នៅក្នុងឱកាសដែលពិធីបុណ្យចូលឆ្នាំថ្មីប្រពៃណីជាតិជិតមកដល់ វាពិតជាប្រពៃណាស់ ក្រុមប្រឆាំងនឹងរាជរដ្ឋាភិបាលនៅក្រៅប្រទេសបានសម្រេចសុំមករួបរួមគ្នា ដើម្បីបន្តលើកកម្ពស់ និងជំរុញការលើកកម្ពស់ការអភិវឌ្ឍប្រទេស ។ លោក សម សេរី ដែលជាប្រធានរណសិរ្យរំដោះជាតិខ្មែរ…
នៅក្នុងឱកាសដែលពិធីបុណ្យចូលឆ្នាំថ្មីប្រពៃណីជាតិជិតមកដល់ វាពិតជាប្រពៃណាស់ ក្រុមប្រឆាំងនឹងរាជរដ្ឋាភិបាលនៅក្រៅប្រទេសបានសម្រេចសុំមករួបរួមគ្នា ដើម្បីបន្តលើកកម្ពស់ និងជំរុញការលើកកម្ពស់ការអភិវឌ្ឍប្រទេស ។
លោក សម សេរី ដែលជាប្រធានរណសិរ្យរំដោះជាតិខ្មែរ និងរដ្ឋាភិបាលជាតិខ្មែរនិរទេសបានប្រកាសរំលាយចោលនូវ រណសិរ្យដោះជាតិខ្មែរ និងរដ្ឋាភិបាលជាតិខ្មែរនិរទេសនោះចោល ។
ការប្រកាសរំលាយចោលនូវចលនាប្រឆាំងនៅក្រៅប្រទេសនេះ ត្រូវបាន លោក សម សេរី អះអាងថា ធ្វើឡើងក្នុងស្មារតីរួមសាមគ្គីការពារសន្តិភាព ដើម្បីកុំឲ្យកម្ពុជាមានបញ្ហានយោបាយ ហើយរួមគ្នាជាធ្លុងមួយជួយរកច្រក ដើម្បីពង្រឹងការងារជាតិ ។
ក្រោយពេលដែលលោក សម សេរី បានប្រកាសបែបនេះលោកក៏ទទួលបានការលើកលែងទោសពីសម្តេចតេជោ ហ៊ុន សែន នៅក្នុងនាមជាប្រមុខរដ្ឋស្តីទីបានចេញព្រះរាជក្រឹត្យ ថ្ងៃទី០៦ ខែមេសា ឆ្នាំ២០២៥ ត្រាស់បង្គាប់លើកលែងទោសឱ្យទណ្ឌិតឈ្មោះ សម សេរី ដែលត្រូវបានតុលាការសម្រេចផ្តន្ទាទោសលើសំណុំរឿងមួយចំនួន។
លោក សម សេរី អតីតប្រធានរណសិរ្យរំដោះជាតិខ្មែរ និងរដ្ឋាភិបាលជាតិខ្មែរនិរទេសបានប្រកាសអរគុណសម្តេចតេជោ ហ៊ុន សែន និងថ្លែងថា ចាប់ពីពេលនេះទៅប្រទេសខ្មែរលែងមានវិបត្តិនយោបាយទៀតហើយ ។ លោក សម សេរី បានបញ្ជាក់ថា លោកពិតជារំភើបរីករាយដែលទទួលបានលើកលែងទោសជាផ្លូវការដោយប្រមុខរដ្ឋស្តីទីដែលបានប្រកាសលើកលែងទោសដល់រូបលោក និងសមាជិកទាំងអស់ ។
