រាជធានីភ្នំពេញ ៖ រថយន្តមួយគ្រឿងម៉ាកឡិចស៊ីស ៥៧០ បានធ្វើដំណើរទៅឆេងម៉េងជាលក្ខណៈគ្រួសារ ស្រាប់តែជួបគ្រោះថ្នាក់ចរាចរណ៍តាមផ្លូវរវាងរថយន្តនិងរថយន្តកូរ៉េដឹកឈើ សំណាងល្អគ្មានអ្នករងរបួស ក្នុងគ្រោះថ្នាក់ចរាចរណ៍នេះទេ ។
ហេតុការណ៍ខាងលើនេះបានកើតឡើងកាលពីវេលាម៉ោង៤ទៀបភ្លឺថ្ងៃទី៤ ខែមេសា ឆ្នាំ២០២៥ ស្ថិតនៅលើកំណាត់ផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
តាមប្រភពពីម្ចាស់រថយន្ត Lexus 570 បានឱ្យដឹងថា មុនពេលកើតហេតុ គាត់និងក្រុមគ្រួសារ ធ្វើដំណើរតាមរថយន្ត LEXUS 570 ពណ៌ខ្មៅ ១គ្រឿង ដែលមានស្លាកលេខ ភ្នំពេញ 2N-1899 បើកបរតាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើង ។
ម្ចាស់រថយន្តឡិចស៊ីស ៥៧០ បានបន្តថា លុះមកដល់ចំណុចកើតហេតុ គាត់បានឃើញរថយន្តកូរ៉េ ដឹកដឹកឈើ១គ្រឿង ពណ៌ខៀវ ម៉ាក HYUNDAI ពាក់ស្លាកលេខ ភ្នំពេញ 2O-7405 ដែលកំពុងរេចង្កូត នៅលើកំណាត់ផ្លូវជាតិលេខ៦ ក្នុងទិសដៅបញ្ជ្រាសគ្នា ហើយរថយន្តកូរ៉េនោះបានបុកឡើងខឿនសួនច្បារពុះចែកទ្រូងផ្លូវពីម្ខាងធ្លាយទៅម្ខាងទៀត បណ្តាលឲ្យបុករថយន្ត Lexus របស់គាត់យ៉ាងពេញទំហឹង រួចជ្រុលទៅបុកធ្លាយរបងឃ្លាំងមួយកន្លែងថែមទៀត។
ម្ចាស់រថយន្ត Lexus បានបន្ថែមថា ភ្លាមៗនោះ គាត់បានព្យាយាមបួងចង្កូតគេចចេញដែរ ប៉ុន្តែគេចមិនផុត ត្រូវរថយន្តកូរ៉េបុកយ៉ាងពេញទំហឹង បណ្តាលឱ្យរថយន្តរបស់គាត់ខូចខាតមួយកំណាត់មុខទាំងស្រុង ព្រមទាំងរលត់ម៉ាស៊ីន មិនអាចបន្តដំណើរទៅមុខទៀតបាន។
សូមបញ្ជាក់ថា មនុស្សដែលរួមដំណើរនៅក្នុងរថយន្ត Lexus 570 ខាងលើពុំមានរងរបួសធ្ងន់នោះទេ ។
ក្រោយកើតហេតុ សមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង យករថយន្តបង្ក និងរថយន្តរងគ្រោះ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនមកដោះស្រាយតាមនីតិវិធីច្បាប់ នៅពេលក្រោយទៀត៕






ចែករំលែកព័តមាននេះ