តម្លៃមាសនៅខែមេសា ដែលជាខែចូលឆ្នាំថ្មីប្រពៃណីជាតិ អាចនឹងបន្តកញ្ជ្រោលឡើងមួយកម្រិតទៀត ប្រសិនបើលោក ដូណាល់ ត្រាំ ប្រកាសចេញពន្ធថ្មីតាមដែលលោកបានអះអាងថា នឹងចេញនៅក្នុងរង្វង់ថ្ងៃទី២ ខែមេសា ខាងមុខ ។

គិតត្រឹមថ្ងៃទី៣០ ខែមីនា ឆ្នាំ២០២៥ មាសគីឡូដុំលក់ចេញនៅកម្ពុជា នៅក្នុងរង្វង់៣.៧១០ដុល្លារ ដោយឡែកមាសគីឡូ ដែលគេច្នៃហើយ គឺ៣.៧៣០ ដុល្លារ រីឯប្លាទីនទឹក៧៥ភាគរយវិញ គឺ២.៧៨០ដុល្លារ ហើយប្លាទីនទឹក៥០% គឺតម្លៃក៏១.៨៥០ ដុល្លារដែរនៅក្នុងមួយតម្លឹង ។

នេះ គឺជាតម្លៃហាងឆេងមាសនៅកម្ពុជា នៅមុនពេលលោក ត្រាំ មិនទាន់ចេញកំណត់ពន្ធថ្មីតាមការអះអាង ប៉ុន្តែក្រៅពីវាកម្រើកឡើងនៅកម្ពុជាហាងឆេងមាសនៅលើពិភពលោកក៏ចាប់ផ្តើមកម្រើកទៀតផងដែរ នៅចុងខែមីនា ឆ្នាំ២០២៥ នេះ ។​

កាសែតបាងកកប៉ុស្តិ៍ (Bangkok Post) បានរាយការណ៍ថា កាលពីថ្ងៃសៅរ៍កន្លងទៅ តម្លៃហាងឆេងមាសបានកម្រើកឡើងប្រមាណជា០,៦៥ភាគរយ ដែលនាំឲ្យតម្លៃមាសបានឡើងដល់កម្រិតប្រមាណជាជាង៣.៦០០ ដុល្លារនៅក្នុងមួយតម្លឹង ។​

ពាក់ព័ន្ធនឹងការប៉ាន់ប្រមាណនេះសមាគមពាណិជ្ជករមាសបានដំឡើងការព្យាករណ៍តម្លៃមាសនៅលើទីផ្សារអន្តរជាតិរបស់ខ្លួនសម្រាប់ឆ្នាំ២០២៥ នៅក្នុងចន្លោះពី៣.៨០០ ដុល្លារទៅដល់៤.១០០ ដុល្លារនៅក្នុងមួយតម្លឹង ។

លោក ជីតធិ ថាងស៊ីតផាឌី (Jitti Tangsithpakdi ) ប្រធានសមាគមពាណិជ្ជករមាស បាននិយាយថា ឥឡូវនេះវិនិយោគិននៅលើពិភពលោកកំពុងសម្លឹងមើលគោលនយោបាយពន្ធគយរបស់លោក ត្រាំ ។​

លោកបានអះអាងថា ប្រសិនបើនៅថ្ងៃទី២ ខែមេសា លោកត្រាំ សម្រេចចិត្តដាក់ពន្ធបន្ថែមទៀតនោះវិសាលភាពនៃហាងឆេងមាននឹងបង្កើនល្បឿននៃការកើនឡើង ។ លោកបានអះអាងថា ភាពមិនប្រាកដប្រជាជុំវិញបញ្ហាពន្ធគយ និងគោលនយោបាយរបស់លោកត្រាំ ជុំវិញសង្រ្គាមពាណិជ្ជកម្មបានបង្កើនតម្រូវការសម្រាប់ឧបករណ៍ទូទាត់ដែលមានសុវត្ថិភាព ជាពិសេសមាស ។

តាមសារព័ត៌មាន វីអេនអ៊ិចប្រេសណ៍ (VN Express) បានរាយការណ៍ថា នៅពេលនេះតម្លៃមាសនៅវៀតណាមបានបន្តកើនឡើងបន្ថែមទៀតដែរ គឺប្រមាណជា០,៥០ភាគរយ ដែលនាំឲ្យតម្លៃមាសនៅក្នុងប្រទេសនេះឡើងដល់កម្រិតជាង៣.៩០០ដុល្លារនៅក្នុងមួយតម្លឹង ។

ទីភ្នាក់ងារព័ត៌មានរ៉យទ័របានរាយការណ៍ថា តម្លៃមាសនៅទូទាំងពិភពលោកបានកើនឡើងដល់កម្រិតខ្ពស់បំផុត កាលពីថ្ងៃសុក្រ ខណៈដែលអ្នកវិនិយោគបានសម្រុកទៅរកទ្រព្យសម្បត្តិដែលមានសុវត្ថិភាព ចំពេលមានការភ័យខ្លាចនៃសង្គ្រាមពាណិជ្ជកម្មពិភពលោកដែលបង្កឡើងដោយពន្ធគយចុងក្រោយបំផុតរបស់ប្រធានាធិបតីអាមេរិក ។

មកដល់ពេលនេះ ប្រទេសដែលមានស្តុកមាសច្រើនបំផុត គឺសហរដ្ឋអាមេរិក បន្ទាប់មក គឺសហភាពអឺរ៉ុប ចិន រុស្ស៊ី ជាដើម ៕ ​