ទីក្រុងប្រ៊ុចសែល៖ សហភាពអឺរ៉ុបចាប់ផ្ដើមបន្ទន់ឥរិយាបថនៅចំពោះមុខនៃការដំឡើងពន្ធដ៏ខ្ពស់ទៅលើទំនិញរបស់ខ្លួនដែលនាំចូលអាមេរិក។ ថ្មីៗនេះ ប្រធានគណៈកម្មការអឺរ៉ុប លោកស្រីឡីយេន (Leyen) បានទាក់ទងគ្នាតាមទូរស័ព្ទជាមួយអ្នកតំណាងក្រុមហ៊ុនផលិតដែក និងក្រោយមកនិយាយជាមួយអ្នកតំណាងក្រុមហ៊ុនផលិតរថយន្តដើម្បីរកវិធីឆ្លើយតបទៅនឹងការដំឡើងពន្ធរបស់លោកត្រាំ។
គោលដៅនៃការការសន្ទនាគ្នាលើកនេះដើម្បីប្រមូលទិន្នន័យ និងត្រៀមដាក់ចេញវិធានការឆ្លើយតបបន្ថែមទៀតពីលើផែនការឆ្លើយតបដំណាក់កាលដំបូងចំពោះការដំឡើងពន្ធដែករបស់លោកត្រាំ។ ផែនការនេះនឹងត្រូវយកទៅបោះឆ្នោតអនុម័តនៅចុងសប្ដាហ៍នេះ។ ក្រៅពីនេះ លោកស្រីក៏ត្រៀមជជែកគ្នាជាមួយក្រុមអ្នកតំណាងក្រុមហ៊ុនផលិតឱសថនៅថ្ងៃអង្គារ។
តម្លៃភាគហ៊ុនរបស់អាស៊ី និងអឺរ៉ុប រួមទាំងតម្លៃប្រេងឆៅធ្លាក់ថ្លៃខ្លាំងនៅថ្ងៃចន្ទនេះព្រោះក្រុមអ្នកវិនិយោគខាងទិញ-លក់ភាគហ៊ុនបារម្ភថាការដំឡើងពន្ធដ៏ខ្ពស់របស់លោកត្រាំនឹងធ្វើឱ្យទំនិញនៅលើទីផ្សារឡើងថ្លៃ។ ដូច្នេះអតិថិជននឹងកាត់បន្ថយការប្រើប្រាស់ទំនិញ។ អ្នកវិនិយោគខ្លះរហូតដល់ទៅបារម្ភថាពិភពលោកអាចនឹងជួបប្រទះនឹងវិបត្តិសេដ្ឋកិច្ចថែមទៀតផង។
ក្រុមអ្នកតំណាងខាងនាំចេញរថយន្តបានស្នើសុំឱ្យអឺរ៉ុបខិតខំចរចាគ្នាដើម្បីឱ្យមានដំណោះស្រាយ។ ក្រុមហ៊ុនផលិតរថយន្តបានជំរុញឱ្យអឺរ៉ុបកាត់បន្ថយការយកពន្ធទៅលើរថយន្តរបស់អាមេរិក។ កាលពីខែមករា ក្រុមហ៊ុនប៊ីអឹមដាប់បលយូ (BMW) របស់អាល្លឺម៉ង់ស្នើឱ្យអឺរ៉ុបកាត់បន្ថយអត្រាពន្ធរថយន្តអាមេរិកដែលសព្វថ្ងៃនេះមាន១០% គួរបន្ថយមកនៅ២,៥%។
គណៈកម្មការអឺរ៉ុបត្រៀមកោះប្រជុំជាមួយក្រុមហ៊ុនផលិតឱសថរបស់ស្វីសដូចជារ៉ូសសេ និងណូវ៉ាទីជាដើម (Roche & Novartis)។ លោកត្រាំប្រកាសកាលពីសប្ដាហ៍មុនថាផលិតផលសុខាភិបាលអាចរួចផុតពីការដំឡើងពន្ធនិយាយនៅក្នុងក្របខណ្ឌទូទៅ។ ប៉ុន្តែលោកថាផលិតផលខ្លះនៅតែជាប់ពន្ធដដែល។ នៅក្នុងព្រឹត្តិការណ៍១ទៀត បណ្ដារដ្ឋមន្ត្រីក្រសួងពាណិជ្ជកម្មនៃរដ្ឋជាសមាជិកសហភាពអឺរ៉ុបបានអំពាវនាវឱ្យរួបរួមកម្លាំងគ្នាដើម្បីឆ្លើយតបទៅនឹងការដំឡើងពន្ធរបស់លោកត្រាំ។
នៅថ្ងៃនេះ ពួកគេជួបប្រជុំគ្នានៅប្រទេសលុចហ្សំបួ។ រដ្ឋមន្ត្រីក្រសួងពាណិជ្ជកម្មបារាំងថ្លែងថាអឺរ៉ុបគួរតែចរចាគ្នាជាមួយអាមេរិកដើម្បីគេចផុតពីការដំឡើងពន្ធ។ រដ្ឋមន្ត្រីរូបនេះថ្លែងថាបារាំងមិនចង់ធ្វើសង្គ្រាមពាណិជ្ជកម្មទេ។ បារាំងគាំទ្រការសហការគ្នាជាជាងការប្រឈមមុខដាក់គ្នា៕
ចែករំលែកព័តមាននេះ