រាជធានីភ្នំពេញ ៖ ជនសង្ស័យប្រដាប់ដោយអាវុធ២នាក់ដែលជាមុខសញ្ញាឆក់ ប្លន់ បានធ្វើសកម្មភាពឆក់ទូរស័ព្ទពីអ្នកដំណើរនៅម្តុំខាងកើតផ្សារថ្នល់ទទឹង ផ្លូវជាតិលេខ៤ ស្រុកអង្គស្នួល ខេត្តកណ្ដាល ហើយត្រូវបានសមត្ថកិច្ចឃាត់ខ្លួនបានម្នាក់ភ្លាមៗ ។…
រាជធានីភ្នំពេញ ៖ ជនសង្ស័យប្រដាប់ដោយអាវុធ២នាក់ដែលជាមុខសញ្ញាឆក់ ប្លន់ បានធ្វើសកម្មភាពឆក់ទូរស័ព្ទពីអ្នកដំណើរនៅម្តុំខាងកើតផ្សារថ្នល់ទទឹង ផ្លូវជាតិលេខ៤ ស្រុកអង្គស្នួល ខេត្តកណ្ដាល ហើយត្រូវបានសមត្ថកិច្ចឃាត់ខ្លួនបានម្នាក់ភ្លាមៗ ។ ចំណែកម្នាក់ទៀតបានបាញ់តដៃជាមួយនគរបាលហើយបានរត់គេចខ្លួនឡើងទៅកាន់ផ្លូវលឿនលឿន រួចបានភ្ជង់ប្លន់រថយន្ត១គ្រឿងម៉ាកLexus GX-470 ពីអ្នកដំណើរ១គ្រួសារដែលកំពុងឈប់នៅលើផ្លូវល្បឿនលឿន ម្ដុំអូរក្រាំងអំបិល ខេត្តកំពង់ស្ពឺ បានសម្រេច ។
បន្ទាប់មកទៀតបើកគេចខ្លួនត្រលប់ចូលភូមិសាស្ត្រស្រុកអង្គស្នួលខេត្តកណ្ដាលវិញដោយបំបុកបារ៉ាស់បញ្ជរបង់ប្រាក់ផ្លូវល្បឿនលឿន និងបើកបំបុកនគរបាល២នាក់ដែលកំពុងជិះម៉ូតូបណ្ដាលឲ្យនគរបាល២នាក់រងរបួស ហើយរថយន្តនោះរងការខូចខាតខ្ទេចមុខរួចទុករថយន្តនោះចោល ។ បន្ទាប់មកខលហៅបងប្រុសរបស់ខ្លួនម្នាក់ជាទាហានឲ្យបើករថយន្តម៉ាកLexus LX -470 ១គ្រឿងទៀតទៅទទួលខ្លួនគេចចេញពីការតាមប្រម៉ាញ់របស់សមត្ថកិច្ចរហូតដល់ភូមិសាស្ត្រខណ្ឌកំបូល រាជធានីភ្នំពេញ ក៏បានគេចខ្លួនចូលព្រៃបាត់ដោយសុវត្ថិភាព ហើយបងប្រុសដែលជាទាហានម្នាក់នោះក៏ត្រូវបានសមត្ថកិច្ចឃាត់ខ្លួនរួមជាមួយរថយន្តម៉ាកLexus LX -470 ១គ្រឿងខាងលើនោះផងដែរ ។
ដោយឡែកក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្ដាលឯណោះវិញបានបញ្ជាក់នៅក្នុងសេចក្ដីបំភ្លឺរបស់ថា ករណីនេះមិនមែនជាករណី ប្លន់នៅផ្លូវល្បឿនលឿននោះទេ ជាករណីឆក់ ។
ហេតុការនេះមុនដំបូងគឺជាសកម្មភាពឆក់កាបូបដែលបានកើតឡើងបង្កការភ្ញាក់ផ្អើលនៅវេលាម៉ោងប្រមាណជាង១០ព្រឹក ថ្ងៃទី២៩ ខែមីនា ឆ្នាំ២០២៥ នៅតាមផ្លូវជាតិលេខ៤ម្ដុំផ្សារថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល ក្រោយមកទើបឈានដល់ការភ្ជង់ប្លន់រថយន្ត នៅត្រង់ចំណុចអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ ។
