រាជធានីភ្នំពេញ ៖ «ក្រុមយុវជនណា ដែលយកដងផ្លូវសាធារណៈ ជាទីលាននៃការលេងគប់ទឹក ជះទឹក ឬប៉ាតម្សៅដាក់គ្នា បង្កឱ្យបាត់បង់របៀបរៀបរយលើដងផ្លូវ សមត្ថកិច្ចនឹងប្រើវិធានការចុះប្រមូលនាំយកមកកាន់ស្នាក់ការប៉ុស្តិ៍តែម្តង» ។…
រាជធានីភ្នំពេញ ៖ «ក្រុមយុវជនណា ដែលយកដងផ្លូវសាធារណៈ ជាទីលាននៃការលេងគប់ទឹក ជះទឹក ឬប៉ាតម្សៅដាក់គ្នា បង្កឱ្យបាត់បង់របៀបរៀបរយលើដងផ្លូវ សមត្ថកិច្ចនឹងប្រើវិធានការចុះប្រមូលនាំយកមកកាន់ស្នាក់ការប៉ុស្តិ៍តែម្តង» ។
នេះជាប្រសាសន៍ការលើកឡើងរបស់លោកឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ កាលពីរសៀលថ្ងៃទី៧ ខែមេសា ឆ្នាំ២០២៥ នៅស្នងការដ្ឋាននគរបាលរាជធានីភ្នំពេញ ផ្ទាល់តែម្តង ។
លោកឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ បានលើកឡើងថា ក្នុងឱកាសបុណ្យចូលឆ្នាំខ្មែរប្រពៃណីជាតិ ក្រុមយុវជន ដែលចេញពីទីតាំងសប្បាយភាព ហើយជិះម៉ូតូជាក្រុមៗ បង្កភាពឈូរឆរស្រែកឡូឡា ឬស៊ីផ្លេម៉ូតូតាមទីសាធារណះ សមត្ថកិច្ចនឹងប្រើវិធានការចុះប្រមូលយកមកកាន់ស្នាក់ការប៉ុស្តិ៍រដ្ឋបាល នៅតាមមូលដ្ឋាននីមួយ ដោយមិនបណ្តោយឱ្យបង្កភាពអនាធិបតេយ្យលើដងផ្លូវនោះទេ ។
លោកស្នងការរាជធានី បានបន្តថា សមត្ថកិច្ចនឹងមិនអនុញ្ញាតឱ្យបងប្អូនពលរដ្ឋ យកដងផ្លូវសាធារណះ ជាទីលាន នៃការលេងគប់ទឹក ជះទឹក ឬបាតម្ស៉ៅដាក់គ្នានោះឡើយ ព្រោះនេះជាកត្តាបង្កឱ្យបាត់បង់របៀបរៀបរយលើដងផ្លូវ ពិសេសបង្កការប៉ះពាល់ខ្ពស់ដល់លំហូរចរាចរណ៍ និងប៉ះពាល់ពលរដ្ឋអ្នកដំណើរដែលបើកឆ្លងកាត់ អាចប្រឈមគ្រោះថ្នាក់នានាជាយថាហេតុ ។
ដូច្នេះហើយ សូមបងប្អូនប្រជាពលរដ្ឋលេងកម្សាន្តតែក្នុងរង្វង់ទីតាំង ឬបរិវេណ ដែលមានការរៀបចំត្រឹមត្រូវដោយអាជ្ញាធរមូលដ្ឋាននីមួយៗ។
គួរបញ្ជាក់ផងដែរថា នៅរាជធានីភ្នំពេញឆ្នាំនេះ សង្ក្រាន្តវត្តភ្នំ នឹងរៀបចំឡើង នៅថ្ងៃទី១៤ , ១៥ និង១៦ ខែមេសា ឆ្នាំ២០២៥ខាងមុខ ហើយរដ្ឋបាលរាជធានីភ្នំពេញ គ្រោងរៀបចំពិធីសង្ក្រាន្តវត្តភ្នំឲ្យមានភាពអធិកធមសប្បាយរីករាយជាងឆ្នាំមុន ហើយពង្រីកវិសាលភាពឲ្យកាន់តែទូលំទូលាយ ឲ្យមានការលំហូរសម្រាប់អ្នកមកលេងកម្សាន្តចេញចូលមានភាពងាយស្រួលដើម្បីកាត់បន្ថយការកកស្ទះចរាចរណ៍ផងដែរ៕
ចែករំលែកព័តមាននេះ