រាជធានីភ្នំពេញ ៖ ផ្ទះឈើលើថ្មក្រោម ចំនួន០៣ខ្នង ត្រូវបានអគ្គិភ័យលេបត្របាក់អស់ស្ទើរទាំងស្រុង ដោយសារកើតចេញពីការឆ្លងចរន្តអគ្គិសនី ។ គ្រោះអគ្គិភ័យនេះ បង្កភ្ញាក់ផ្អើលកាលពីវេលាម៉ោង០២និង៣០នាទីរសៀលថ្ងៃទី០៧ ខែមេសា…
រាជធានីភ្នំពេញ ៖ ផ្ទះឈើលើថ្មក្រោម ចំនួន០៣ខ្នង ត្រូវបានអគ្គិភ័យលេបត្របាក់អស់ស្ទើរទាំងស្រុង ដោយសារកើតចេញពីការឆ្លងចរន្តអគ្គិសនី ។
គ្រោះអគ្គិភ័យនេះ បង្កភ្ញាក់ផ្អើលកាលពីវេលាម៉ោង០២និង៣០នាទីរសៀលថ្ងៃទី០៧ ខែមេសា ឆ្នាំ២០២៥ នៅតាមបណ្តោយផ្លូវក្បែរវត្តគល់ទទឹង ក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។
បើតាមការបញ្ជាក់ប្រជាពលរដ្ឋបានប្រាប់អោយដឹងថា គេបាន ឮសំឡេងផ្ទុះដូចគេបាញ់កាំជ្រួញចេញពីផ្ទះកើតហេតុ ក៏ស្រាប់តែមួយសន្ទុះក្រោយមកមានការស្រែកឆោឡោចេញពីផ្ទះក្បែរនោះ ផ្អើលពលរដ្ឋរត់មកមើលឃើញអណ្តាតភ្លើងឆាបឆេះយ៉ាងសន្ធោសន្ធៅបាត់ទៅហើយ។ ភ្លាមៗ ប្រជាពលរដ្ឋប្រញាប់រាយការណ៍ជូនសមត្ថកិច្ច ជួយចុះមកអន្តរាគមន៍ ដើម្បីការពារកុំអោយឆេះរាលដាលដល់ផ្ទះក្បែរនោះ ដែលភាគច្រើនសុទ្ធតែជាផ្ទះឈើ ។
អគ្គិភ័យនេះដែរ បានឆេះបំផ្លាញផ្ទះពលរដ្ឋស្ទើរទាំងស្រុង ចំនួន០៣ខ្នង គឺជាប្រភេទ ថ្មក្រោមឈើលើទំហំ (៤ម៉ែត្រ x ៩ម៉ែត្រ) ឆេះផ្ទះឈើថ្មក្រោមចំនួន ០១ខ្នង រួមមានសៀវភៅស្នាក់, អត្តសញ្ញាណប័ណ្ណ, សំបុត្រកំណើត, សម្លៀកបំពាក់បោកអ៊ុត ចំនួន ៥០កំផ្លេ ហើយបណ្តាលឲ្យឆេះរោលដល់ជញ្ជាំងផ្ទះអ្នកក្បែរខាងចំនួន ០២ខ្នង។ ចំពោះករណីអគ្គិភ័យខាងលើនេះ ត្រូវបានកម្លាំងសមត្ថកិច្ចជំនាញរបស់យើងគ្រប់គ្រងបានទាំងស្រុងនៅម៉ោង៣និង៣០នាទីរសៀលថ្ងៃខែឆ្នាំដដែរ ។
ចំពោះមូលហេតុ សមត្ថកិច្ចបានស្រាវជ្រាវរកឃើញបណ្តាលមកពីឆ្លងចរន្តអគ្គិសនី ។ ដោយឡែក នៅក្នុងហេតុការណ៍គ្រោះអគ្គិភ័យខាងលើនេះ មិនបានបណ្តាលឲ្យអ្នកណាម្នាក់រងរបួសនៅក្នុងហេតុការណ៍គ្រោះអគ្គិភ័យនេះឡើយ ។
ដោយនៅក្នុងប្រតិបត្តិការខាងលើនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន០៦គ្រឿង ក្នុងនោះរួមមាន រថយន្តការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ចំនួន០២គ្រឿង ប្រើប្រាស់ទឹកអស់០២ឡាន ស្មើនឹង០៨ម៉ែត្រគូប និងរថយន្តជំនួយមកពីសាលាខណ្ឌច្បារអំពៅ ចំនួន០១គ្រឿង ប្រើប្រាស់ទឹកអស់០១ឡាន ស្មើនឹង០៤ម៉ែត្រគូប, រថយន្តរបស់បុរី ប៉េង ហួត ចំនួន០២គ្រឿង ប្រើប្រាស់ទឹកអស់០២ឡាន ស្មើនឹង០៨នម៉ែត្រគូប និងរថយន្តរបស់ក្រុមហ៊ុនស្រាបៀរកម្ពុជា ចំនួន០១គ្រឿ ប្រើប្រាស់ទឹកអស់០១ឡាន ស្មើនឹង០៦ម៉ែត្រគូប ៕
ចែករំលែកព័តមាននេះ