រាជធានីភ្នំពេញ ៖ ស្ត្រីម្នាក់បានបើករថយន្តព្រូសចេញពីផ្ទះក្នុងបំណងទៅស្រោចទឹករំដោះគ្រោះនាឱកាសចូលឆ្នាំថ្មីប្រពៃណីជាតិ ប៉ុន្តែខណៈកំពុងធ្វើដំណើរស្រាប់តែរលត់ម៉ាស៊ីននៅតាមផ្លូវ ហើយក៏មានផ្សែងហុយចេញពីផ្នែកខាងក្រោយនៃរថយន្ត ។
បន្តិចក្រោយមក ស្រាប់តែមានភ្លើងឆាបឆេះសន្ធោសន្ធៅឡើង បណ្ដាលឲ្យរថយន្តខូចខាតខ្ទេចទាំងស្រុងនៅសល់តែគ្រោងដែកក្លាយទៅជាដែកអេតចាយ ប៉ុន្តែស្ត្រីអ្នកបើកបរបានបើកទ្វាររត់ចេញក្រៅទាន់ មិនមានរងរបួសអ្វីឡើយ ។ ហេតុការណ៍នេះ កើតឡើងកាលពីវេលាម៉ោងប្រមាណ១និង៣០នាទីរសៀលថ្ងៃទី៦ ខែមេសា ឆ្នាំ២០២៥កន្លងទៅ នៅតាមផ្លូវបេតុង ក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ ។
អ្នកភូមិនិយាយថា មុនកើតហេតុឆេះរថយន្តនេះ ពួកគាត់ឃើញបើកបរតាមផ្លូវបេតុងខាងលើ ហើយខណៈកំពុងធ្វើដំណើរស្រាប់តែឈប់និងមានផ្សែងហុយទ្រលោមចេញពីផ្នែកខាងក្រោយ ។ ពេលនោះ ស្ត្រីអ្នកបើកបរបានបើកទ្វារចេញមកក្រៅ និងស្រែកហៅពួកគាត់ឲ្យជួយ ប៉ុន្តែពួកគាត់មិនទាន់បានទៅជួយផង ស្រាប់តែមានភ្លើងឆេះរថយន្តនោះសន្ធោសន្ធៅបាត់ទៅហើយ ។
ភ្លាមៗ ពួកគាត់បានផ្ដល់ព័ត៌មានទៅខាងរថយន្តពន្លត់អគ្គិភ័យឲ្យទៅជួយអន្តរាគមន៍បាញ់ទឹកពន្លត់ ហើយរថយន្តពន្លត់អគ្គិភ័យក៏បានទៅដល់ជាបន្តបន្ទាប់ចំនួន២គ្រឿង ប៉ុន្តែបាញ់ទឹកអស់១រថយន្តភ្លើងក៏រលត់ទៅវិញ ។
យ៉ាងណាក៏ដោយ រថយន្តត្រូវភ្លើងឆេះក្លាយជាដែកអេតចាយអស់ទៅហើយ ។ បើតាមស្ត្រីជាម្ចាស់រថយន្តនិយាយថា គាត់បើករថយន្តព្រូស ស៊េរីឆ្នាំ២០០៧នេះចេញពីផ្ទះនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ ក្នុងបំណងទៅស្រោចទឹករំដោះគ្រោះមុនចូលឆ្នាំថ្មី ប៉ុន្តែអត់ប្រាប់ថាទៅស្រោចទឹកនៅវត្តឬនៅគ្រូមន្តអាគមណានោះទេ ។ នៅពេលទៅដល់ចំណុចខាងលើ ស្រាប់តែរលត់ម៉ាស៊ីន ហើយក៏មានផ្សែងខ្មៅហុយទ្រលោមចេញពីផ្នែកខាងក្រោយឡើងខ្មួលខ្មាញ់ទៅហើយ ។
ភ្លាមៗនោះ គាត់បានបើកទ្វារចេញស្រែកហៅគេឲ្យជួយដែរ តែបន្តិចក្រោយមកស្រាប់តែមានអណ្ដាតភ្លើងឆាបឆេះសន្ធោសន្ធៅខ្ទេចបែបនេះតែម្ដង ដោយពុំដឹងថាបណ្ដាលមកពីអ្វីឡើយ ៕
ចែករំលែកព័តមាននេះ