ទីក្រុងតូក្យូ៖ ប្រទេសជប៉ុនអាចនឹងខាតបង់ប្រាក់១៧ពាន់លានដុល្លារដោយសារការដំឡើងពន្ធរបស់លោកត្រាំដែលធ្វើឱ្យប៉ះពាល់យ៉ាងខ្លាំងចំពោះការនាំចេញរថយន្តទៅលក់នៅអាមេរិក។ នេះបើយោងតាមវិទ្យាស្ថានពាណិជ្ជកម្មអន្តរជាតិ (ICT)សរុបរបាយការណ៍កាលពីល្ងាចថ្ងៃសុក្រ។ ការថ្លែងដូច្នេះបន្ទាប់ពីលោកត្រាំដំឡើងពន្ធ២៥%ទៅលើរថយន្តនាំចូលទាំងអស់មិនថាតែប្រទេសជប៉ុន អឺរ៉ុប ឬកាណាដានោះទេ។
ប្រធានវិទ្យាស្ថានខាងលើនេះគឺលោកស្រីជូលា ស្ប៉ាយ (Julia Spies) ថ្លែងថាគ្រាន់តែចាប់ផ្ដើមអនុវត្ត២៥%ដែលចូលជាធរមានកាលពីម្សិលមិញ ប្រទេសជប៉ុនត្រៀមខាតលុយ១៧ពាន់លានដុល្លារ។ ក្រៅពីការសម្រេចយកពន្ធលើរថយន្ត រដ្ឋាភិបាលរបស់លោកត្រាំក៏ត្រៀមដំឡើងពន្ធទៅលើគ្រឿងបន្លាស់រថយន្តផងដែរដោយចាប់អនុវត្តពីថ្ងៃទី៣ ខែឧសភាតទៅ។
ក្រុមហ៊ុនផលិតរថយន្តត្រូវបង់ពន្ធនាំចូលរហូតដល់ទៅជាង៤៦០ពាន់លានដុល្លារជារៀងរាល់ឆ្នាំនៅទូទាំងពិភពលោក។ នេះបើយោងតាមរបាយការណ៍វិភាគរបស់ទីភ្នាក់ងារព័ត៌មានរ៉យទ័រ។ ស្លូវ៉ាគី ជប៉ុន និងហុងឌុយរ៉ាស់ (Honduras) ស្ថិតនៅក្នុងចំណោមប្រទេសដែលត្រៀមចំណាយច្រើនទៅលើការដំឡើងពន្ធនាំចូលរថយន្តទៅលក់នៅអាមេរិក។ នេះបើយោងតាមទីភ្នាក់ងារពាណិជ្ជកម្មរបស់អង្គការសហប្រជាជាតិ។ អាមេរិកទិញរថយន្តពីប្រទេសទាំងនេះនៅក្នុងបរិមាណច្រើនៗ។
វិទ្យាស្ថានពាណិជ្ជកម្មអន្តរជាតិ (ITC) ថ្លែងបន្តទៀតថាប្រទេសជប៉ុនប្រហែលជាត្រូវរកទីផ្សាររថយន្តរបស់ខ្លួននៅប្រទេសដទៃទៀតហើយទើបបាន។ លោកស្រីជូលាស្ប៉ាយថ្លែងថាដោយសារអាមេរិកជាទីផ្សារដ៏ធំរបស់ជប៉ុន ដូចនេះទោះបីប្រទេសជាច្រើនផ្គុំចូលគ្នាដូចជាចិន អាល្លឺម៉ង់ ហ្វ៊ីលីពីន និងថៃខំទិញឡានរបស់ជប៉ុនក៏នៅតែមិនអាចជំនួសអាមេរិកបានឡើយ។
ទំហំលក់ចេញរថយន្តនៅអាមេរិកកាលពីឆ្នាំ២០២៤សឹងតែពាក់កណ្ដាលជាប្រភេទរថយន្តនាំចូល (មិនមែនផលិតនៅអាមេរិក)។ អាមេរិកជាប្រទេសនាំចូលរថយន្តច្រើនជាងគេនៅលើពិភពលោកព្រោះជនជាតិអាមេរិកត្រូវការឡានជាចាំបាច់ដោយសារមនុស្សធ្វើដំណើរទៅធ្វើការនៅលើចម្ងាយផ្លូវរាប់រយគីឡូម៉ែត្រ។ នេះបើយោងតាមរបាយការណ៍របស់ក្លូបលដេតា (GlobalData)៕
ចែករំលែកព័តមាននេះ