បើតាមសមត្ថកិច្ចបានបង្ហើបប្រាប់ឲ្យដឹងខ្លះៗថា ជនសង្ស័យមានគ្នា២នាក់ជិះម៉ូតូ២គ្រឿងផ្សេងគ្នាក្នុងនោះម៉ូតូម៉ាក Honda ADV ពណ៍ខ្មៅ១គ្រឿងនិងម៉ាកClick ពណ៍ស១គ្រឿង ប្រដាប់ដោយអាវុធខ្លីពិតប្រាកដ១ដើម និងអាវុធប្រើហ្គាស១ដើម គឺជាមុខសញ្ញាចោរប្លន់ និងឆក់ប្រដាប់ដោយអាវុធ ដែលឆក់តែឈុតធំៗដូចជាអ្នកលក់មាសនិងលក់ទូរស័ព្ទជាដើម ។ ដោយឡែកនៅវេលាព្រឹកថ្ងៃកើតហេតុជនសង្ស័យបានធ្វើសកម្មភាពឆក់ទូរស័ព្ទដៃពីអ្នកដំណើរដែលកំពុងជិះម៉ូតូនៅតាមផ្លូវជាតិលេខ៤ ត្រង់ចំណុចម្តុំខាងកើតផ្សារថ្នល់ទទឹង ស្រុកអង្គស្នួល បានសម្រេចរួចព្យាយាមគេចខ្លួនបាត់ស្រមោល ហើយទូរស័ព្ទនោះមានភ្ជាប់ប្រព័ន្ធIcloud បន្ទាប់មកជនរងគ្រោះបានទៅដាក់ពាក្យប្ដឹងឲ្យនគរបាលជួយអន្តរាគមន៍ ។
សមត្ថកិច្ចដដែលបានប្រាប់ឲ្យដឹងទៀតថា ខណៈកម្លាំងសមត្ថកិច្ចស្រុកអង្គស្នួលបានស្រាវជ្រាវតាមប្រព័ន្ធIcloud ដែលភ្ជាប់នៅក្នុងទូរស័ព្ទដៃនោះ ហើយតាមជនសង្ស័យរហូតដល់ក្នុងភូមិសាស្ត្រ ស្រុកសំរោងទង ខេត្តកំពង់ស្ពឺ ទើបទាន់ជនសង្ស័យកំពុងជិះម៉ូតូ២គ្រឿងទន្ទឹមគ្នាលើផ្លូវបេតុង១ខ្សែ ។ កម្លាំងសមត្ថកិច្ចក៏បានបើករថយន្តកៀរឲ្យឈប់ ហើយត្រូវជនសង្ស័យរត់គេចខ្លួននិងបាញ់ស្រោចលើសមត្ថកិច្ច ប៉ុន្តែមិនបានបណ្ដាលឲ្យត្រូវនោះទេ ហើយសមត្ថកិច្ចធ្វើការឃាត់ខ្លួនបានម្នាក់ភ្លាមៗ និងដកហូតបានម៉ូតូ២គ្រឿងខាងលើ ព្រមទាំងអាវុធខ្លីប្រើហ្គាស១ដើម ចំណែកឯម្នាក់ទៀតបានព្យាយាមបាញ់តបត និងបានរត់គេចខ្លួនបាត់ដោយសុវត្ថិភាព ។
សមត្ថកិច្ចខាងលើបានប្រាប់បន្ថែមថាជនសង្ស័យម្នាក់នោះបានកាន់អាវុធខ្លីរត់ទៅតាមខ្លួនឡើងទៅលើផ្លូវល្បឿនលឿនភ្នំពេញ -ព្រះសីហនុ ហើយបានភ្ជង់ប្លន់យករថយន្ត១គ្រឿងម៉ាកLexus GX-470 ពណ៌ស ពីអ្នកដំណើរ១គ្រួសារដែលកំពុងឈប់នៅលើផ្លូវល្បឿនលឿននៅត្រង់ចំណុចអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ ។ ពេលនោះជនសង្ស័យបានឡើងឈរតោងលើរថយន្តចំហៀងខាងស្ដាំ ហើយដៃកាន់កាំភ្លើងខ្លី១ដើមភ្ជង់ប្លន់ឲ្យជនរងគ្រោះទាំងអស់ចុះចេញពីរថយន្ត ហើយជនរងគ្រោះច្រើននាក់មានចាស់មានក្មេងបាននាំគ្នាចុះចេញនិងប្រមូលយកអីវាន់ចេញបានខ្លះ បន្ទាប់មកជននោះបានបើករថយន្តខាងលើចេញទាំងចំហរទ្វារក្រោយទៅបាត់(យោងតាមរូបវីដេអូដែលថតបានដោយអ្នកដំណើរ ) ។
