បរទេស ៖ ទីផ្សារភាគហ៊ុនពិភពលោកបានដាំក្បាលចុះ ពោល១ថ្ងៃបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសពន្ធថ្មី ដែលត្រូវបានព្យាករណ៍ថានឹងដំឡើងថ្លៃទំនិញប្រើប្រាស់ រួមទាំងការថ្លឹងថ្លែងលើកំណើនសេដ្ឋកិច្ចនៅអាមេរិក…
បរទេស ៖ ទីផ្សារភាគហ៊ុនពិភពលោកបានដាំក្បាលចុះ ពោល១ថ្ងៃបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសពន្ធថ្មី ដែលត្រូវបានព្យាករណ៍ថានឹងដំឡើងថ្លៃទំនិញប្រើប្រាស់ រួមទាំងការថ្លឹងថ្លែងលើកំណើនសេដ្ឋកិច្ចនៅអាមេរិក ក៏ដូចជាពិភពលោកផងដែរ។
ទីផ្សារភាគហ៊ុនក្នុងតំបន់អាស៊ី-ប៉ាស៊ីហ្វិកបានធ្លាក់ចុះរយៈពេលពីរថ្ងៃជាប់គ្នា ស្របពេលដែលទីផ្សារភាគហ៊ុនអាមេរិក S&P 500 ដាំក្បាលចុះដ៏អាក្រក់បំផុត តាំងពីការរីករាលដាលជំងឺកូវីដ១៩ បានធ្វើឱ្យសេដ្ឋកិច្ចអាមេរិកធ្លាក់ចុះក្នុងឆ្នាំ ២០២០។
Nike, Apple និង Target ស្ថិតក្នុងចំណោមក្រុមហ៊ុនកំពូលរបស់អាមេរិកទទួលរងផលប៉ះពាល់យ៉ាងខ្លាំងបំផុត ដោយបុកបញ្ជូលគ្នាមានការបានធ្លាក់ចុះជាង ៩%។ នៅសេតវិមានឯណោះវិញ លោក ត្រាំ បានប្រាប់បណ្តាអ្នកសារព័ត៌មានថា សេដ្ឋកិច្ចអាមេរិកនឹង រីកចម្រើន ដោយសារតែពន្ធអប្បបរមា ១០% ដែលនឹងទះកំផ្លៀងលើការនាំចូលពីជុំវិញពិភពលោកក្នុងក្តីសង្ឃឹមនៃការបង្កើនប្រាក់ចំណូលសហព័ន្ធ។
លោកថែមទាំងវាយលុកពន្ធលើប្រទេសដៃគូពាណិជ្ជកម្មដ៏សំខាន់របស់អាមេរិកជាច្រើនផ្សេងទៀតផងដែរ ដោយការគិតពន្ធខ្ពស់ជាងនេះ រួមមានដៃគូពាណិជ្ជកម្មដូចជាប្រទេសចិន និងសហភាពអឺរ៉ុបជាដើម។ ប្រទេសចិនដែលកំពុងប្រឈមមុខនឹងពន្ធសរុប ៥៤% និងសហភាពអឺរ៉ុបដែលប្រឈមមុខនឹងពន្ធ ២០% កាលពីព្រហស្បតិ៍បានប្រកាសប្តេជ្ញាសងសឹកនឹងការគិតពន្ធរបស់អាមេរិក។ តួយ៉ាង ប្រធានាធិបតីបារាំង លោក Emmanuel Macron បានអំពាវនាវឱ្យបណ្តាក្រុមហ៊ុនអឺរ៉ុបផ្អាកការវិនិយោគដែលបានគ្រោងទុកនៅកសហរដ្ឋអាមេរិក។
ផែនការលោក ត្រាំ ដែលបានប្រកាសកាលពីថ្ងៃពុធអំពីការដំឡើងពន្ធទ្រង់ទ្រាយបែបនេះ គឺជាការដំឡើងពន្ធដល់កម្រិតខ្ពស់បំផុតក្នុងរយៈពេលជាង១០០ឆ្នាំ។ អង្គការពាណិជ្ជកម្មពិភពលោកបានលើកឡើងពីការព្រួយបារម្ភយ៉ាងខ្លាំង ដោយប៉ាន់ស្មានថាទំហំពាណិជ្ជកម្មពិភពលោកអាចធ្លាក់ចុះជាលទ្ធផល ១% នៅឆ្នាំនេះ។ ស្របពេលដែលពាណិជ្ជករក៏បានសម្តែងការព្រួយបារម្ភយ៉ាងខ្លាំងផងដែរ។
ការជួញដូរដំបូងនៅថ្ងៃទី៤ ខែមេសា ឆ្នាំ២០២៥ សន្ទស្សន៍ភាគហ៊ុនគោល Nikkei 225 របស់ជប៉ុនបានធ្លាក់ចុះ ១.៨% រីឯ Kospi របស់កូរ៉េខាងត្បូងទាបជាង ១% ហើយ ASX 200 របស់អូស្ត្រាលីបានធ្លាក់ចុះ ១.៤% ។ សន្ទស្សន៍ភាគហ៊ុន FTSE 100 របស់ចក្រភពអង់គ្លេសក៏បានធ្លាក់ចុះ ១.៥% ហើយទីផ្សារអឺរ៉ុបផ្សេងទៀតក៏ធ្លាក់ចុះដូចគ្នា ដោយបានបន្ទរការធ្លាក់ចុះពីប្រទេសជប៉ុនរហូតដល់ទីផ្សារហុងកុង។
កាលពីថ្ងៃព្រហស្បតិ៍កន្លងទៅ សន្ទស្សន៍ភាគហ៊ុន S&P 500 ដែលតាមដានលើក្រុមហ៊ុនធំៗរបស់អាមេរិកចំនួន ៥០០ បានធ្លាក់ចុះដល់ ៤.៨% នៅក្នុងតម្លៃប្រហែល២ទ្រីលានដុល្លារ ។ ចំណែកសន្ទស្សន៍ភាគហ៊ុន Dow Jones បានធ្លាក់ចុះ ៤% ខណៈពេលដែលអនាគតទីផ្សារអេឡិចត្រូនិកសកល Nasdaq បានធ្លាក់ចុះប្រហែល 6% ។ ការលក់ភាគហ៊ុនរបស់អាមេរិកបាននិងកំពុងបន្តចាប់តាំងពីពាក់កណ្តាលខែកុម្ភៈ ចំពេលមានការភ័យខ្លាចសង្គ្រាមពាណិជ្ជកម្ម៕ ប្រភព ៖ BBC
ចែករំលែកព័តមាននេះ