បរទេស ៖ យោងតាមការធ្វើបច្ចុប្បន្នភាពសេដ្ឋកិច្ចចុងក្រោយបំផុតពីទីភ្នាក់ងារវាយតម្លៃឥណទានរបស់អាមេរិក S&P Global Ratings បានឱ្យដឹងថា ការដំឡើងពន្ធរបស់សហរដ្ឋអាមេរិកត្រូវបានរំពឹងថានឹងប៉ះពាល់ដល់កំណើនសេដ្ឋកិច្ចនៅទូទាំងតំបន់អាស៊ី-ប៉ាស៊ីហ្វិក (APAC)។ នេះបើយោងតាមចេញផ្សាយពីសារព័ត៌មានម៉ាឡេស៊ី…
បរទេស ៖ យោងតាមការធ្វើបច្ចុប្បន្នភាពសេដ្ឋកិច្ចចុងក្រោយបំផុតពីទីភ្នាក់ងារវាយតម្លៃឥណទានរបស់អាមេរិក S&P Global Ratings បានឱ្យដឹងថា ការដំឡើងពន្ធរបស់សហរដ្ឋអាមេរិកត្រូវបានរំពឹងថានឹងប៉ះពាល់ដល់កំណើនសេដ្ឋកិច្ចនៅទូទាំងតំបន់អាស៊ី-ប៉ាស៊ីហ្វិក (APAC)។ នេះបើយោងតាមចេញផ្សាយពីសារព័ត៌មានម៉ាឡេស៊ី The Star នៅថ្ងៃទី២ ខែមេសា ឆ្នាំ២០២៥។
ពន្ធរបស់ប្រធានាធិបតីអាមេរិក លោក ដូណាល់ ត្រាំ ដែលផ្តោតលើវិស័យដូចជា រថយន្ត ឱសថ និងគ្រឿងអេឡិចត្រូនិក ត្រូវបានរំពឹងថានឹងដាក់ភាពតានតឹងលើកំណើនក្នុងតំបន់ តាមរយៈការបន្តវិវឌ្ឍនៃទំនាក់ទំនងពាណិជ្ជកម្ម។
លោក Louis Kuijs ប្រធានសេដ្ឋវិទូនៅទីភ្នាក់ងារ S&P Global Ratings ប្រចាំតំបន់អាស៊ី-ប៉ាស៊ីហ្វិក បានលើកឡើងថា ពន្ធគយនឹងមានផលប៉ះពាល់ខ្លាំង ពិសេសលើប្រទេសដែលពឹងផ្អែកខ្លាំងលើពាណិជ្ជកម្មជាមួយអាមេរិក។ សម្រាប់អាស៊ី-ប៉ាស៊ីហ្វិកយើងរំពឹងថានឹងមានការយកពន្ធបន្ថែមទៀត ដែលនឹងប៉ះពាល់ដល់កំណើនសេដ្ឋកិច្ច ពិសេសតាមរយៈឥទ្ធិពលរបស់វាទៅលើការនាំចេញ ការវិនិយោគ និងភាពមិនប្រាកដប្រជានៃសេដ្ឋកិច្ចទាំងមូល»។
លោកបានបន្តទៀតថា «វាក៏នឹងមានប្រទេសមួយចំនួនដូចជា ហ្វីលីពីន សិង្ហបុរី អូស្ត្រាលី និងនូវែលសេឡង់ ដែលមិនត្រូវបានរំពឹងថានឹងរងផលប៉ះពាល់ខ្លាំងពីពន្ធផ្ទាល់នោះទេ។ ផលប៉ះពាល់លើប្រទេសទាំងនេះនឹងមានតិចតួច ដោយសារពួកគេមិនប្រឈមមុខនឹងពន្ធសំខាន់ៗ ឬមានអតិរេកពាណិជ្ជកម្មទ្វេភាគីច្រើនជាមួយសហរដ្ឋអាមេរិក ប៉ុន្តែពួកគេនឹងនៅតែជួបប្រទះផលប៉ះពាល់ដោយប្រយោល»។
លោកបានអះអាងថា «យើងក៏ត្រូវពិចារណាផងដែរថា នៅពេលដែលការនាំចេញរបស់ប្រទេសចិនប្រឈមមុខនឹងបញ្ហាកាន់តែច្រើនក្នុងទីផ្សារសហរដ្ឋអាមេរិក ពួកគេនឹងផ្តោតកាន់តែខ្លាំងលើការលក់ក្នុងតំបន់។ ការផ្លាស់ប្តូរនេះនឹងដាក់សម្ពាធបន្ថែមលើអ្នកនាំចេញក្នុងតំបន់ ជាពិសេសក្នុងទីផ្សារអាស៊ីអាគ្នេយ៍មួយចំនួន»។
យ៉ាងណាមិញ លោក Kuijs បានបន្ថែមថា បើទោះបីជាមានការដំឡើងពន្ធ និងការកើនឡើងភាពតានតឹងពាណិជ្ជកម្មសកលក៏ដោយ ក៏ទីភ្នាក់ងារ S&P Global Ratings បានកែប្រែការព្យាករកំណើនកន្លងមករបស់ខ្លួន សម្រាប់សេដ្ឋកិច្ចតំបន់អាស៊ី-ប៉ាស៊ីហ្វិក បន្តិចបន្តួចប៉ុណ្ណោះ ដោយព្យាករថានឹងកើនឡើង ៤.១% នៅឆ្នាំ ២០២៥ ទាបជាងបើធៀបនឹង ៤.៤% នៅឆ្នាំ ២០២៤ ដោយសារតែតម្រូវការក្នុងស្រុកខ្ពស់៕
ចែករំលែកព័តមាននេះ