ខេត្តប៉ៃលិន ៖ ដោយសារតែឱកាសបុណ្យចូលឆ្នាំថ្មីប្រពៃណីជាតិខ្មែរកាន់តែកៀកខិតជិតមកដល់ នៅព្រឹកថ្ងៃទី០២ ខែមេសា ឆ្នាំ២០២៥នេះ គេសង្កេតឃើញប្រជាពលករខ្មែរជាច្រើននាក់ នាំគ្នាធ្វើដំណើរជាបន្តបន្ទាប់ឆ្លងដែនមកពីប្រទេសថៃ ដោយអ្នកខ្លះមានឥវ៉ាន់ អ្នកខ្លះមានទាំងកូន…
ខេត្តប៉ៃលិន ៖ ដោយសារតែឱកាសបុណ្យចូលឆ្នាំថ្មីប្រពៃណីជាតិខ្មែរកាន់តែកៀកខិតជិតមកដល់ នៅព្រឹកថ្ងៃទី០២ ខែមេសា ឆ្នាំ២០២៥នេះ គេសង្កេតឃើញប្រជាពលករខ្មែរជាច្រើននាក់ នាំគ្នាធ្វើដំណើរជាបន្តបន្ទាប់ឆ្លងដែនមកពីប្រទេសថៃ ដោយអ្នកខ្លះមានឥវ៉ាន់ អ្នកខ្លះមានទាំងកូន និងចៅ ដើម្បីមកចូលរួមអបអរសាទរបុណ្យចូលឆ្នាំថ្មី ខណៈពេល ដែលនៅកន្លែងធ្វើការក្នុងទីក្រុងបាងកកប្រទេសថៃ ជួបនឹងបញ្ហាគ្រោះរញ្ជួយដីបាក់រលំអគារ ត្រូវថៅកែផ្អាកការងារ១រយៈពេលសិន លុះក្រោយពេលបុណ្យចូលឆ្នាំខ្មែរចប់ ទើបនាំគ្នាវិលត្រឡប់ទៅរកការងារទីនោះវិញ ។
បើតាមការរៀបរាប់ពីស្ត្រីម្នាក់ ឈ្មោះ សុខ សុភា អាយុ៤០ឆ្នាំ មានស្រុកកំណើតរស់នៅក្នុងខេត្តបាត់ដំបង និងឈ្មោះ កែវ ពិសី អាយុ៣៥ឆ្នាំ រស់នៅខេត្តពោធិ៍សាត់ បានប្រាប់ភ្នាក់ងារយើងឱ្យដឹងថា ៖ ចាប់តាំងពីថ្ងៃទទួលរងគ្រោះធម្មជាតិរញ្ជួយដីយ៉ាងខ្លាំង នៅក្នុងទីក្រុងបាងកក ប្រទេសថៃ ដួលរលំស្រុតអគារអស់ជាច្រើន ដែលបណ្តាលឱ្យកម្មករខ្មែរ និងថៃមួយចំនួន ត្រូវអគាររលំសង្កត់ បណ្តាលឱ្យស្លា.ប់បាត់បង់ជីវិត។ តែអ្នកខ្លះបានរត់គេចចេញរួចផុតពីគ្រោះថ្នាក់នេះ ជាពិសេសអ្នកធ្វើការសំណង់ ត្រូវបានថៅកែផ្អាកការងារបណ្តោះអាសន្ន ដោយរង់ចាំឱ្យសភាពការរញ្ជួយដីនេះ ទៅជាធម្មតាវិញ ទើបថៅកែបន្តទទួលពលករចូលធ្វើឡើងវិញ ទើបពួកគាត់ និងពលករដទៃទៀត នាំគ្នារៀបចំឥវ៉ាន់ឡើងរថយន្តធ្វើដំណើរចូលមកស្រុកខ្មែរ ដើម្បីចូលរួមបុណ្យចូលឆ្នាំខ្មែរ ជួបជុំក្រុមគ្រួសារ ។
ប្រភពបន្តទៀតថា ការធ្វើដំណើរមកលេងស្រុកខ្មែរនេះ មានពលករជាច្រើន ដែលធ្វើការងារនៅបាងកក ប្រទេសថៃ ក្បែរៗកន្លែងដួលរលំអគារ បាននាំក្រុមគ្រួសារ និងបងប្អូនធ្វើដំណើរតាមរថយន្ត ចូលមកប្រទេសខ្មែរវិញ ដោយសារតែភ័យបារម្ភខ្លាចហេតុការណ៍គ្រោះធម្មជាតិនេះ កើតឡើងសារថ្មីឡើងវិញ ព្រោះម្នាក់ៗ មានការភ័យខ្លាចយ៉ាងខ្លាំង ខណៈដែលឃើញពលករជាច្រើនដែលធ្វើការនៅទីនោះ បាត់ប្តី និងប្រពន្ធកូន អ្នកខ្លះទៀត ត្រូវអគាររលំសង្កត់ ព្រមទាំងអ្នកខ្លះត្រូវបានអគាររលំសង្កត់ បណ្តាលឱ្យស្លាប់ ។
ចំណែកមន្ត្រីនគរបាលអន្តោប្រវេសន៍ ដែលធ្វើការប្រចាំនៅច្រកទ្វារអន្តរជាតិព្រំ បានឱ្យដឹងថា ក្រោយពេលថ្ងៃ រលំដួលអគារនៅទីក្រុងបាងកក ប្រទេសថៃ ដោយសារតែបញ្ហាគ្រោះរញ្ជួយដីកម្រិត ៧.៧ រ៉ិចទ័រ ដែលធ្វើឱ្យកម្មករ ជាច្រើននាក់ ទទួលរងគ្រោះថ្នាក់បាត់បង់ជីវិត និងមានអ្នករងរបួសទាំងខ្មែរ និងជនជាតិផ្សេងៗ ទើបនៅថ្ងៃបន្ទាប់មក គេសង្កេតឃើញពលករខ្មែរ នាំគ្នាឆ្លងដែនចូលមកស្រុកកំណើតវិញ ណាមួយជិតដល់ថ្ងៃបុណ្យចូលឆ្នាំថ្មីប្រពៃណីជាតិ ។
ប្រភពបន្តទៀតថា ទោះបីជាយ៉ាងណា ការឆ្លងដែនចូលមកប្រទេសខ្មែរវិញនេះ ខាងមន្ត្រីច្រកទ្វារអន្តរជាតិ មិនមានការទារលុយកាក់ពីប្រជាពលរដ្ឋនោះឡើយ គឺនាំគ្នាពិនិត្យឯកសារ និងសម្របសម្រួលឱ្យពួកគាត់បានចូលទៅលេងស្រុកកំណើតដោយរលូនថែមទៀត ៕
ចែករំលែកព័តមាននេះ