ទីក្រុងខូផឹនហាហ្គឹន៖ ដាណឺម៉ាកនិយាយពេបមាត់ដាក់រដ្ឋាភិបាលរបស់លោកត្រាំចំពោះការចិញ្ចឹមចិត្តចង់បានកោះហ្គ្រីនលេនមកធ្វើជាទឹកដីរបស់អាមេរិក។ លោកត្រាំលើកហេតុផលថាលោកចង់បានកោះនេះដើម្បីមិនត្រឹមតែថែរក្សាសន្តិសុខអាមេរិកប៉ុណ្ណោះទេ ប៉ុន្តែសម្រាប់ពិភពលោកទាំងមូល។ ជាកិច្ចឆ្លើយតប រដ្ឋមន្ត្រីការបរទេសដាណឺម៉ាកថ្លែងថាប្រទេសរបស់លោក (ដាណឺម៉ាក) បានចំណាយថវិកាជាច្រើនដើម្បីការពារសន្តិសុខជាតិនៅតំបន់មហាសមុទ្រទឹកកកអាកទិច។
លោកថាដាណឺម៉ាកបើកទ្វារចំហជានិច្ចសម្រាប់កិច្ចសហប្រតិបត្តិការជាមួយអាមេរិក។ លោកឡាស់ លូខេ រ៉ាស់ស្ម៊ូសឹន (Lars Løkke Rasmussen) ថ្លែងនៅក្នុងខ្សែអាត់វីឌីអូបន្ទាប់ពីលោកជេឌីវេន (JD Vance) ធ្វើដំណើរទៅពិនិត្យមើលសភាពការណ៍នៅលើកោះហ្គ្រីនលេនដែលជាកោះធំជាងគេនៅលើពិភពលោក មានផ្ទៃក្រឡាជាង២លានគីឡូម៉ែត្រការ៉េ។ លោករ៉ាស់ស្ម៊ូសឹនថ្លែងថាមានការចោទប្រកាន់ និងរិះគន់ជាច្រើនមកលើយើង (ដាណឺម៉ាក) ប៉ុន្តែយើងទទួលយកជានិច្ចនូវមតិទាំងនោះ។
ប៉ុន្តែលោកមិនទទួលយកការប្រើប្រាស់ភាសាមិនល្អរបស់អាមេរិកក្នុងនាមជាសម្ព័ន្ធមិត្តដ៏ជិតស្និទ្ធនឹងគ្នានោះទេ។ លោកនៅតែគិតថាអាមេរិក និងដាណឺម៉ាកជាសម្ព័ន្ធមិត្តដ៏ជិតស្និទ្ធនឹងគ្នា។ ការថ្លែងដូច្នេះបន្ទាប់ពីលោកជេឌីវេនថ្លែងថាដាណឺម៉ាកបានវិនិយោគតិចតួចទៅលើសន្តិសុខជាតិរបស់កោះហ្គ្រីនលេន។ ដូច្នេះ លោកទាមទារឱ្យដាណឺម៉ាកផ្លាស់ប្ដូរជំហររបស់ខ្លួន។ លោកត្រាំទើបតែនិយាយហើយថ្មីៗថាលោកចង់បានកោះនេះធ្វើជាទឹកដីអាមេរិកដើម្បីការពារសន្តិសុខពិភពលោក។
លោកជេឌីវេនបានទៅសួរសុខទុក្ខទាហានអាមេរិកដែលឈរជើងនៅកោះហ្គ្រីនលេន។ លោកថាយើងសូមផ្ញើសារនយោបាយច្បាស់ៗប្រាប់ទៅប្រទេសដាណឺម៉ាកថាអ្នកមិនបានធ្វើកិច្ចការឱ្យបានល្អទេចំពោះកោះហ្គ្រីនលេន។ អ្នកវិនិយោគមិនគ្រប់គ្រាន់ទេសម្រាប់ប្រជាជនហ្គ្រីនលេន ហើយអ្នកមិនបានវិនិយោគឱ្យបានគ្រប់គ្រាន់ទេសម្រាប់សន្តិសុខជាតិនៃកោះដ៏ស្រស់បំព្រង១នេះដែលមានប្រជាជនដ៏ល្អប្រពៃរស់នៅទីនេះ។ ដូច្នេះ ល្មមដល់ពេលដែលអ្នកត្រូវផ្លាស់ប្ដូរទម្លាប់នេះចេញ។
កាលពីថ្ងៃសុក្រ លោកត្រាំបានបង្ហោះខ្សែអាត់វីឌីអូនៅលើបណ្ដាញសង្គមរបស់លោកបង្ហាញរូបទាហានអាមេរិកឈរជើងនៅលើកោះនេះកាលពីអំឡុងសង្គ្រាមលោកលើកទី២។ វីឌីអូនេះមានចំណងជើងថាអាមេរិកតែងតែស្ថិតនៅជាប់ជានិច្ចនឹងកោះហ្គ្រីនលេន។ នៅពេលទៅដល់ហ្គ្រីនលេន លោកជេឌីវេនថ្លែងថាអាមេរិកគ្មានជម្រើសណាផ្សេងទេក្រៅពីចាត់វិធានការសំខាន់ៗដើម្បីការពារសន្តិសុខជាតិរបស់កោះនេះ។ គាត់បានជំរុញឱ្យហ្គ្រីនលេនទាមទារឯករាជ្យទាំងស្រុងពីដាណឺម៉ាក៕
ចែករំលែកព័តមាននេះ