រាជធានីភ្នំពេញ៖ ជនសង្ស័យម្នាក់មានមុខរបរជាអ្នកខ្វៃជ្រូកលក់មិនសូវកាក់កបបានបែកគំនិតធ្វើជាចោរ ដោយបានប្រើល្បិចតថ្លៃរថយន្តតាក់សុី១គ្រឿងជិះពីម្ដុំជិតស្ពានអាកាសចោមចៅដោយប្រាប់ថាទៅខេត្តកំពត ហើយបន្ទាប់ពីតថ្លៃត្រូវគ្នាហើយបានឡើងទៅអង្គុយក្នុងរថយន្ត ចំណែកឯម្ចាស់រថយន្តមិនបានពន្លត់ម៉សុីននោះទេ ព្រោះខ្លាចជនសង្ស័យនិងម៉ូយម្នាក់ទៀតក្ដៅស្អុះ គាត់ក៏បញ្ឆេះរថយន្តចោល ។ បន្ទាប់មកគាត់បានដើរហៅម៉ូយដាក់រថយន្តបន្ថែម ស្រាប់តែជនសង្ស័យឆ្លៀតឱកាសធ្វើសកម្មភាពលួចរថយន្តនោះបើកចេញគេចខ្លួនដោយទាំងម៉ូយម្នាក់នៅក្នុងរថយន្តនោះផងដែរ ។ ប៉ុន្តែត្រូវបានម្ចាស់រថយន្តជួលម៉ូតូឌុបជិះដេញតាមជាច្រើនគីឡូម៉ែត្រ ទើបតាមទាន់រួចឃាត់ខ្លួនហើយប្រជាពលរដ្ឋនៅជិតនោះបានវាយទាត់ធាក់ម្នាក់១ដៃ១ជើងទ្រមខ្លួន រួចទើបប្រគល់ឲ្យនគរបាលចាត់ការតាមច្បាប់តែម្ដង ។
ហេតុការនោះបានកើតឡើងកាលពីវេលាម៉ោង១និង៣០នាទីរសៀលថ្ងៃទី៣១ ខែមីនា ឆ្នាំ២០២៥ នៅតាមបណ្តោយផ្លូវជាតិលេខ៣ ត្រង់ចំណុចគល់ស្ពានអាកាសចោមចៅ ស្ថិតនៅក្នុងភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យខាងលើឈ្មោះ ជេត វណ្ណ ភេទប្រុសអាយុ៣០ ឆ្នាំ មុខរបរជាអ្នកខ្វៃជ្រូកស្នាក់នៅបន្ទប់ជួលភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ ជននេះធ្វើសកម្មភាពលួចរថយន្តម៉ាកអេសសាំយ៉ុងពណ៍ខៀវពាក់ស្លាកលេខភ្នំពេញ2AK-7933 ដែលជាកម្មសិទ្ធិរបស់បុរសម្នាក់ឈ្មោះ ជឿន ចាន់ណាក់ អាយុ៣២ឆ្នាំ មុខរបររត់តាក់សុី មានទីលំនៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ
ម្ចាស់រថយន្តខាងលើបានប្រាប់ឲ្យដឹងថា នៅមុនពេលកើតហេតុរូបគាត់បានឈប់រថយន្តនៅតាមបណ្តោយផ្លូវជាតិលេខ៣ត្រង់ចំណុចគល់ស្ពានអាកាសចោមចៅ ស្ថិតនៅក្នុងភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ ដើម្បីហៅម៉ូយខណៈនោះរូបគាត់ទើបតែហៅបានម៉ូយជិះនៅក្នុងរថយន្តម្នាក់ប៉ុណ្ណោះ ។លុះដល់ពេលកើតហេតុក៏ឃើញជនសង្ស័យខាងលើដើរទៅតថ្លៃរថយន្តគាត់ជិះទៅកាន់តានីទូកមាស ខេត្តកំពត ហើយត្រូវរ៉ូវគ្នាក្នុងតម្លៃ៣០,០០០រៀល រួចជនសង្ស័យបានឡើងទៅជិះក្នុងរថយន្តនៅកៅអីខាងក្រោយ ។
គាត់បានប្រាប់ឲ្យដឹងបន្តទៀតថា ខណៈនោះគាត់មិនបានពន្លត់ម៉ាសុីនរថយន្តនោះទេដោយខ្លាចជនសង្ស័យនិងម៉ូយម្នាក់ទៀតក្ដៅស្អុះក៏បញ្ឆេះររថយន្តចោល រួចបានបានទៅហៅម៉ូយដាក់រថយន្តបន្តទៀត ស្រាប់តែជនសង្ស័យឆ្លៀតឱកាសគាត់កំពុងរវល់ជននោះក៏បើករថយន្តគេចខ្លួនតែម្ដងតែម្ដង ។ ពេលឃើញបែបនេះគាត់ក៏បានជួលម៉ូតូឌុបជិះដេញតាមរហូតដល់ត្រង់ចំណុចមុខខ្លោទ្វារវត្តជន្លុងម្លូ ស្ថិតនៅតាមផ្លូវជាតិលេខ៣ ក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ចាប់បានហើយប្រជាពលរដ្ឋដែលនៅជិតនោះនាំគ្នាវាយទាត់ធាក់ម្នាក់មួយដៃមួយជើងទ្រមខ្លួន រួចទើបប្រគល់ទៅឲ្យប៉ុស្តិ៍ភ្លើងឆេះរទេះ ខណ្ឌកំបូល ។
នគរបាលបានប្រាប់ថា ក្រោយពីនាំទៅល់ប៉ុស្តិ៍នគរបាលបានសួរនាំជនសង្ស័យនិងជនរងគ្រោះម្ចាស់រថយន្តទើបដឹងថា ទីតាំងកើតហេតុស្ថិតនៅភូមិថ្នល់បំបែក នៅសង្កាត់ចោមចៅទី៣ ខណ្ឌពោធិ៍សែនជ័យ ទើបនគរបាលប៉ុស្តិ៍ភ្លើងឆេះរទេះប្រគល់ជនសង្ស័យខាងលើទៅឲ្យនគរបាលប៉ុស្តិ៍ចោមចៅទី៣ដើម្បីសួរនាំនិងចាត់ការបន្តវិញ ប៉ុន្តែក្រោយមកម្ចាស់រថយន្តខាងលើមិនបានប្តឹងផ្តល់លើជនសង្ស័យនោះទេ និងបានត្រឹមតែសំណូមពរដល់នគរបាលឲ្យជួយធ្វើការអប់រំនិងធ្វើកិច្ចសន្យាបញ្ចប់រឿងប៉ុណ្ណោះ ៕
ចែករំលែកព័តមាននេះ