ក្នុងឱកាសនោះ លោកក៏បានប្រកាសអរគុណដល់ប្រទេសដាណឺម៉ាក សហភាពអឺរ៉ុប សហរដ្ឋអាមេរិក ចក្រភពអង់គ្លេស និងមិត្តភក្តិ អន្តរជាតិទាំងអស់ដែលបានជួយ និងគាំទ្ររូបលោក ជាពិសេសបងប្អូនខ្មែរ ដែលបានគាំទ្រកន្លងមក ។ លោកបានលើកឡើង ចាប់ពីពេលនេះទៅ ប្រទេសខ្មែរលែងមានវិបត្តិនយោបាយទៀតហើយ និងមានសុខសន្តិភាពរីកចម្រើនជាលំដាប់ ។
លោក សម សេរី គឺជាមេដឹកនាំក្រុមមួយដែលរស់នៅក្រៅប្រទេស ហើយតែងតែធ្វើចលនាប្រឆាំងរាជរដ្ឋាភិបាលខ្មែរជាច្រើនឆ្នាំកន្លងម ក ។ នាពេលកន្លងទៅក្រុមរបស់លោក សម សេរី មួយចំនួនក៏ត្រូវបានសមត្ថកិច្ចចាប់ខ្លួនពីបទប៉ុនប៉ងធ្វើភេរវកម្មផងដែរ ។លោក សម សេរី កន្លងមកត្រូវបានតុលាការកម្ពុជាសម្រេចធ្វើការកាត់ទោសកំបាំងមុខដាក់ពន្ធនាគាររហូតដល់ចំនួន៩ឆ្នាំពីបទភេរវកម្មកាលពីឆ្នាំ២០១៣ តែលោកបានរត់ភៀសខ្លួនទៅក្រៅប្រទេស ។ លោកធ្លាប់ត្រូវបានគេដឹងថា មានការពាក់ព័ន្ធនឹងគោលបំណងដាក់គ្រាប់បែកបំផ្ទុះនៅម្ដុំវត្តភ្នំ និងក្នុងខេត្តសៀមរាប កាលពីអំឡុងពេលប្រារព្ធពិធីបុណ្យចូលឆ្នាំខ្មែរឆ្នាំ២០១៨ ។
រដ្ឋាភិបាលកម្ពុជាកាលពីពេលកន្លងមក គឺតែងប្រុងប្រយ័ត្ន និងតាមដានសកម្មភាពរបស់លោកជាប្រចាំ ទោះជាលោកស្ថិតនៅក្រៅប្រទេសក៏ដោយ ។ រដ្ឋាភិបាលបានចាត់ទុកលោកថា ជាមនុស្សម្នាក់ដែលមានបំណងបង្កអសន្តិសុខ និងចលាចលដល់សង្គមកម្ពុជា ហើយធ្លាប់ចាត់ទុកលោកជនប្រឆាំងដ៏រំខានមួយសម្រាប់រដ្ឋាភិបាលកម្ពុជានៅក្នុងប្រទេស ។
សរុបទៅទោះបីជាចលនាប្រឆាំងនៅក្រៅប្រទេសមួយភាគនៅមិនទាន់អាចមករួមរស់ជាមួយនឹងសង្គម និងនយោបាយនៅកម្ពុជាបានទាំងមូល ប៉ុន្តែនេះក៏ចាត់ទុកថា គឺជាជោគជ័យមួយនៃកិច្ចខិតខំប្រឹងប្រែងដើម្បី ធ្វើសមាហរណកម្មសង្គមនយោបាយនៅក្នុងប្រទេសមួយផ្នែកទៀត ដើម្បីរួបរួមគ្នាបន្តអភិវឌ្ឍន៍ប្រទេសកម្ពុជា ហើយនាំគ្នារិះរកគ្រប់មធ្យោបាយដោះស្រាយបញ្ហាប្រឈមនានាដែលកំពុងតែកើតមាន ដើម្បីធ្វើយ៉ាងណាឲ្យកម្ពុជាអាចបន្តដំណើរការអភិវឌ្ឍប្រកបដោយភាពវិជ្ជមាន ៕
ចែករំលែកព័តមាននេះ