូចជា តំបន់រមណីដ្ឋានវត្តភ្នំដូចជាមិនមានឡើយ ។ ដូច្នេះប្រសិន បើកម្ពុជាអាចពិចារណាអភិវឌ្ឍន៍តំបន់បៃតង នៅតំបន់ដែលមានគម្រោងស្រាប់នោះ គឺពិតជាប្រសើរ ។
លោកបានបញ្ជាក់ថា «សព្វថ្ងៃទិដ្ឋភាពបៃតងដូចជា នៅរមណីដ្ឋានវត្តភ្នំ ដូចជា មិនមានកន្លែងផ្សេងទេ នៅរាជធានី ដូច្នេះបើអាចពិចារណាយកតាមរូបភាពរមណីដ្ឋានបុរាណ និងប្រវត្តិសាស្ត្រមួយនេះគឺល្អ»។
ដោយឡែក លោក ទេព ចាន់តាណា ក៏ជាប្រជាពលរដ្ឋនៅរាជធានីភ្នំពេញក៏បានបង្ហាញការស្វាគមន៍ ហើយពោលថា នៅពេលបច្ចុប្បន្នបើអាជ្ញាធររៀបចំសួនច្បារ ពោល គឺកន្លែងលំហរបៃតងសាធារណៈបានកាន់តែច្រើន គឺកាន់តែប្រសើរ ។
លោកបានបន្តថា ដីឥឡូវថ្លៃ ដូច្នេះហើយមនុស្សចេះតែរំកិលព្រំដែនរបស់ខ្លួនចូលទៅដែនធម្មជាតិ នាំឲ្យគម្របបៃតងរិចរិល ប៉ុន្តែបើយើងពិចារណារៀបចំវាឲ្យកើតនៅកណ្តាលរាជធានីវាពិតជាប្រសើរណាស់ ៕
ចែករំលែកព័តមាននេះ