ប្រភពមួយនេះបានបញ្ជាក់ប្រាប់ទៀតថា ក្រោយប្លន់រថយន្តបានជនសង្ស័យបានបើករថយន្តគេចតាមតាមច្រកកំពង់ស្ពឺកើត និងបានបុកបារ៉ាស់បញ្ជរបង់ប្រាក់ផ្លូវល្បឿនលឿន រួចត្រលប់ក្រោយតាមផ្លូវជាតិលេខ៤វិញ ហើយដល់ផ្សារថ្នល់ទទឹងបានបើកបំបុកនគរបាល២នាក់ដែលកំពុងជិះម៉ូតូ១គ្រឿង បណ្ដាលឲ្យរងរបួស២នាក់ ដោយម្នាក់របួសជើងធ្ងន់ធ្ងរ ចំណែករថយន្តនោះបានរងការខូចខាតខ្ទេចមុខ ។
បន្ទាប់មកបានបើកគេចបន្តទៅតាមផ្លូវជាតិលេខ៤ដដែលរហូតដល់ត្រង់ចំណុចជិតផ្សារអង្គស្នួល ស្ថិតនៅក្នុងភូមិអង្គស្នួល ឃុំពើក ស្រុកអង្គស្នួល បានបត់ចូលតាមខ្លោងទ្វារវត្តចំបក់ និងខលហៅបងប្រុសរបស់ខ្លួនម្នាក់ជាទាហានម្នាក់ឲ្យទៅទទួល លុះពេលទៅដល់ក្នុងភូមិក្រឡឹងដុំ ឃុំឆក់ឈើនាង ស្រុកអង្គស្នួល ខេត្តកណ្ដាល ក៏ទុករថយន្តខាងលើចោលរួចចុះរត់ទៅឡើងជិះរថយន្តម៉ាកLexus LX -470 របស់បងប្រុសដែលកំពុងឈប់ចាំរួចជាស្រេច ដើម្បីគេចពីការតាមប្រម៉ាញ់របស់សមត្ថកិច្ច ។
ជនសង្ស័យនិងបងប្រុសបានដឹកគ្នាគេចខ្លួនរហូតដល់វត្តអង្គថ្ម ព្រំប្រទល់សង្កាត់ឪឡោក ខណ្ឌកំបូល រាជធានីភ្នំពេញ ទើបឈប់រថយន្ត ហើយជនសង្ស័យរូបនោះបានគេចខ្លួនចូលព្រៃបាត់ដោយសុវត្ថិភាពដោយជាប់ទៅជាមួយអាវុធខ្លី១ដើមផង ដោយឡែកបងប្រុសដែលជាទាហានម្នាក់នោះក៏ត្រូវបានសមត្ថកិច្ចនគរបាលស្រុកអង្គស្នួលឃាត់ខ្លួនរួមជាមួយរថយន្តម៉ាកLexus LX -470 ១គ្រឿងខាងលើនោះផងដែរ ។
ទាក់ទងទៅនឹងហេតុការខាងលើនោះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្តីបំភ្លឺព័ត៌មានដូចខាងក្រោម៖ ចំពោះករណីខាងលើនេះ ជាករណី (ឆក់) ដោយមានមុខសញ្ញា ចំនួន០២នាក់ ជិះម៉ូតូ ០២គ្រឿង ធ្វើសកម្មភាព ឆក់ ទៅលើជនរងគ្រោះកំពុងជិះម៉ូតូ នៅចំណុចផ្លូវជាតិលេខ៤ ភ្លាមៗនោះកម្លាំងសមត្ថកិច្ចយើងធ្វើការឃាត់ខ្លួនជនសង្ស័យបាន០១នាក់ និងជនសង្ស័យ០១នាក់ទៀតរត់គេចខ្លួន។ ក្នុងពេលកិច្ចប្រតិបត្តិការដែលសមត្ថកិច្ចដេញតាមជនសង្ស័យរត់គេចខ្លួននេះ ជនសង្ស័យបានផ្ទុះអាវុធមកលើកម្លាំងសមត្ថកិច្ចយើង ហើយកម្លាំងសមត្ថកិច្ចបានស្ទាក់និងបានដេញមុខសញ្ញានេះត្រឡប់មកខាងផ្លូវជាតិលេខ៥១វិញ។
ពេលនោះសមត្ថកិច្ចបានឃាត់ខ្លួនជនសង្ស័យបាន០១នាក់ ចំណែក០១នាក់ទៀតរត់គេចខ្លួនទៅផ្លូវល្បឿនលឿន និងបានភ្ជង់រថយន្តជនរងគ្រោះក្នុងរូបភាពនោះជិះគេចខ្លួន។ បញ្ជាក់ ៖ ករណីនេះ មិនមែនជាករណី ប្លន់ នៅផ្លូវល្បឿនលឿននោះទេ ជាករណី ឆក់ ជនរងគ្រោះជិះម៉ូតូ នៅចំណុចផ្លូវជាតិលេខ៤។ បច្ចុប្បន្ន កម្លាំងជំនាញពាក់ព័ន្ធកំពុងតាមស្វែងរកជនសង្ស័យដែលរត់គេចខ្លួន ៕
ចែករំលែកព័តមាននេះ